[1] Qhawariychis, may hatun munakuytan Yayaqa, ‘Diospa wawankuna,’ nispa sutiyasqa kananchispaq qowasqanchis. Kay pacha runakunaqa manan Yayata reqsirqankuchu. Chayraykun qankunatapas manallataq reqsisunkichischu.
[2] Munakusqaykuna, kunanqa Diospa wawankunañan kapunchis. Diosqa manan imaynachus kananchistaqa rikuchiwanchisraqchu. Ichaqa imaynachus Diosqa kasqanta rikusunchismi. Maypachachus Churi rikhurimuqtinmi, imaynachus payqa kasqanta rikusunchis, hinan payman rikch'ayniyoq kasunchis. Chaytaqa yachanchismi.
[3] Pikunachus Jesucristopi suyakuyniyoq kaqkunaqa, imaynan Jesucristopas ch'uyapuni, chay hinatan pay kikinta ch'uyanchakun.
[4] Huchaqa, Kamachikuy Simitan p'akin. Chaymi, pipas huchallikushallaqpuniqa Kamachikuy Simita p'akin.
[5] Jesucristoqa, huchanchiskunata qechunanpaqmi rikhurimurqan. Manataqmi paypiqa ima huchapas kanchu. Chaykunataqa yachankichismi.
[6] Pipas paypi takyaqqa, manan huchallikushallanpunichu. Pipas huchallikushallaqpunin ichaqa, mana Jesucristota rikurqanchu, nitaqmi reqsirqanpaschu.
[7] Wawachaykuna, amapuni piwanpas q'otuchikuychischu. Imaynan Jesucristoqa chaninpuni, chay hinallataqmi chanin kaqta ruwashallaqpuniqa, chaninpuni.
[8] Saqraqa qallariymantapachan huchallikun. Chayraykun pipas huchallikushallaqpuniqa, saqraq kapun. Saqraq ruwayninkunata thuninanpaqtaqmi Diospa Churinqa rikhurimurqan.
[9] Pipas Diosmanta nasesqa kaqpiqa, Diospa mirayninpas paypin takyan. Chayraykun manaqa huchallikushallanpunichu. Diosmanta nasesqa kasqanraykutaqmi, mana huchallikuyta atinchu.
[10] Pipas chanin kaqta mana ruwashallaqpuniqa, hinallataq wawqenta mana munakuqpas, manan Diospachu. Chaykunapin Diospa wawankunaqa, hinallataq saqraq wawankunapas reqsichikunku.
[11] Qallariymantapacha willakuy uyarisqaykichisqa kaymi: Hukkuna-hukkunawanmi munanakunanchis.
[12] Amapuni Kaín hinaqa kaychischu. Payqa mana allin kaqpa kasqanraykun wawqenta wañuchirqan. ¿Imaraykutaq wañuchirqanri? Paypa ruwayninkunaqa manan allinchu karqan. Wawqenpa ruwayninkunataqmi ichaqa, chanin karqan. Chayraykun paytaqa wañuchirqan.
[13] Wawqe-panallaykuna, sichus kay pacha runakuna cheqnikusunkichis chayqa, amapuni musphariychischu.
[14] Wañuymanta kawsayman chimpasqanchistaqa wawqe-panakunata munakusqanchispin yachanchis. Wawqenta mana munakuqqa, wañuypin takyashan.
[15] Pipas wawqenta cheqnikuqqa, runa wañuchiqmi. Hinallataq pi runa wañuchiqpipas wiñay kawsay manapuni takyasqantaqa yachankichismi.
[16] Jesucriston kawsayninta ñoqanchisrayku churarqan. Chaypin, imachus munakuy kasqantaqa reqsirqanchis. Chay hinallataqmi ñoqanchispas, kawsayninchista wawqe-pananchiskunarayku churananchis.
[17] Pillapas kay pachapi imaymana kaqniyoq kanmanmi. Hinallataq wawqenta pisichikuypi kashaqta rikushaspan, sonqonta wisq'aykuqpas kallanmantaqmi. Sichus chay hina kanman chayqa, ¿imaynataq Diospa munakuyninri paypi takyanman?
[18] Wawachaykuna, ama simillawanchu, nitaq rimayllawanchu munakusun. Aswanpas ruwaywan, hinallataq cheqaq kaywan munakusun.
[19] Kaypin cheqaqmanta kasqanchistaqa reqsinchis. Hinallataq sonqonchispi, sonqo churayninchispas paypa ñawpaqenpi kapuwasunchis.
[20] Sichus sonqonchis huchachawanchis chayqa, Diosqa sonqonchismantapas aswanraqmi. Payqa tukuy imaymanakunatapas reqsinmi.
[21] Munakusqaykuna, sichus sonqonchis mana huchachawanchischu chayqa, Diospa ñawpaqenpin sonqo churayninchis kapuwanchis.
[22] Ñoqanchisqa kamachikuyninkunatapas kasukunchismi. Hinallataq paypa ñawpaqenpiqa imaymana sumaq kaqkunatapas ruwanchismi. Chayraykun, imataña mañakuqtinchispas paymantaqa chaskisunchis.
[23] Kamachikuyninqa kaymi: Churin Jesucristoq sutinpin iñinanchis. Hinallataq imaynan kamachiwarqanchis chay hinatan, hukkuna-hukkunawan munanakunanchis.
[24] Hinallataqmi kamachikuyninkunata kasukuqqa Diospi takyan. Diostaqmi paypi takyan. Espiritunta qowasqanchispitaqmi, payqa ñoqanchispi takyasqanta yachanchis.