[1] Qallariymantapacha imachus kawsay Simiq kasqanmantan qelqamuykiku. Paymanta imatachus uyarisqaykuta, imatachus ñawiykuwan rikusqaykuta, imatachus yuyaywan allinta qhawasqaykuta, imatachus makiykuwan llamisqaykuta iman, qelqamuykiku.
[2] Kawsaytaqmi rikuchisqa karqan, hinan rikurqayku. Qankunamantaqmi, rikusqayku wiñay kawsayta sut'inchaykiku, hinallataq willaykikupas. Yayawanmi kawsayqa kasharqan. Paytaqmi kawsayta ñoqaykuman rikuchiwarqanku.
[3] Qankunapas ñoqaykuwan huk sonqolla kawsaypi kanaykichispaqmi, imachus rikusqaykuta, hinallataq imatachus uyarisqaykuta qankunaman willaykiku. Cheqaqtapunin huk sonqolla kawsayninchisqa Yayawan, hinallataq Churin Jesucristowan kashan.
[4] Chaykunataqa, kusikuyniyku hunt'asqa kananpaqmi qelqamuykiku.
[5] Jesucristomanta uyarisqayku willakuyqa kaymi: Diosqa k'anchaymi. Manataqmi paypiqa ima laqha-tutapas kanchu. Chaytataqmi willaykiku.
[6] Sichus nisunchis: ‘Dioswanmi huk sonqolla kawsaypi kashanchis,’ nispa, ichaqa laqha-tutayaqpitaq purishanchis chayqa, llullakushanchismi. Manataqmi cheqaq kaqtachu ruwashanchis.
[7] Ichaqa, sichus imaynan Diosqa k'anchaypi kashan, chay hinata k'anchaypi purisunchis chayqa, hukkuna-hukkunawanmi huk sonqolla kawsaypi kashanchis. Diospa Churin Jesucristoq yawarnintaqmi tukuy huchanchiskunata maylliwanchis.
[8] Sichus nisunchis: ‘Mana huchayoqmi kani,’ nispa chayqa, kikinchistan q'otukushanchis. Cheqaq kaytaqmi, mana ñoqanchispichu kashan.
[9] Sichus huchanchiskunata Diosman willakapusunchis chayqa, payqa pampachawananchispaq, hinallataq tukuy mana chanin kaymanta maylliwananchispaqpas hunt'aqpuni, chaninpunitaqmi kanpas.
[10] Ichaqa, sichus nisunchis: ‘Manan huchallikurqanichu,’ nispa chayqa, Diostan llullaman tukuchinchis. Siminpas manataqmi ñoqanchispichu kashan.