[1] ทึ เมะ จ ล กลุ้ แบ ฌี้~ๆ เกม๊า น ซื๊ง เอ้า ซ้ะ ดี๊ แย้ ไช้ะ. จ ช๊องมอง น ซื๊ง เอ้า-อ้ะ เย้า.
[2] จ~แบคู่ เท่อ ลู่ง น ซื๊ง ฌ่าง เต้~ๆ บี่ ซุ้ กแช่ แยว้ นอ ปะ ล้อ. จ เกม๊า น ซื๊ง เก โพล้ง โต้~โพล้ง ล้อง เมาน่าง ดี๊ กแช่ เยซู คริ้ บี่ ซุ้ กมืง เก โพล้ง โต้ โพล้ง ล้อง ดี๊ กแคว๊ พี่ อ เว๊ เอิ้งล้าง ม ทาง แซย่ ดี๊-อ้ะ ดี๊ เก โพล้ง มืงน้าง ลู่ง อ ฌี้ ท้อง ล นี้ง พี่ ม ทาง แซย่.
[3] จ ไค๊ไก้ะ เท่อ พี่ อ เก ทาง ดี๊ น่าง ฮาวา นอ ม เก ทาง ดี๊ น ซื๊ง ปะ. ฌู่ง นอ แซย๊ อางโล๊ นี่ น่าง ฮาวา เกม๊า อ แม้ ท เด้บ้ะ. บี่ นอ อ ซุ้ น ท ช๊องมอง ช๊องม้ะ ม แบ ท อางโล๊ นี่ ซี ฌ้อง น ซื๊ง ล เก โพล้ง โต้ โพล้ง ล้อง เมาน่าง ดี๊ กแช่ เยซู คริ้ ล้า แบ.
[4] อ ไฌ่ บี่ อี้ง โพล้ง ลู่ง อ ซอง กแช่ เยซู คริ้ อ ไฌะ อ ไฌ่ พี่ ล แบ โละ อ ซ้ะ ดี๊ ก ซอง-อ้ะ แบ นอ น ซื๊ง ช๊องแน-อ้ะ ฌี้ ทึ. น ซื๊ง ฮะ นี่ ท อ วีง อ แล้ พี่ ล บี่ ซุ้ วีง ฌี้ แล้ แอว้ ลู่ง น ฮะ นี่-อ้ะ ดี๊ เฆ้อ นอ แบ ดี๊ น ซื๊ง ฮะ นี่ ท ฌี้ อ ไฌ่ พี่ อ ล้างช๊าง ดี๊ ก โล้ ล้าง-อ้ะ.
[5] จ ซีงแฌ๊ จ ฌี้ ที๊ ซุ้ ดี๊ โพล้ง ล เอ้า นอ พี่ น ซื๊ง ช๊องมอง-อ้ะ เก ท อ เพล่ ดู ลู่ง อ ดู ทึ ล มู๊ง นอ.
[6] ทึ เมะ จ ไคล้ ล เอะ ซี แบ ฌี้~ๆ แบ เด้าะ จ ท ซีงแฌ๊ แน่ฌ๊า โอ ได้ะ. จ เกม๊า น ซื๊ง ซีงแฌ๊ อ อี้ง ล้างที๊ง ครึ~ๆ ลู่ง ท กุ้ อ เม้ง.
[7] จ โล้ ล้าง ท ฌี้ อ ไฌ่ เฌ๊ เว๊ ลู่ง กแช่ แยว้ อ โอ อ นอ จ ล ไคะ กลู ไคะ จี้ แบ. จ ชาง ล้าง จ ซ้ะ บี่ ซุ้ จ ม อางกี ทาง โท๊ น ซื๊ง นอ เมะ จ แม้ ไพ้ะ เท่อ โบ่.
[8] พี่ จ แม้ เท่อ ลู่ง น ซื๊ง แกล้ นอ จ นี่ แบ จี้ ท แม้ช้า ดี๊ โพล้ง ทื๊ง ซยอง เท่อ ลู่ง อ แฌ้แพ. อ อี้ง นอ ที๊ ซุ้ ดี๊ จ ตมละ อ ซื๊ง เว๊ พี่ ม แม้ช้า น ซื๊ง.
[9] พี่ ล ว๊าง แย๊ จ โอ ดี๊ น ซื๊ง ดี๊ จ จี้ ล โอ ล้า แบ นอ จ ล แม้ แก เซิง แก ซ้ะ น ซื๊ง แบ. ด๊างพื่งวี่ พี่ อ โอ ลู่ง มาเซโดนี อ ค่าง เฌ๊ นอ เกล๊าง เอะ จ เท่อ กุ้ อ เม้ง พี่ จ แบ ซ้ะ-อ้ะ. ลู่ง อ พ้อง ไฆวะ เมะ ฌี้ ท๊อง อี้ง จู่ง แย๊ เมะ ฌี้ จ ล แม้ แก เซิง แก ซ้ะ น ซื๊ง น่าง เม้ง แบ.
[10] พี่ จ โล้ บี่ อี้ง เก ท อ เมะ อ โต้ บี่ ซุ้ กแช่ เยซู คริ้ โล้ เว๊ ครึ~ๆ. โพล้ง ล โอ น่าง แฌ้ แบ ลู่ง เฆ้ง ค่าง อาคายา พ้า อี้ง พี่ ม แม้ ไทะทะ จ ท อางปฆ้า ล้าง จ ซ้ะ อี้ง ซี.
[11] แบ ท ล้อ จ ไคล้ เท่อ บี่ อี้ง เมะ จ ล เอ น ซื๊ง แบ-อ้า. กแช่ แยว้ ซีงแฌ๊ เว๊ ลู่ง จ เอ น ซื๊ง เต้~ๆ ล้อ.
[12] พี่ จ ล แม้ นี่ น ซื๊ง จี้ แบ นอ จ ม แม้ บี่ นอ ครึ~ๆ บี่ ซุ้ โพล้ง ลู่ง อ เก ท อ เพล่ ดู กไบล้ะ กแบล ล แพ นอ ม อางปฆ้า ล้าง อ ซ้ะ ล ซี แบ พี่ ม ไจ้ะ เว๊ อ ท ไพ้ะ ท แม้ บี่ ซุ้ ดี๊ ก ท ไพ้ะ ท แม้.
[13] โพล้ง ล แพ นอ แม้ อ ซ้ะ บี่ ซุ้ เก กแช่ เยซู คริ้ อ เพล่ ดู แบ เด้าะ เก โพล้ง แม้ เท่อ พู พี่ อ กไบล้ะ กแบล ดี๊ ล โต้ ล ล้อง ดี๊ กแช่ เยซู คริ้ แบ.
[14] ท แม้ บี่ อี้ง นอ ล ล้าง ล้ะ เซิง ล้ะ ซ้ะ น่าง เม้ง แบ. ทึ เมะ ม้างโค้ไล่ ฌี้~ๆ แม้ อ ซ้ะ เก ท มุ้คู พู ลู่ง อ โฌ่ง อ พ้าง ซี ปะ ล้อ.
[15] ท บี่ นอ โย๊~ๆ ล้อ พี่ อ เพล่ อ บาง ม แม้ อ ซ้ะ บี่ ซุ้ เก ท เมะ ท โต้ อ เพล่ อ บาง. ลู่ง ไค๊ ทึ อ ซื๊ง เว๊ ม นี่ แบ เท่อ ลู่ง อ เกิ้ง ดี๊ อ ท ไพ้ะ ท แม้.
[16] จ ม ไคล้ ก้ะ ล พ๊า เด้าะ เกม๊า โพล้ง แคว่ แย้ บี่ ซุ้ เก โพล้ง เฌ๊ฌ้อง น่าง แฌ้ ล ฌี้. แบ เด้าะ น ซื๊ง เมะ แคว่ แย้ บี่ นอ เกม๊า น นย่อง ฮะ นี่ แย้ เก โพล้ง เฌ๊ฌ้อง แด เทา บี่ ซุ้ จ ม อางปฆ้า ล้าง จ ซ้ะ ซี ล น้าง.
[17] พี่ จ ไคล้ เท่อ บี่ อี้ง นอ ล เมะ กแช่ เยซู คริ้ เกม๊า จ ไคล้ แบ. แบฆ้ะ ดี๊ ท ไฌ่ อางปฆ้า ล้าง จ ซ้ะ นอ จ ไคล้ บี่ ซุ้ จ เก โพล้ง เฌ๊ฌ้อง.
[18] แบ เด้าะ เป๊งนี่ โพล้ง แอ แฌ้ อางปฆ้า ล้าง อ ซ้ะ บี่ ซุ้ กโพล้ง ฌางคู โคล๊ง คู แย้ จ ม แม้ บี่ นอ ปะ.
[19] น ซื๊ง เว๊ เก โพล้ง ไพ่ โพล้ง แซย๊. ท บี่ นอ น ซื๊ง เอ้า ซ้ะ ดี๊ โพล้ง เฌ๊ฌ้อง ล แพ นอ.
[20] น ซื๊ง เอ้า ซ้ะ ดี๊ โพล้ง แฌ้ ฌี้ แฌ้ ฌี้ พี่ อ เจ่ น ซื๊ง บี่ ซุ้ เก ท อ ฆ่อง ดี๊ โพล้ง พี่ อ แม้ นี่ น ซื๊ง บี่ ซุ้ น เก ท อ แช ดี๊ โพล้ง พี่ อ อางโล๊ พอง นี่ น ซื๊ง ดี๊ โพล้ง พี่ อ ชีอูงพู๊ อ ซ้ะ ดี๊ โพล้ง พี่ อ ดึ้เดว น ซื๊ง.
[21] จ ฌางแช้ พี่ จ แบ ไคล้ บี่ อี้ง ก แม้ เท่อ บี่ นอ ล เบิง แบ เฆาะ. จ ม ไคล้ บี่ ซุ้ จ เก โพล้ง เฌ๊ฌ้อง. โพล้ง แฌ้ ฌี้ แฌ้ ฌี้ เมะ อางปฆ้า ล้าง อ ซ้ะ ล เม้ง~ๆ เบิง นอ แย้ จ ม อางปฆ้า ล้าง จ ซ้ะ เบิง บี่ นอ ปะ ล้อ.
[22] อ ซื๊ง เว๊ เก โพล้ง ฮีบรู โบ่. แย้ จ เก ปะ. อ ซื๊ง เว๊ เก โพล้ง อี้งซลาเอง โบ่. แย้ จ เก ปะ. อ ซื๊ง เว๊ เก อาบราฮาง อ ชื้อ อ ชะ โบ่. แย้ จ เก ปะ.
[23] อ ซื๊ง เว๊ เก กแช่ เยซู คริ้ อ เพล่ อ บาง โบ่. แย้ จ เก ฌี้ นี่-อ้ะ ได้ะ. อ อี้ง จ ไคล้ บี่ ซุ้ โพล้ง พลื่ง. จ แม้ เท่อ ฆ๊า นี่ อ ซื๊ง เว๊ ได้ะ. จ โอ พ้อง พ้า แอ นี่ อ ซื๊ง เว๊ ได้ะ. จ แบ ท พลี ท ท่าง พะ ไฆวะ พ้อง ไฆวะ แอ นี่ อ ซื๊ง เว๊ ได้ะ. จ เบ้า ม ซี๊ง ตบลึ้ พ๊า.
[24] โพล้ง ยู พลี แย้ เย่ พ๊า ล พ๊า~ๆ ซ๊า ชี๊ง ควี๊ง ทีง.
[25] โพล้ง โรมา ท่าง แย้ ดี๊ นางคืง ซ๊า พ๊า. โอ ล พ๊า โพล้ง เฌา ไควะ ซี๊ง แย้ ดี๊ โล่ง. กบ้าง~ที๊ง เทะพะ นี่ แย้ ซ๊า พ๊า. โอ ล พ๊า จ โอ ลู่ง เซง พื๊ง คู ลู่ง ปางเล พ้า นี่ ล นี้ง ดี๊ ล แน้.
[26] จ แบ ลี้ เท่อ ครึ~ๆ. จ แบ จโคะ ท ล้าง ซ้ะเม ลู่ง ที๊ง ดู ล้าง ลู่ง โพล้ง ตมละ เท่อ ลู่ง โพล้ง พี่ อ เก ยู บี่ ซุ้ แย้ ดี๊ โพล้ง ล เมะ เก ยู แบ. จ แบ จโคะ ท ล้าง ซ้ะเม ลู่ง เว่ง พ้า ดี๊ มแล แกล้ ลู่ง ปางเล พ้า ลู่ง ด๊างพื่งวี่ พี่ ล โต้ ล ล้อง แบ อ แกล้.
[27] จ แม้ เท่อ ฆ๊า แม้ เท่อ น้ะ ดี๊ ท ไปว้ะ น่าง ไปว้ะ ซ้ะ. จ โก้ง มี๊ง โก้ง เว่ แอ พ๊า. จ ซู๊ อาง ซู๊ โอ้ ซ้ะ เท่อ. จ โก้ง อาง มี้ แอ พ๊า. จ ไช๊ จ ช้าง ล โอ แบ. จ โท่ง ท ฌ่อง.
[28] ล เมะ ที่ ท ล แพ อี้ง แบ. ท อ แฌ้แพ โอ ได้ะ พี่ เก จ ท อวีง ท ยุ้ กุ้ มื่ง นี้ง เมะ เว๊ จ แบคู่ ซ้ะอึ้ เท่อ แบฆ้ะ ดี๊ โพล้ง ทื๊ง ซยอง เท่อ กุ้ จอง อ ฌ่าง.
[29] โพล้ง พี่ ล แฌ้ เล้ เมะ โอ ดี๊ อ ไฌ่ แช่ แบ้ แช่ นอ แย้ จ ไฌ่ แช่ แบ้ แช่ ปะ. โพล้ง พี่ ล แฌ้ เล้ เมะ ล้างเทะ ท เด้บ้ะ พ้า นอ จ แบคู่ ซ้ะอึ้ เท่อ น้ะ มะ.
[30] จ เมะ แบ อางปฆ้า ล้าง จ ซ้ะ นอ จ ม อางปฆ้า ล้าง จ ซ้ะ แบฆ้ะ ดี๊ เท่อ พี่ อ เนโพล เว๊ ลู่ง จ เก โพล้ง ไฌ่ แช่ แบ้ แช่.
[31] กแช่ แยว้ พี่ อ เก กแช่ เยซู คริ้ อ แพ่ ซีงแฌ๊ เว๊ จ ล คีงอูง เท่อ แบ. เกม๊า ก ไจ้ะ บลึ้-อ้ะ ครึ~ๆ.
[32] พี่ จ โอ ลู่ง เว่ง ดามากา นอ โพล้ง พี่ จ๊าวแพเดง อาเรตา อางกี ล้าง เว๊ อ ยู่แคว่ เท่อ ล แฌ้ นอ เกม๊า โพล้ง โอ คุ้ เว่ง อ เกล้ ป้ะตู๊ง บี่ ซุ้ ม พอง นี่ แย้
[33] แบ เด้าะ จ ฌุ้พาง ชวี๊ง ล้าง แย้ ลู่ง ตโฆะ พ้า ฌ้อง เช้ ล้าง แย้ ลู่ง กางแป อ เช้า พ้า. ท บี่ นอ จ พ้อง พลิ้ ไฆวะ ดี๊-อ้ะ ซี.