[1] Wawachaykuna, amaña huchallikunaykichispaqmi tukuy kaykunataqa qelqamuykichis. Sichus pipas huchallikun chayqa, Yayaq ñawpaqenpi, sayapakuqninchis chanin Jesucristoqa kapuwanchismi.
[2] Huchanchisrayku Diospa chaskinanpaq hina hunt'asqa pagoqa Jesucriston. Manataqmi ñoqanchispa huchanchiskunaraykullachu, aswanpas, kay pachapi llapa runakunaq huchankurayku pagopas payllataqmi.
[3] Jesucristoq kamachikuyninkunatachus kasukusunchis chayqa, chay kasukusqanchispin payta reqsisqanchistaqa yachanchis.
[4] Sichus pipas nin: ‘Ñoqaqa payta reqsinin,’ nispa, ichaqa kamachikuyninkunatataq mana kasukunmanchu chayqa, chay runaqa llullan. Cheqaq kaypas manan paypiqa kanchu.
[5] Ichaqa pipas siminta kasukuqpin, cheqaqtapuni Diospa munakuyninqa k'apakchasqa karqan. Chay hinapitaqmi Diospi kashasqanchistaqa yachanchis.
[6] Sichus pipas nin: ‘Ñoqaqa Jesucristopin takyani,’ nispa chayqa, imaynatachus Jesucristo kawsarqan, chay hinatapunin kawsanan.
[7] Wawqe-panallaykuna, manan huk mosoq kamachikuytachu qelqamuykichis. Aswanpas qallariymantapacha kapusqasunkichis ñawpa kamachikuytan qelqamuykichis. Chay ñawpa kamachikuyqa, qallariymantapacha ña uyarisqaykichis simin.
[8] Laqhatutaqa chinkaripushanñan. Cheqaq k'anchaytaqmi ichaqa, k'ancharimushanña. Chayraykun, wakmanta huk mosoq kamachikuyta qelqamuykichis. Chay kamachikuyqa Jesucristopipas, qankunapipas cheqaqpunitaqmi kanpas.
[9] Sichus pipas nin: ‘K'anchaypin kashani,’ nispa, ichaqa wawqentataq cheqnikushanmanraq chayqa, laqha-tutapiraqmi kashan.
[10] Pipas wawqenta munakuqqa, k'anchaypi takyasqan kashan. Manataqmi paypiqa ima misk'aypas kanchu.
[11] Pipas wawqenta cheqnikuqmi ichaqa, laqha-tutayaqpiraq kashan, hinallataq laqha-tutayaqpiraq purishan. Chay laqha-tutayaqtaqmi paypa ñawinta ñawsayachin. Chayraykun, maymanchus risqanta mana yachanchu.
[12] Wawachaykuna, Diosqa sutinraykun huchaykichiskunata pampacharqasunkichis. Chayraykun qankunaman qelqamuykichis.
[13] Tayta-mamakuna, qankunaqa qallariymantapacha kaq Diostan reqsinkichis. Chayraykun qankunamanqa qelqamuykichis. Wayna-sipaskuna, qankunaqa mana allin kaqtan atiparqankichis. Chayraykun qankunamanqa qelqamuykichis. Wawachaykuna, qankunaqa Yayatan reqsinkichis. Chayraykun qankunamanqa qelqamuykichis.
[14] Tayta-mamakuna, qankunaqa qallariymantapacha kaq Diostan reqsinkichis. Chayraykun qankunamanqa qelqamurqaykichis. Wayna-sipaskuna, qankunaqa kallpayoqmi kankichis. Hinallataqmi Diospa siminpas qankunapi takyan. Mana allin kaqtapas atiparqankichismi. Chaykunaraykun qankunamanqa qelqamurqaykichis.
[15] Kay pachataqa ama munapayaychischu. Nitaq kay pachapi kashaq imaymanakunatapas munapayaychischu. Sichus pipas kay pachata munapayan chayqa, Yayaq munakuyninmi mana paypichu kashan.
[16] Aycha kuerpoq millay munapayayninpas, ñawikunaq millay munapayayninpas, hinallataq kawsaypi yanqaqasinmanta hatunchakuypas kay pachamantan hamun. Tukuy kay pachapi kaqkunaqa, manan Yayamantachu hamun, aswanpas kay pachallamantan hamun.
[17] Kay pachapas, hinallataq kay pachaq munapayayninpas chinkaripushanmi. Diospa munayninta ruwaqmi ichaqa, wiñay-wiñaypaqpuni takyan.
[18] Wawachaykuna, p'uchukay tiempoñan kashan. Imaynan Cristoq kontranpi kaqpa hamunanmanta uyarirqankichis, chay hinallataqmi kunanpas, Cristoq kontranpi kaqkunaqa askha rikhurimurqanku. Chayraykun, p'uchukay tiempoña kasqantaqa yachanchis.
[19] Paykunaqa ñoqanchis ukhumantan lloqsirqanku, ichaqa manan ñoqanchismantachu karqanku. Sichus ñoqanchismanta kankuman karqan chayqa, ñoqanchiswanmi takyankuman karqan. Ichaqa llapanku mana ñoqanchismantachu kasqanku sut'i kananpaqmi lloqsirqanku.
[20] Qankunaqmi ichaqa, Santo Espírituq hawiynin kapusunkichis. Hinan tukuy imaymanakunatapas yachankichis.
[21] Manan cheqaq kaqta mana yachasqaykichisraykuchu qelqamurqaykichis. Aswanpas cheqaq kaqta yachasqaykichisrayku, hinallataq cheqaq kaqmanta mana ima llullakuypas lloqsimusqanraykun qelqamurqaykichis.
[22] ¿Pitaq llullakuqri? Pichus Jesusta Cristo kasqanta mananchaqmi. Payllataqmi Cristoq kontranpi kashan. Hinan Yayatapas, Churitapas mananchan.
[23] Llapan pikunachus Churita mananchaqkunapiqa, manallataqmi Yayapas paypi kanchu. Pichus Churimanta rimarin chayqa, Yayapas paypin kashan.
[24] Qallariymantapacha imachus uyarisqaykichis qankunapi takyachun. Sichus qallariymantapacha imachus uyarisqaykichis qankunapi takyanqa chayqa, Churipipas, Yayapipas takyallankichistaqmi.
[25] Hinallataq paypa prometewasqanchis promesanqa wiñay kawsaymi.
[26] Tukuy chaykunataqa q'otuqniykichiskunamantan qelqamurqaykichis.
[27] Diosmanta chaskisqaykichis hawiytaqmi ichaqa, qankunapi takyashan. Manataqmi piqpa yachachinasunkichistapas nesesitankichisñachu. Kasqan hawiytaqmi ichaqa, llapan imaymanakunatapas yachachisunkichis. Chay hawiyqa cheqaqpunin. Manataqmi paypiqa llullakuy kanchu. Imaynan yachachirqasunkichis, chayman hinapuni paypi takyaychis.
[28] Kunantaq wawachaykuna, Jesucristo rikhurimuqtin sonqo churayninchis allin takyasqa kananpaq, paypi takyaychis. Hinaspa pay hamuqtin, ñawpaqenpi ama p'enqakunanchispaq, paypi takyaychis.
[29] Sichus Jesucristo chanin kasqanta yachankichis chayqa, llapan chay chanin kaqta ruwashaqkunaqa Jesucristomanta nasemuqkunan kanku. Chaytapas yachaychis.