[1] Chay hinaqa, wawqe-panaykuna, qankunaqa imaynatachus purinaykichistapas, hinallataq Diospa sonqonta kusichinaykichistapas ñoqaykumantan yachaqakurqankichis. Chay hinallataqmi qankunapas aswan-aswantaraq ñawpaqman purinaykichispaq, Señor Jesuspa sutinpi balikuykiku, hinallataq kallpanchaykiku.
[2] Señor Jesuspa chawpinta, ima kamachikuykunatachus qosqaykutaqa, ñan yachankichisña.
[3] Qankunaq ch'uyanchakunaykichistan Diosqa munan. Chayqa, qhellipi puriymanta t'aqakuymi.
[4] Sapanka hukniykichismi, kikiykichispa kuerpoykichista watakuspa, ch'uya kaypi, hinallataq allinpaq qhawarisqa kaypi kawsayta yachanaykichis.
[5] Amapunitaq mana Diosta reqsiq mana-judío runakuna hina, kuerpoykichispa mana allin munapayasqanwan aysachikuspachu kawsaychis.
[6] Amallataq pipas wawqenta imapipas sarunchachunchu, nitaq q'otuchunpaschu. Imaynan nirqaykikuña, hinallataq willarqaykikuña, chay hinapunin tukuy chaykunamanta bengakuqqa Señorpuni.
[7] Manan qhelli kawsaymanchu, aswanpas ch'uya kawsaymanmi Diosqa waqyawarqanchis.
[8] Chay hinaqa, chay kamachikuyta wikch'uyukuqqa, manan runatachu wikch'uyukun. Aswanpas Santo Espiritunta qowaqninchis Diostan wikch'uyukun.
[9] Hukkuna-hukkunawan munanakunaykichismantaqa, qankuna kikiykichismi Diosmanta yachakurqankichis. Chaymi wawqepanantin hinapuni munanakunaykichismanta qelqamunayqa mana nesesarioñachu karqan.
[10] Hinallataq Masedonia probinsiantinpi kashaq llapallan wawqe-pananchiskunawanpas chay hinatapunichá munanakushankichis. Ichaqa wawqe-panaykuna, chay hinata aswan-aswantaraq munanakunaykichispaqmi balikamuykiku.
[11] Hinallataq sumaq kawsakuyllatapuni munaychis. Imachus ruwanaykichiskunatapas ruwashallaychispuni. Imaynan kamachirqaykiku, chay hinatapuni llank'anaykichiskunatapas kikin makiykichiswanpuni llank'ashaychis.
[12] Chay hinapin, mana iñiqkunaq ñawpaqenpi puriyniykichisqa allillanpuni kanqa. Manataqmi imamantapas pisichikunkichischu.
[13] Wawqe-panaykuna, wakin mana suyakuyniyoqkuna hina, ama llakikushanaykichispaqmi, wañukapuqkunamantapas yachanaykichista munallaykutaq.
[14] Sichus Jesuspa wañusqantawan, kawsarimpusqantawan kreenchis chayqa, chay hinallatataqmi Diosqa, Jesuswan kuskallatataq paypi wañukapuqkunata apamunqa.
[15] Kaytaqa, Señorpa nisqantapunin niykiku: ‘Ñoqanchis, Señorpa hamunankama kawsashaqkunaqa, manapunin wañukapuqkunamantaqa ñawpasunchischu,’ nispayku.
[16] Kikin Señormi, kamachikuyniyoq kunkanwan, arkangelpa kunkanwan, hinallataq Diospa kornetanwan, hanaq pachamanta uraykamunqa. Hinan Cristopi wañukapuqkunaraq ñawpaqtaqa kawsarimpunqaku.
[17] Chaymantañan ñoqanchis kawsashaqkunapas, wayraq kasqanpi Señorwan tupamunanchispaq, paykunawan kuska phuyupi hoqarisqa kasunchis. Chay hinapin, Señorwan kuskallapuniña kapusunchis.
[18] Chayrayku hukkuna-hukkunawanpas chay simikunawan kallpachanakuychis.