[1] Pipas Jesusqa Cristo kasqanta kreeqqa, Diosmanta nasesqan. Hinallataq pipas churiyaqta munakuqqa, pichus churiyasqa kaqtapas munakullantaqmi.
[2] Diosta munakusqanchispi, hinallataq kamachikuyninkunata kasukusqanchispin, Diospa wawankunata munakusqanchistaqa yachanchis.
[3] Diosta munakuyninchisqa kaymi: Paypa kamachikuyninkunatan hunt'ananchis. Kamachikuyninkunaqa manataqmi sasachu.
[4] Pipas Diosmanta naseqqa kay pachatan atipan. Qankunaq iñiyniykichistaqmi kay pacha atipaytaqa qowanchis.
[5] ¿Pitaq kay pachata atipaqri? Pichus Jesusqa Diospa Churinpuni kasqanta iñiqmi.
[6] Ununta, hinallataq yawarninta hamuqqa Jesucriston. Manan unullantachu hamurqan, aswanpas ununta, hinallataq yawarnintan hamurqan. Espirituqa cheqaqmi, chayraykun, payllataq willakuqpas.
[7] Hanaq pachapi willakuqkunaqa kinsan kanku. Yaya, Simi, hinallataq Santo Espíritu. Chay kinsa willakuqkunataqmi huklla kanku.
[8] Chay hinallataqmi, hallp'a pachapi willakuqkunapas kinsallataq kanku. Espíritu, unu, hinallataq yawar. Chay kinsa willakuqkunataqmi tupachinku.
[9] Sichus runakunaq willakusqankuta chaskisunchis chayqa, Diospa willakuyninqa aswan allinraqmi. Payqa Churinmantan willakurqan. Diospa sut'inchayninqa chaymi.
[10] Pipas Diospa Churinpi iñiqqa, pay kikinpi willakuyniyoqmi kashan. Diosta mana kreeqtaqmi ichaqa, paypa Churinmanta willakuqpa willakusqanpi mana kreesqanrayku, Diostaqa llullaman tukuchin.
[11] Willakuyqa kaymi: Diosqa wiñay kawsaytan qowarqanchis. Chay kawsaytaqmi Churinpi kashan.
[12] Piqpa sonqonpichus Diospa Churin kashan chayqa, kawsayniyoqmi. Piqpa sonqonpichus Diospa Churin mana kanchu chayqa, manallataqmi kawsayniyoqchu.
[13] Diospa Churinpa sutinpi iñiqkuna, qankunamanmi chaykunata qelqamurqaykichis. Wiñay kawsayniyoq kasqaykichista yachanaykichispaq, hinallataq Diospa Churinpa sutinpi iñinaykichispaqmi qelqamurqaykichis.
[14] Diospa ñawpaqenpi sonqo churayninchisqa kaymi: Sichus munayninman hina imatapas mañakunchis chayqa, Diosqa uyariwanchismi.
[15] Imataña mañakuqtinchispas, Diospa uyariwasqanchistaqa yachanchismi. Chayraykun mañakusqanchiskuna kapuwasqanchistaqa yachanchis.
[16] Sichus pipas wawqenta mana wañunapaq huchata huchallikushaqta rikunqa chayqa, paypaqmi mañakunqa. Hinan Diosqa payman kawsayta qonqa. Chaytaqa, mana wañunapaq huchata huchallikuqkunamanmi nini. Wañunapaq huchaqa kanmi. Chay huchamantan ichaqa nini: ‘Amaña Diosmantaqa mañakuchunchu,’ nispay.
[17] Tukuy mana chanin kaqqa huchan. Ichaqa mana wañunapaq huchapas kanmi.
[18] Pikunachus Diosmanta naseqqa, manan huchallikushaspallapunichu kawsan. Aswanmi Diosmanta naseqqa, pay kikinta waqaychakun. Chaymi mana allin kaqqa payta mana imananpaschu. Chaytaqa yachanchismi.
[19] Diospa kasqanchistaqa yachanchismi. Hinallataq llapan kay pachapi kaqkuna mana allin kaqpa makinpi kasqantapas yachallanchistaqmi.
[20] Diospa Churin hamusqantapas yachanchismi. Cheqaq kaqta reqsinanchispaqtaqmi payqa yuyayta qowarqanchis. Hinan ñoqanchisqa cheqaq kaqpi, hinallataq Churin Jesucristopi kashanchis. Cheqaq Diosqa, hinallataq wiñay kawsaypas paypunin.
[21] Wawachaykuna, idolokunamanta waqaychakuychis. Ahinapuni kachun.