[1] พี่ ก แม้ ซกุ้ เท่อ ดี๊ กแช่ แยว้ นอ ก อวีงซ้ะชู้ น ซื๊ง เกม๊า กแช่ แยว้ อ โก้ง อ โบ้ง อ บลึ้ อ บลาง พี่ น นี่ แบ-อ้ะ นอ เลา ไฆวะ โปล้~ๆ ล ฌี้.
[2] อ ไฌ่ บี่ อี้ง กแช่ แยว้ ไจ้ะ เว๊ "ลู่ง อ ช๊า อ โท่ แบ เมาะ จ คุ้ช๊องแน น ซื๊ง ลู่ง มื่ง นี้ง พี่ จ แม้ พ้อง พลิ้ เท่อ จ แม้ช้า น ซื๊ง". ค๊องเนง อี้ง เก อ ช๊า อ โท่ พี่ กแช่ แยว้ แม้ช้า เท่อ เก มื่ง นี้ง พี่ กแช่ แยว้ แม้ พ้อง พลิ้ เท่อ.
[3] ก ล แบ ซ้ะ เกม๊า โพล้ง ไจ้ะ เฆ้อ ลู่ง ก ท ไพ้ะ ท แม้ อ กย้อง น่าง เม้ง แบ. ท บี่ นอ ก เฌา แม้ เท่อ พี่ ล ไทะทะ โพล้ง น่าง แฌ้ แบ.
[4] แบ เด้าะ ก แม้ ท กุ้ อ เม้ง เกม๊า โพล้ง แด เว๊ เฆ้อ ก เก โพล้ง แม้ กแช่ แยว้ อ เท่อ ลู่ง ก นย่อง ล้าง ก ซ้ะ โก้ง ท น้ะ ท โน๊ง ท แก ท เฌ้ ดี๊ โอ ลู่ง ท กไทะ กเทา พ้า.
[5] ก แบ พลี แบ ท่าง ก แบซุ้ แบจ้า ดี๊ โพล้ง เคิ่ง เฆ้อ โนย้ง เฆ้อ ก แบ แม้ เท่อ น้ะ ก แบ โก้ง มี๊ง โก้ง เว่ ดี๊ โก้ง อาง โก้ง โอ้.
[6] ก เก โพล้ง ฌี้ โพล้ง แอว้ โอ ดี๊ ท ซีงแฌ๊ แน่ฌ๊า ท เอ้า เซิง เอ้า ซ้ะ ท เซิง ช้า ซ้ะ ช้า. ก โอ ดี๊ วีง ฌี้ แล้ แอว้ ดี๊ ท เอ ท กวี้ง เต้~ๆ
[7] โอ ดี๊ ท โล้ ล้าง ลู่ง อ ที๊ง อ โต้ โอ ดี๊ กแช่ แยว้ อ ซยื๊ง อ ซย้อง. ก แม้ นี่ ท แบ กแช่ แยว้ อ ซ้ะ นอ เก ท ด้างทะ ซ้ะ ดี๊ เก พ้าง พี่ ก ม ดึ้ เท่อ.
[8] ก แบ ท อางปฆ้า ดี๊ ก แบ ท ดึ้เดว. ก เม้ง ลื้อ แซ ท้อง ดี๊ โพล้ง ไจ้ะ อ้า ไจ้ะ ซ๊าง เฆ้อ. โพล้ง ไจ้ะ เฆ้อ ก เก โพล้ง อางโล๊ อางเว้ง เท่อ แบ เด้าะ ก เก โพล้ง โต้ โพล้ง ล้อง.
[9] โพล้ง แม้ อ ซ้ะ บี่ ซุ้ ล ซีงแฌ๊ เฆ้อ แบ แบ เด้าะ โพล้ง ซีงแฌ๊ เฆ้อ กุ้ อ แฌ้. ก เบ้า ม ซี๊ง เย้า แบ เด้าะ ก โอ ได้ะ. ก แบ ท แม้ เตา แม้ แต๊ น้ะ เต้~ๆ แบ เด้าะ ก ล ซี๊ง ได้ะ แบ.
[10] ก ซ้ะ เฌ๊ฌ้อง แบ เด้าะ ก ซ้ะอวีง ซ้ะโทะ เท่อ ครึ~ๆ. ก เก โพล้ง ซยาง โพล้ง ยะ แบ เด้าะ ก เกม๊า โพล้ง แอ ฌ้อง อ ท โอ ทาง ช๊อง ทาง ลู่ง เซิง ลู่ง ซ้ะ ล โค๊. ก เท่อ ล โอ น่าง เม้ง แบ แบ เด้าะ ก เท่อ โอ กุ้ อ เม้ง.
[11] ด๊างพื่งวี่ โคเรง ซีง-เอ้อ ก ไคล้ ดี๊ น ซื๊ง ล้อง~ๆ ล้อ. ก อุ้ ทาง ก ซ้ะ ฮะ นี่ น ซื๊ง.
[12] ก ล แม้ ไบ้ะ ซ้ะ ดี๊ น ซื๊ง แบ แบ เด้าะ น ซื๊ง ล้อ แม้ ไบ้ะ ซ้ะ ดี๊ เฆ้อ.
[13] พี่ จ ไคล้ ดี๊ น ซื๊ง บี่ อี้ง นอ จ ทื๊ง-อ้ะ ลู่ง น ซื๊ง เก จ พู จ ลี้ง เกม๊า น ซื๊ง อุ้ ทาง ช๊า น ซ้ะ ไช้ะ.
[14] พลึ้ น ซ้ะ ดี๊ โพล้ง ล แบ้ แยว้ แบ นอ ล ฌี้ อ ไฌ่ บี่ อี้ง ท อ แบ ดี๊ ท อ แม โอ ฆึ โละ อ ซ้ะ ม ซี บี่ จะ เล้. ท พ้าง ดี๊ ท ไค้ะ โอ ฆึ โละ อ ซ้ะ ม ซี บี่ จะ เล้.
[15] กแช่ เยซู คริ้ ดี๊ ม้างโค้ไล่ นอ โพะ โละ อ ไค๊ ล ซี แบ เฆาะ. โพล้ง แบ้ แยว้ ดี๊ โพล้ง ล แบ้ แยว้ แบ อ ท ช๊องมอง ลี้ ฆึ โละ อ ซ้ะ ล ซี แบ.
[16] กแช่ แยว้ อ เว่งฮ๊าง โอ ฆึ โละ อ ซ้ะ ดี๊ ท เค่ง ท ฌ้าง ล ซี แบ อ ไฌ่ บี่ อี้ง ก เก กแช่ แยว้ พี่ อ โอ ม๊า ล แฌ้ นอ อ เว่งฮ๊าง บี่ ซุ้ กแช่ แยว้ ไจ้ะ เว๊ แด "จ ม โอ ลู่ง อ ซื๊ง เว๊ อ ซุ้ จ ม ไจ ลู่ง อ ซื๊ง เว๊ อ แกล้ จ ม เก อ ซื๊ง เว๊ อ กแช่ แยว้ ดี๊ อ ซื๊ง เว๊ ม เก จ พู จ ลี้ง".
[17] ท บี่ นอ กแช่ แยว้ ไจ้ะ เว๊ "น แบ ไจ ทาง ไฆวะ ลู่ง โพล้ง ล แพ นอ อ แกล้ ดี๊ ไจ พ้ะ แด ไฆวะ อ ซื๊ง เว๊. แม้ แบฆ้ะ ล้าง น ซ้ะ ดี๊ ท ล เช๊ง ล เกล้ง แบ นอ ล ฌี้ ฌ้อง จ ม ฮะ นี่ น ซื๊ง.
[18] จ ม เก บี่ ซุ้ น ซื๊ง แพ่ ดี๊ น ซื๊ง ม เก จ พูมืง พูแคว๊. กแช่ แยว้ พี่ อ โอ ดี๊ อ ซยื๊ง อ ซย้อง อ ดู้ง อ ยาง กุ้ อ เม้ง ไจ้ะ เว๊ บี่ นอ".