[1] Munakusqaykuna, askha falso profetakunan kay pachantinpi purishanku. Chayrayku ama tukuy espiritukunata kreeychischu. Aswanpas, sichus espiritukuna Diosmanta kanku, chayta probaychis.
[2] Jesucristoqa, aycha runa kaypin hamurqan, nispa rimariq llapa espirituqa, Diosmantan hamun. Chaypitaqmi Diospa Espíritun kasqantaqa reqsinkichis.
[3] Hinallataq Jesucristoqa manan aycha runa kaypichu hamurqan, nispa rimariq llapa espirituqa, manan Diosmantachu hamun. Chay espirituqa Cristoq kontranpin kashan. Chay espírituq hamunanmantaqa uyarirqankichismi. Kunantaqmi payqa kay pachapiña kashan.
[4] Wawachaykuna, qankunaqa Diospan kankichis. Kay pachapi kaqmantaqa, qankunapi kashaqmi, aswan atiyniyoq. Chayraykun qankunaqa chay espiritukunata atiparqankichis.
[5] Paykunaqa, kay pachamantan kanku. Chayraykun kay pacha kaqmanta rimanku. Kay pacha runakunataqmi paykunata uyarinku.
[6] Ñoqanchisqa Diospan kanchis. Diosta reqsiqqa uyariwanchismi. Mana Diosta reqsiqtaqmi ichaqa, mana uyariwanchischu. Chaypin, cheqaq espiritutapas, pantachiq espiritutapas reqsinchis.
[7] Munakusqaykuna, munakuyqa Diosmantan hamun. Chayrayku hukkuna-hukkunawan munanakusun. Pipas munakuqqa Diosmanta naseqmi. Hinallataq Diostapas reqsinmi.
[8] Diosqa munakuymi. Pipas mana munakuqqa, Diostan mana reqsirqanchu.
[9] Chayraykun Diosqa, sapallan Churinta, paypa chawpinta kawsananchispaq, kay pachaman kachamurqan. Chaypin Diospa munakuyninqa ñoqanchispaq rikuchikurqan.
[10] Huchanchiskunamanta hunt'asqa pago kananpaqmi Diosqa Churinta kachamurqan. Manan ñoqanchis Diosta munakusqanchisraykuchu, aswanpas pay munakuwasqanchisraykun, Churintaqa kachamurqan. Munakuyqa chaymi.
[11] Munakusqaykuna, sichus Diosqa chay hinata munakuwarqanchis chayqa, ñoqanchispas chay hinallatataqmi hukkunahukkunawan munanakunanchis.
[12] Manan pipas hayk'aqpas Diostaqa rikurqanchu. Sichus hukkuna-hukkunawan munanakusunchis chayqa, Diosqa ñoqanchispin takyan. Munakuynintaqmi ñoqanchispi k'apakchasqa kashan.
[13] Diosqa Espirituntan qowarqanchis. Chaypin paypi takyasqanchista, hinallataq paypas ñoqanchispi takyasqanta yachanchis.
[14] Yayaqa Churintan kachamurqan. Payqa, kay pacha runa Qespichiqmi. Chaytan rikurqayku, chaytataqmi willaykupas.
[15] Pipas Jesusqa Diospa Churin kasqanta rimarin chayqa, Diosmi paypi takyan. Paypas Diospiqa takyallantaqmi.
[16] Ñoqanchistaqmi Diospa munakuynin ñoqanchispaq kasqanta reqsirqanchis, hinallataq kreerqanchispas. Diosqa munakuymi. Munakuypi takyaqqa, Diospin takyan. Diospas paypiqa takyallantaqmi.
[17] Imaynachus Jesusqa, chay hinan ñoqanchispas kay pachapi kanchis. Chayrayku, taripay p'unchaypi sonqo churayniyoq kananchispaqmi, Diospa munakuyninqa ñoqanchispi k'apakchasqa karqan.
[18] Munakuypiqa manan manchakuy kanchu. Aswanpas k'apak munakuymi manchakuytaqa hawaman qarqon. Manchakuyqa muchuchiytan apamun. Pipas manchakuqpiqa Diospa munakuyninmi manaraq k'apakchasqachu kashan.
[19] Diosmi ñawpaqta munakuwarqanchis. Chayraykun ñoqanchispas, payta munakunchis.
[20] Sichus pipas ninman: ‘Ñoqaqa Diosta munakunin,’ nispa, ichaqa wawqentataq cheqnikunman chayqa, llullan. Rikusqan wawqenta mana munakuqqa, ¿imaynatataq mana rikusqan Diostari munakuyta atinman?
[21] Diosmanta hamuq kay kamachikuyqa kapuwanchismi. Pipas Diosta munakuqqa, wawqentapas munakullachuntaq.