[1] Chay hinaqa, qankunamanta manaña llakikuyta atispaykutaqmi, sapallayña Atenas llaqtapi qhepakunaypaq rimanakurqayku.
[2] Hinaspan Cristoq allin willakuyninpi yanapaqniyku, hinallataq Diospa llank'aqnin wawqenchis Timoteota kachamurqayku. Takyachinasunkichispaqwan, iñiyniykichispi kallpachanasunkichispaqwanmi, paytaqa kachamurqayku.
[3] Chay hinaqa, ñak'arinaykupaq churasqa kasqaykutaqa qankuna kikiykichismi yachankichis. Chayrayku kay hina ñak'ariykunapi tarikuqtiykuqa, ama pipas llakikuchunchu.
[4] Qankunawan kashaspallaykuraqmi kay ñak'ariykuna pasanaykutaqa ñawpaqmantapacharaq willarqaykikuña. Hinan yachasqaykichis hinapas, chay hinapuni karqan.
[5] Chaymi qankunamanta llakikuyta manaña aswanta atipaspay, qankunaq iñiyniykichismanta yachanaypaq, Timoteota kachamurqani. Paqtan, imaynapipas wateqaqqa wateqashasunkichisman. Hinan llank'asqayku yanqapaq kanman.
[6] Kunantaq ichaqa, Timoteo qankunamanta ñoqaykuman kutimpun. Hinan payqa iñiyniykichispi allillanpuni kashasqaykichismantawan, munakuyniykichismantawan sumaqta willawanku. Hinallataq qankunaqa, munakuywantaqsí yuyarikuwankikupuni. Hinaspa imaynan ñoqaykupas rikuykuyta munashaykiku, chay hinallatataqsí qankunapas rikuykuytapuni munashawankiku.
[7] Chaymi wawqe-panaykuna, tukuy imaymana pisichikuyniykupipas, ñak'ariyniykupipas, qankunaq iñiyniykichiswan sonqochasqa karqayku.
[8] Hinallataqmi, Señorpi qaqa takyasqa kashasqaykichiswan kunanqa aswantaraq kawsariyku.
[9] Hinan Diosninchispa ñawpaqenpi, qankunamanta tukuypi kusisqa kasqaykurayku, mana imaynata Diosman grasias qoytapas atishaykuraqchu.
[10] Tuta-p'unchaymi qankuna kikiykichista rikuykunaykupaq, anchatapuni Diosmanta mañakushayku. Chay hinapin, iñiyniykichispi pisisqaraq kashasqaykichista hunt'apaykusaqku.
[11] Ichaqa, kikin Dios Yayanchis, hinallataq Señorninchis Jesucristopiwan qankunaman hamunaykupaq ñanniykupi pusarimuwachunku.
[12] Qankunataqa, Señorpunin wiñachisunkichis. Hinallataq hukkunahukkunapaqpas, llapapaqpas, imaynan ñoqayku munakuykiku, chay hinallatataq munakuyniykichistapas askhayachichun.
[13] Chay hinapin, Dios Yayanchispa qayllanpi sonqoykichisqa allin takyasqa kanqa. Hinallataq Señorninchis Jesucristo llapallan t'aqasqankunawan hamuqtinpas, mana imamanta huchachana ch'uyapuni kankichis.