[1] Wawqe-panaykuna, qankunaman hamusqaykuqa, manan yanqapaqchu karqan. Chaytaqa, qankuna kikiykichispunin yachankichis.
[2] Aswanmi, ñawpaqtaqa, Filipos llaqtapi muchuchisqa, hinallataq k'amisqa karqayku. Chay hatun kontrallikuqkuna chawpipi, Diospa allin willakuyninta mana manchakuspa qankunaman willanaykupaqmi Diosqa kallpachawarqanku. Chaytan qankunaqa yachankichispuni.
[3] Kallpanchaykuyniykuqa, manan pantachisqachu, nitaq qhelli yuyaykuymantachu, nillataq q'otukuywanpaschu karqan.
[4] Aswanpas allin willakuyta konfiawanankupaqmi, Diosqa akllawarqanku. Chaymi paypa aprobasqanman hina rimayku. Manan runakunata kusichiqkuna hinachu rimayku. Aswanqa Diosllatapuni kusichinaykupaqmi rimayku. Sonqonchista t'aqwiqqa paytaqmi.
[5] Manan hayk'aqpas misk'i rimaqman tukuspaqa rimapayarqaykikuchu. Chaytan qankunaqa yachankichispuni. Wakinkunaqa, qolqe sonqon kanku. Ichaqa manapas qolqe sonqochu kankuman hinatan rimanku. Ñoqaykuqa, manan chay hinatachu rimapayarqaykiku. Chaymanta testigoqa Diospunin.
[6] Hinaña Cristoq apostolninkuna hina gastachiykikuman karqan chaypas, manan runakunaqtapas, nitaq qankunaqtapas, nillataq wakinkunaqtapas hatunchaynintaqa maskhashaykuchu.
[7] Aswanmi, imaynan mamaqa kikinpa ñuñuq wawankunata kuidan, chay hinapuni qankunapurapiqa karqayku.
[8] Ñoqaykuqa, anchatapunin munakuykiku. Chaymi mana Diospa allin willakuynin chayachiyllatachu munarqayku. Aswanpas kikin kawsayniykuta hap'ichipuypas allinpuni kasqan rikch'akuwarqanku. Qankunata anchatapuni munakusqaykuraykun chaytaqa ruwarqayku.
[9] Wawqepanaykuna, haqayna llank'asqaykutawan, sayk'usqaykutawan yuyariychis. Mana mayqenniykichistapas gastachinaykupaqmi, tutantin, p'unchaynintin llank'arqayku. Chay hinapitaqmi, Diospa allin willakuynintaqa willarqaykiku.
[10] Ancha Dios sonqo kaywan, ch'uya kaywan, hinallataq mana imamanta huchachana kaywanmi qankuna iñiqkunapurapiqa kawsarqayku. Chaymanta testiguykuqa, qankunan kankichis. Hinallataq Diospas testigullaykutaqmi.
[11] Imaynan huk taytaqa, kikinpa wawankunata sonqochaykun, kallpachaykun, hinallataq cheqaq kaqta rimaykun. Chay hinatan ñoqaykupas qankunata sonqochaykurqaykiku, kallpachaykurqaykiku, hinallataq cheqaq kaqta rimaykurqaykiku. Chaytan qankunaqa yachankichispuni.
[12] Kikin qhapaq suyunmanwan, k'anchayninmanwan waqyaqniykichis Diospa kaqkuna hinapuni, purinaykichispaqmi rimapayashallarqaykikupuni.
[13] Diospa siminta uyariwasqaykikutaqa, manan runakunaq siminta hinachu chaskiykuwarqankiku. Aswanpas Diospa cheqaq simin qankuna iñiqkunapi, atiywan ruwaq simita hinapunin uyariwarqankiku. Chayraykun ñoqaykupas, mana sayk'uspa Diosman grasiasta qoshallaykupuni.
[14] Qankunaqa wawqepanaykuna, Judea probinsiapi kashaq Cristo Jesuspi Diospa iñiq t'aqankunata qatichikuqkunañan kapunkichis. Imaynan paykunaqa judío runakunaq ñak'arichisqan karqanku, chay hinallataqmi qankunapas llaqtamasiykichiskunaq ñak'arichisqan karqankichis.
[15] Chay judío runakunallataqmi Señor Jesustapas, kikinkuq Diospa rantinpi rimaqninkunatapas wañuchirqanku. Ñoqaykutapas qatiykachawarqankun. Manataqmi Diospa sonqontapas kusichinkuchu. Hinallataq llapa runakunatapas hark'apakunku.
[16] Qespichisqa kanankupaq, mana-judío runakunaman rimayku naykutapas, manapunin munankuchu. Chay hinapin, huchankuta aswantaraq hunt'aykachinku. Ichaqa Diospa k'arak phiñakuynintaqmi paykunaman chayamunña.
[17] Wawqe-panaykuna, pisi tiempollaraqmi ñoqaykuqa qankunamanta karunchasqa kashayku. Chaymi qankunaqa, mana rikuykuyta atiwankichischu. Chaywanpas, sonqoykupiqa qankunawanmi kashayku. Uyapura qankunawan tupaykuyta munasqaykuraykutaq, aswantaraq qankunata rikuykunaykupaq kallpachakushayku.
[18] Chaymi qankunaman hamuytaqa munasharqaykupuni. Ichaqa, Satanasmi hark'awarqanku. Ñoqa Pablotaqmi, qankunaman hamuyta yapa-yapamanta munasharqani.
[19] ¿Señorninchis Jesucristo hamuqtin, paypa ñawpaqenpi ñoqaykuq suyakuyniyku, otaq kusikuyniyku, otaq rimarikunaykupaq koronaykuri mayqentaq? ¿Manachu qankuna kankichis?
[20] Qankunaqa, ñoqaykuq rimarikunaykupaq, hinallataq kusikunaykupaqmi kankichis. Chayraykun qankunaman hamuytaqa munashaykupuni.