[1] Pablopiwan, Silvanopiwan, hinallataq Timoteopiwanmi Dios Yayanchispa, hinallataq Señor Jesucristoq Tesalónika llaqtapi kashaq iñiq t'aqaman napaykamuykiku.
[2] Dios Yayanchispa, hinallataq Señor Jesucristoq allinpaq qokuyninpas, thak kayninpas qankunawanpuni kachun.
[3] Wawqe-panaykuna, iñiyniykichispiqa anchatapunin wiñashasqankichis. Sapanka hukniykichispa, hinallataq llapallaykichispa munakuyniykichismi, hukkuna-hukkunapaq yapakushasqa. Chayraykun Diosman grasiastaqa, imaynan qonaykupuni, chay hinata qankunamanta grasiasta qoshallaykupuni.
[4] Sapa kuti qatiykachasuqtiykichispas, ñak'arichisuqtiykichispas qankunaqa pasiensiawan, hinallataq iñiywanmi ñawpaqllamanpuni purishankichis. Chayraykun, ñoqayku kikiykupuni, Diospa iñiq t'aqankunapi qankunamanta rimarikuyku.
[5] Chaypitaqmi Diosqa chaninninpi chaninchaqpuni kasqanta sut'inchan. Chay hinapin, Diospa qhapaq suyunpaq hinaqa kankichis. Chayraykutaqmi ñak'ariykunapipas kashankichis.
[6] Ñak'arichiqniykichiskunata kastigowan muchuchiy Diospa ñawpaqenpiqa allinpunin.
[7] Qankuna ñak'ariqkunamantaqmi ichaqa, ñoqaykuwan kuskata samakuyta qosunkichis. Chayqa, Señor Jesús atiyniyoq angelninkunawan hanaq pachamanta rikhurimuqtinmi kanqa.
[8] Paymi, yawrashaq ninapi hamuspa, Diosta mana reqsikuqkunamantapas, hinallataq Señorninchis Jesucristoq allin willakuyninta mana kasukuqkunamantapas bengakunqa.
[9] Chay runakunaqa, Señorpa qayllanmantapas, k'ancharishaq atiyninmantapas karunchasqan kanqaku. Hinallataq wiñaypaq wañuy ñak'ariywan kastigasqan kanqaku.
[10] Haqay p'unchaypi hamuspanmi paykunataqa kastiganqa. Qankunan ichaqa, ñoqaykuq willakusqaykuta kreerqankichis. Chayraykun, ñoqanchis t'aqasqankuna, Jesusta hatunchasunchis. Hinan llapanchis iñiqkunaqa, paymanta utirayasunchis.
[11] Chaymi qankunapaq Diosman parlashaykupuni. Chay hinapin, Diosninchisqa waqyasqankunata hinapuni ruwasunkichis. Hinan llapan khuyapayakuy ruwayta, hinallataq iñiypi ruwaytapas atiywan hunt'anqa.
[12] Chay hinapitaqmi, Señorninchis Jesupa sutinqa, qankunapi hatunchasqa kanqa. Diosninchispa, hinallataq Señor Jesucristoq allinpaq qokuyninman hinataqmi, qankunapas paypi hatunchasqallataq kankichis.