[1] Munakusqaykuna, kayqa qankunaman iskay kaq qelqa qelqamusqaymi. Iskaynin qelqapipas qankunata yuyarichinaypaqmi, llimphuy yuyayniykichistaqa rikch'arichiykichis.
[2] Diospa rantinpi rimaq t'aqasqa runakunaq ñawpaqtaña rimaykusqan simikunata yuyarichinaypaqmi qelqamuykichis. Hinallataq apostolniykichiskunaq chawpinta, Qespichikuq Señorpa kamachikuspa rimaykusqantawan yuyarichinaypaqmi qelqamuykichis.
[3] Kaytaraq ñawpaqtaqa yachaychis. Qhepa p'unchaykunapin asipayakuqkunaqa asipayaspa hamunqaku. Chay asipayakuqkunaqa, kikinkuq mana allin kaqta munapayayninkuman hina puriqkunan kanku.
[4] Chay asipayakuqkunaqa, ninqakutaqmi: ―Machulanchiskunaq wañukapusqanku p'unchaymantapachan, qallariymantapacha tukuy ima kamasqapas, iman kaqlla kashan. Chayrayku ¿maytaq ‘hamusaqmi,’ nispa prometisqanri? nispanku.
[5] Chay runakunaqa, ñawpa tiempopi hanaq pachapas, hinallataq hallp'a pachapas Diospa rimariyllanwan kamasqa kasqantan mana yachaq tukunku. Hinallataq unu chawpimanta hallp'a pachata hatarichimuspa unu chawpipi tiyaykuchisqantapas waktasqankutapunin mana yachaq tukunku.
[6] Chaykunaraykun, chay ñawpa tiempopi hallp'a pachapas unuq millp'usqan tukukapurqan.
[7] Ichaqa, kunan kashaq hanaq pachapas, hallp'a pachapas, kikin simillanwantaqmi, ninapaq waqaychasqa kashanku. Hinallataq mana Diosniyoq runakunaq chinkaripuynin taripay p'unchaykama waqaychasqa kashanku.
[8] Munakusqaykuna, kayta ichaqa amapuni qonqaychischu. Señorpa ñawpaqenpiqa, huk p'unchaymi waranqa watapas kanman hinapuni. Waranqa watataqmi, huk p'unchaypas kanman hinapuni.
[9] Wakinkunaqa, Señorpa prometisqanta tardachimunanpaqmi hap'inku. Señortaqmi ichaqa, mana chay hinatachu prometisqantaqa tardachimun. Aswanpas ñoqanchiswan pasiensiayoq kaspanmi, llapalla yuyayman kutirikunankuta munashan. Manataqmi piqpa chinkanantapas munanchu.
[10] Señorpa p'unchayninmi ichaqa, imaynan tutapi huk suwa hamun, chay hinata qonqaylla hamunqa. Hinaqtinmi hanaq pachaqa, pacha kunununuywan chinkaripunqa. Hinan chaypi kaqkunapas yawrarispa ruphapunqa. Hinallataqmi hallp'a pachapas lliw chaypi ruwasqakunapiwan ruphapunqa.
[11] Hinaqa, llapan kay imaymanakunapas ch'usaqyachisqan kanqa. Chay hinataq kanqa chayqa, ¿imaynataq ch'uya puriypi, hinallataq Dios sonqo kaypi manaqa kawsawaqchischu?
[12] Diospa hamunan p'unchayta makilla suyakushaychis. Chay p'unchaypin, hanaq pachapas yawrarispanraq ch'usaqyachisqa kanqa. Hinallataqmi chaypi kaqkunapas kanaykusqa kaspa chulluripunqa.
[13] Diospa prometiwasqanchisman hinaqa, maypichus chanin kaypa kasqan mosoq hanaq pachatawan, mosoq hallp'a pachatawanmi suyakushanchis.
[14] Chayraykun munakusqaykuna, qankunaqa tukuy chaykunata allin takyasqa suyakushankichis. Hinaqa, thak kaypi, mana qhelliyoqta, hinallataq mana imamantapas huchachanata, Señorpa tarinasunkichispaq allin yuyaywan kallpachakushallaychispuni.
[15] Señorninchispa pasiensiakuyninqa, qespikuypaq kasqanta entiendiychis. Chayllamantataqmi munasqa wawqenchis Pablopas, imayna yachaychus qosqa kasqanman hina, qelqamusqasuykichistawan entiendillaychistaq.
[16] Payqa, chaykunamantan llapan qelqankunapipas riman. Chaykunapin wakin imaymanakunanqa sasa entiendiy atina kashan. Chaytan mana yachaqkunapiwan, mana allin takyasqakunapiwan q'ewishanku. Chay hinallataqmi, kikinkuq wañuy ñak'ariyninkupaq wakin Qelqakunatapas q'ewishanku.
[17] Chay hinaqa munakusqaykuna, ñawpaqmantañan mana allin runakunaq q'otuspa pantachiynintaqa yachankichis. Chayrayku, takyasqa kashaspa, urmaykunaykichismanta kuidakuychis.
[18] Aswantaraqqa, allinpaq qokuypi, hinallataq Qespichikuq Señorninchis Jesucristota reqsiypiwan wiñaychis. Kunan, hinallataq wiñay-wiñaypaq yupaychaypas payllamanpuni kachun. Ahinapuni kachun.