[1] Patronkuna, qankunapas, hanaq pachapi huk Patronniykichis kashasqantaqa yachankichismi. Chayrayku kamachiykichiskunamanqa chaninllatapuni, hinallataq ruwasqanman hina pagapuychis.
[2] Ama sayk'uspa Diosman parlashallaychispuni. Diosman parlayniykichispitaq, grasiasta qospallapuni rikch'ashaychis.
[3] Chay hinaqa, punkuta Diospuni kicharipuwanankupaq mañapuwayku. Chay hinapin Diospa siminmanta rimarisaqku. Hinallataq Cristoq pakasqa yachayninta willanaykupaqpas mañapuwayku. Chay pakasqa yachayraykun preso kashani.
[4] Chay pakasqa yachay, imaynachus kasqanta, sut'itapuni rimarinaypaq mañapuwaychis.
[5] Ama tiempota usuchispaykichis, mana iñiq runakuna ukhupi yachayniyoq hinapuni puriychis.
[6] Rimakuyniykichisqa, kachiwan kachichasqa, ancha misk'i sumaqpuni kachun. Chay hinapin, sapanka hukman, imayna kutichinaykichista yachankichis.
[7] Imaynachus tarikusqaytaqa, munasqa wawqenchis Tikikoñan llapanta willasunkichis. Payqa, Diospa hunt'aq llank'aqninmi, hinallataq Señorpi kamachimasiymi.
[8] Hinan imaynachus tarikusqaykichista yachananpaq, hinallataq sonqoykichistapas kallpachaykunasunkichispaq qankunaman kachamushaykichis.
[9] Paytawan kuskan, Onesimotaqa kachamushaykichis. Payqa, qankunamanta hukniykichis, munasqa wawqe, hinallataq tukuypi hunt'aqpunin. Paykunan, imakunachus kaypi pasashasqanta llapanta willasunkichis.
[10] Presomasiy Aristarkon napaykamusunkichis. Bernabepa sobrinon Markospas napaykamullasunkichistaqmi. Sichus pay hamunqa chayqa, chaskiykullaychis. Chayta ruwanaykichispaq kamachikuykunataqa chaskirqankichisñan.
[11] Justo sutiwan sutichasqa Jesusmi napaykamullasunkichistaq. Paykunallan sirkunsidasqa kaqkunamanta, Diospa qhapaq suyunpi yanapawaqniykunaqa kanku. Paykunallataqmi sonqochaqniykunapas kanku.
[12] Qankunamanta hukniykichis Epafrasmi napaykamusunkichis. Payqa, Cristoq kamachinmi. Paymi, qankunarayku anchatapuni Diosman parlashan. Diospa tukuy munayninman hina, k'apak, hinallataq allin takyasqa kanaykichispaq Diosman parlashallanpuni.
[13] Payllataqmi anchatapuni qankunatapas, Laodisea llaqtapi kaqkunatapas, hinallataq Hierápolis llaqtapi kaqkunatapas wañukuywanraq yanapashasunkichis. Chaytan ñoqa sut'itapuni willaykichis.
[14] Munakusqay doctor Lukaspas, hinallataq Demaspas napaykamusunkichismi.
[15] Laodisea llaqtapi kashaq wawqe-panakunatapas, Ninfastapas hinallataq wasinpi kashaq iñiq t'aqatapas napaykapullawaychistaq.
[16] Qankunapurapi kay qelqata ñawinchaspaykichisqa, Laodisea llaqtapi kashaq iñiq t'aqapas ñawinchanankupaq apachinkichis. Hinallataq qankunapas Laodisea llaqtaman apachisqay qelqata ñawinchallankichistaq.
[17] Arkipota ninkichis: ‘Señormanta llank'ana chaskisqaykita hunt'anaykipaq allintapuni kuiday,’ nispaykichis.
[18] Ñoqa Pablon, makiywanpuni qelqaspa napaykamuykichis. Karselpi wisq'asqa kasqaymantataq, yuyarikullawaychispuni. Diospa allinpaq qokuynin qankunawanpuni kachun. Ahinapuni kachun.