[1] Ñoqa kurak runan, akllasqa señoraman, hinallataq wawakunantinman qelqamuykichis. Ñoqaqa cheqaq kaqpin munakuykichis. Manan ñoqallachu, aswanpas llapan cheqaq kaqta reqsiqkunapas munakullasunkikutaqmi.
[2] Ñoqanchispi cheqaq kaq takyasqanrayku, hinallataq ñoqanchiswan wiñaypaq kasqanraykutaqmi, paykunaqa munakusunkiku.
[3] Dios Yayaq, hinallataq Yayaq Churin Señor Jesucristoq allinpaq qokuyninpas, yanapakuyninpas, thak kayninpas qankunawanpuni kachun. Chaykunaqa, cheqaq kaqpi, hinallataq munakuypi qankunawanpuni kachun.
[4] Yayamanta kamachikuyta chaskisqanchisman hinan, wakin wawaykikunata cheqaq kaqpi purishaqta tarirqani. Chaymi anchatapuni q'ochukurqani.
[5] Kunantaq señora, hukkunahukkunawan munanakunanchispaq balikuyki. Manan huk mosoq kamachikuytapas qelqamushaykiman hinachu. Aswanpas chay kamachikuyqa, qallariymantapacha kapuwasqanchis kamachikuymi.
[6] Munakuyqa kaymi: Kamachikuyninman hinan purinanchis. Kamachikuyqa kaymi: Imaynan qallariymantapacha uyarirqankichis, chayman hinan chay munakuypi purinaykichis.
[7] Askha q'otukuqkunan kay pachapi purishanku. Paykunaqa, aycha kuerpopi Jesucristoq hamusqantan mana rimarinkuchu. Chayta ruwaqkunaqa, q'otukuqkunan, hinallataq Cristoq kontranpi hatariqkunan kanku.
[8] Chay hinaqa, qankunapi llank'asqanchispa ruruyninta ama chinkachinanchispaq, aswanpas, hunt'asqa premiota chaskinanchispaq, qankuna kikiykichista allinta qhawakuychis.
[9] Pipas Kamachikuy Simita p'akin, hinallataq Cristoq yachachikuyninpipas mana allin takyasqachu kashan chayqa, Diosqa manan paypi kanchu. Cristoq yachachikuyninpi allin takyaqpin ichaqa, Yayapas, Churipas paypiqa kashan.
[10] Sichus pipas qankunaman hamunqa, manataq Cristoq yachachikuynintachu apamunqa chayqa, ama wasiykichispi chaskiychischu. Nitaq ‘Allin hamukuy,’ nispapas niychischu.
[11] Pipas chay mana allin yachachikuqta ninman: ‘¡Allin hamukuy!’ nispa chayqa, mana allin ruwayninkunatan ruwaysikun.
[12] Askha imaymanakunan qankunaman qelqamunaypaqqa kashan. Ichaqa papelpa, hinallataq tintaq chawpintapas manan willayta munarqanichu. Aswanpas, qankunaman hamuspay, uyauyapura rimaykuytan suyakushani. Chay hinapin kusikuyninchisqa hunt'asqa kanqa.
[13] Akllasqa ñañaykiq wawankunan napaykamusunkiku. Ahinapuni kachun.