[1] ด๊างพื่งวี่ ซีง-เอ้อ ก แบ ซ้ะ เกม๊า น ซื๊ง ซีงแฌ๊ แบฆ้ะ ดี๊ ท อ โก้ง อ โบ้ง อ บลึ้ อ บลาง พี่ กแช่ แยว้ เกล๊าง เอะ โพล้ง ทื๊ง ซยอง เท่อ ล จอง ล จอง ลู่ง มาเซโดนี อ ค่าง.
[2] ท น้ะ ท โน๊ง พี่ อ ซื๊ง เว๊ แบ แบ เว๊ ลองดุ้ อ ซ้ะ น้ะ มะ. แบ เด้าะ อ ซื๊ง เว๊ อ ซ้ะ มึ ดู มะ เทว๊ กลู เทว๊ จี้ แอ เต้~ๆ ทึ เมะ อ กแช่ แบ ซยาง แบ น้ะ ฌี้~ๆ.
[3] จ เก เอะ อ พีงนยาง ซี อ ซื๊ง เว๊ เทว๊ กลู เทว๊ จี้ ท๊อง อ เทว๊ เว๊ ซี ดี๊ เกล๊าง เว๊ แอ นี่ นอ ได้ะ. โพล้ง ล แคแน-อ้ะ น่าง แฌ้ แบ.
[4] อ ซื๊ง เว๊ อวีงซ้ะชู้ เฆ้อ แอ มะ พี่ อ ม แม้ช้า แบ กแช่ แยว้ อ พู อ ลี้ง ลู่ง ค่าง ยูเด้ง.
[5] อ ซื๊ง เว๊ แม้ แอ นี่ พี่ ก ช๊องมอง นอ ได้ะ. พี่ อ ล้างเปิ่ง ทึ นอ อ ซื๊ง เว๊ เกล๊าง ล้าง อ ซ้ะ ดี๊ กแช่ แยว้ ฌ้อง เกล๊าง ล้าง อ ซ้ะ ดี๊ เฆ้อ เด้าะ ท๊อง กแช่ แยว้ ลี้ ฌ้า-อ้ะ.
[6] ท บี่ นอ ก อวีงซ้ะชู้ ทีโต เกม๊า อ แม้ช้า น ซื๊ง กิ้ นี่ จี้ ดี๊ ท ซ้ะ โพล๊ นอ ท้อง อ ชิ้เทา บี่ ซุ้ อ เว๊ แม้ช้า เว๊ เย้า.
[7] น ซื๊ง โอ กู้ง โอ ล๊า กุ้ อ เม้ง เมะ เว๊ ท ชู่ง ท นะ ท ซี ท แบ พี่ ม โล้ ล้าง เท่อ ท ซีงแฌ๊ แน่ฌ๊า ท เฌาโละ แม้ช้า เท่อ ดี๊ ท เอ ท กวี้ง พี่ น เอ แบ เฆ้อ. ท บี่ นอ ลู่ง ท แม้ช้า อี้ง นอ เกม๊า น ซื๊ง เกล๊าง-อ้ะ ดี๊ ท ซ้ะ โพล๊.
[8] จ ไคล้ บี่ อี้ง ล เมะ จ อางแม้เลา น ซื๊ง แบ แบ เด้าะ จ เกม๊า น ซื๊ง ซีงแฌ๊ โพล้ง อ แฌ้แพ เฌาโละ แม้ช้า เท่อ บี่ จะ เล้ ฌ้อง จ ลองดุ้ น ซื๊ง ท เอ ท กวี้ง นอ เมะ โอ ดี๊ ท เซิง โต้ ซ้ะ ล้อง ชี่-อ้า.
[9] น ซื๊ง ซีงแฌ๊ ก กแช่ เยซู คริ้ อ โก้ง อ โบ้ง อ บลึ้ อ บลาง. ทึ เมะ อ เว๊ อ ท โอ ท ช๊อง เย้า ฌี้~ๆ อ เว๊ นย่อง เก ก้ะ โพล้ง ซยาง โพล้ง ยะ ลู่ง น ซื๊ง ฌ่าง บี่ ซุ้ น ซื๊ง ม เก โพล้ง ท โอ ท ช๊อง ลู่ง กแช่ เยซู คริ้ อ ท ซยาง ท ยะ นอ อ กย้อง.
[10] ท ล ไฌ่ โย้ ยี๊ จ ช๊องมอง บี่ อี้ง มฌี่ง ล เนง น ซื๊ง เก อ ต้องคู ล มู๊ง พี่ อ ช๊องมอง วี่ง ลู่ง ม แม้ช้า เท่อ ดี๊ เก อ ต้องคู ล มู๊ง พี่ อ เกล๊าง เท่อ นอ.
[11] ค๊องเนง อี้ง เกม๊า น แม้-อ้ะ ท้อง อ ฌ้อง เฌาโละ แม้ บี่ ซุ้ อ ต้องคู อู้ ท๊อง น ม แม้-อ้ะ ซี นอ.
[12] น ซื๊ง เมะ แบ ซ้ะ เกล๊าง เท่อ นอ กแช่ แยว้ ม ฮะ นี่ เว๊ ท๊อง ล แฌ้~ๆ อ เท่อ โอ นอ. เมะ ล โอ แบ นอ กแช่ แยว้ ล ไจ้ะ-อ้ะ แบ.
[13] จ ล แบ ซ้ะ เกม๊า น ซื๊ง แม้ เท่อ ฆ๊า ดี๊ เกม๊า โพล้ง อ แฌ้แพ แม้ เท่อ ฆวี๊ง นอ ล เมะ แบ แบ เด้าะ จ แบ ซ้ะ อ ฆ๊า อ ฆวี๊ง บี่ ซุ้~ๆ.
[14] พี่ น ซื๊ง เว๊ โอ แอ~ๆ ค๊องเนง อี้ง เกิ้ง น แม้ช้า โพล้ง พี่ อ เท่อ ล โอ แบ ฌ้อง น ซื๊ง เว๊ เมะ ล โอ แบ โคะ นอ อ ซื๊ง เว๊ ม แม้ช้า ไท้ น ซื๊ง. อ นอ คี๊ง โค๊ คี๊ง แพ้ ม นี่ แบ บี่ ซุ้~ๆ
[15] บี่ ซุ้ ไละ ฌี้ ไละ แอว้ โล้ เว้ เว๊ "โพล้ง พี่ อ อางเทิ๊ง นี่ เว๊ แอ นอ ล ล้างลื๊อ แบ. โพล้ง พี่ อ อางเทิ๊ง นี่ เว๊ แซย้ นอ ล ซ้ะวี่ง แบ".
[16] ก ไจ้ะ บลึ้ กแช่ แยว้ พี่ อ เกม๊า ทีโต แบ ซ้ะ แม้ช้า น ซื๊ง บี่ ซุ้ เฆ้อ ก แบ ซ้ะ แม้-อ้ะ ปะ.
[17] พี่ ก อางท่าง ทีโต นอ อ เว๊ อืงล้าง เว๊. อ เว๊ เก โพล้ง พี่ อ แบ ซ้ะ แม้ช้า เท่อ เต้~ๆ. ท บี่ นอ อ เว๊ ลี้ โอ น ซื๊ง ลู่ง อ กแช่ อ ซ้ะ แด เว๊ ล้อ.
[18] ก เกม๊า ด๊างพื่งวี่ ล แฌ้ ลี้ ดี๊-อ้ะ. ด๊างพื่งวี่ ล แฌ้ อี้ง โพล้ง ทื๊ง ซยอง เท่อ ล จอง ล จอง อางปฆ้า อ ท แม้ ลู่ง อ โล้ ล้าง ท ฌี้ อ ไฌ่.
[19] ล เมะ ฆวี๊ นอ แบ โพล้ง ทื๊ง ซยอง เท่อ อางกี ล้าง โพล้ง ล แฌ้ อี้ง เกม๊า เก ก ฌุ้พาง ลี้ ซกุ้ เท่อ ดี๊ เฆ้อ พี่ ก ลี้ โชะ ดี๊ จี้ ท แม้ช้า. อ เว๊ ม แม้ช้า เฆ้อ ลู่ง ท แม้ อี้ง พี่ ม แม้ ฆี๊ง แม้ แล้ กแช่ เยซู คริ้ ดี๊ เนโพล ทาง ลู่ง ก เฌาโละ แม้ช้า เท่อ.
[20] ก แบ ปโล่ ล้าง ก ซ้ะ เมะ ฌี้ พี่ โพล้ง ม ไจ้ะ เฆ้อ ล ซี น่าง แฌ้ แบ แบฆ้ะ ดี๊ ก แฌแซ จี้ พี่ โพล้ง เทว๊ เว๊ ดี๊ ท ซ้ะ โพล๊ อี้ง นอ บี่ จะ เล้.
[21] อ ไฌ่ บี่ อี้ง ก อางกี ล้าง ซ้ะ ก ม เก โพล้ง โต้ โพล้ง ล้อง ล เมะ ที่ กแช่ แยว้ อ เมะแซ พ้า แบ แบ เด้าะ ลู่ง โพล้ง อ เมะแซ พ้า ปะ.
[22] ก โซ๊ง ด๊างพื่งวี่ ล แฌ้ เด้าะ ลี้ ดี๊ อ ซื๊ง เว๊ คี๊ง แฌ้ นอ. ก ลองดุ้ อ ซ้ะ ตบลึ้ พ๊า เย้า. ก แด-อ้ะ อ เว๊ เก โพล้ง เฌาโละ ไพ้ะ เฌาโละ แม้ เท่อ ตบลึ้ เม้ง ดี๊ ค๊องเนง อี้ง อ เว๊ เฌาโละ แม้ช้า เท่อ แอ นี่ อ ล่าง ได้ะ เมะ เว๊ อางกี ล้าง อ ซ้ะ ดี๊ น ซื๊ง ซี แอ เต้~ๆ.
[23] เมะ ทีโต นอ เก โพล้ง แม้ ซกุ้ เท่อ ดี๊ แย้ ดี๊ เก โพล้ง แม้ช้า แย้ พี่ จ แม้ เท่อ ลู่ง น ซื๊ง ฌ่าง. เมะ ด๊างพื่งวี่ คี๊ง แฌ้ พี่ อ ลี้ ดี๊-อ้ะ นอ เก โพล้ง แม้ คิ้ เอะ โพล้ง ทื๊ง ซยอง เท่อ ล จอง~ๆ อ เท่อ เก ท แม้ ฆี๊ง แม้ แล้ กแช่ เยซู คริ้.
[24] เกม๊า น ซื๊ง ท เอ ท กวี้ง โพล ทาง ดี๊ อ ซื๊ง เว๊ ไช้ะ บี่ ซุ้ โพล้ง ทื๊ง ซยอง เท่อ กุ้ จอง ม ซีงแฌ๊ เว๊ ฌ้อง ม ซีงแฌ๊-อ้ะ พี่ ก อางปฆ้า น ซื๊ง นอ แบ เย้า.