[1] พี่ ก กวิ้ บี่ อี้ง นอ ก อางปฆ้า ล้าง ก ซ้ะ โบ่. ก แบ โชะ ดี๊ ไละ อางโล๊ ไท้ แบฆ้ะ ดี๊ เฆ้อ พี่ ก เก โพล้ง โล้ ล้าง เท่อ เมาน่าง บี่ ซุ้ โพล้ง แบ แฌ้~ๆ นอ โบ่. ก แบ ซ้ะ เกม๊า น ซื๊ง กวิ้ ไละ แบฆ้ะ ดี๊ เฆ้อ บี่ อี้ง ชี่ โบ่.
[2] น ซื๊ง นอ ล้อ บี่ ซุ้ ก ไละ พี่ อ แบ ท กวิ้ ล้าง ลู่ง ก ซ้ะ พ้า. โพล้ง กุ้ อ แฌ้ พ้ะ แบ เว๊ ดี๊ ซีงแฌ๊ เว๊.
[3] ก ซีงแฌ๊ ล้างที๊ง กแช่ เยซู คริ้ ล้อ เก โพล้ง กวิ้ ไละ ล เบง อี้ง เกม๊า ก โซ๊ง-อ้ะ ล เมะ กวิ้ เว๊ ดี๊ ตซีง ที๊ง ลู่ง โล่ง ปางเป คู แบ แบ เด้าะ กวิ้ เว๊ ดี๊ กแช่ แยว้ ลู่ง อ โอ ม๊า ล แฌ้ นอ อ วีง ฌี้ แล้ แอว้ ดี๊ กวิ้ เว๊ ลู่ง กโพล้ง อ ซ้ะ พ้า.
[4] ก อางกี ล้าง ซ้ะ ดี๊ กแช่ แยว้ ลู่ง กแช่ เยซู คริ้ อ กย้อง บี่ นอ.
[5] ท ล โอ ดี๊ เฆ้อ น่าง เม้ง แบ พี่ ม เกม๊า ก ไจ้ะ ล้าง ซ้ะ ก โอ ดี๊ ท ซี ท แบ แด เว๊. กแช่ แยว้ ล้อ เกล๊าง เอะ ก ท ซี ท แบ ลู่ง ก ม แม้ เท่อ อ ฌ่าง.
[6] อ เว๊ เกล๊าง เอะ ก ท ซี ท แบ ลู่ง ก ม แม้ เท่อ แบฆ้ะ ดี๊ ท เอิ้งล้าง อ ซ๊าง อ ฌ่าง ลู่ง อ โอ ฆึ ดี๊ ท อางแม้เลา พี่ อ แบ ท กวิ้ ล้าง เว๊ นอ ล เมะ แบ แบ เด้าะ โอ ฆึ ดี๊ วีง ฌี้ แล้ แอว้. อ ไฌ่ บี่ อี้ง ท อางแม้เลา พี่ อ แบ ท กวิ้ ล้าง เว้ เว๊ นอ เฌ๊ โชะ ท ซี๊ง แบ เด้าะ วีง ฌี้ แล้ แอว้ เฌ๊ โชะ ท ม๊า.
[7] ท อางแม้เลา อ ไละเมะ แบ ท แพล้ นี่-อ้ะ ลู่ง โล่ง ปางเป อ คู. ล พ๊า แย๊ นอ กแช่ แยว้ อ ฆี๊ง อ แล้ อ โฌ่ง อ พ้าง โพล ทาง. ทึ เมะ อ โฌ่ง อ พ้าง ลู่ง โมเซ อ เมะ ล้อง ล้างแม่ ไฆวะ ล น้าง ฌี้~ๆ แบ เด้าะ พ้าง ชอง เต้~ๆ ได้ะ ท้อง โพล้ง อี้งซลาเอง แคว่ เว๊ อ เมะ ไยะ~ๆ ล เบิง แบ.
[8] ท อางแม้เลา พี่ อ เฌ๊ โชะ ท ซี๊ง เมะ เฌ๊ ดี๊ อ ฆี๊ง อ แล้ อ โฌ่ง อ พ้าง บี่ อี้ง นอ ท เอิ้งล้าง อ ซ๊าง พี่ อ เฌ๊ ดี๊ วีง ฌี้ แล้ แอว้ นอ อ ฆี๊ง อ แล้ แอ นี่ อ นอ ตบลึ้ โทะ ได้ะ.
[9] ท อางแม้เลา พี่ อ เฌ๊ โชะ ท แม้ เตา แม้ แต๊ นอ อ ฆี๊ง อ แล้ เมะ โอ ท ฌี้ อ ไฌ่ พี่ อ เฌ๊ โชะ ท พ้อง ท พลิ้ นอ อ ฆี๊ง อ แล้ แบ โอ แอ นี่ อ นอ ตบลึ้ โทะ ได้ะ.
[10] อ ไฌ่ บี่ อี้ง ท อ ฆี๊ง อ แล้ พี่ อ โอ ลี้ง นอ ล โอ ล้า แบ เมะ เว๊ ท อ ฆี๊ง อ แล้ พี่ อ โอ ค๊องเนง อี้ง แอ นี่-อ้ะ ตบลึ้ โทะ.
[11] เท่อ ลู่ง อ โอ ล ชู่ ล ล่าง เมะ โอ ดี๊ อ ฆี๊ง อ แล้ นอ เท่อ ลู่ง อ โอ ล้างชู้ ล้างแกย นอ อ ฆี๊ง อ แล้ ม โอ แอ นี่ นอ ได้ะ.
[12] ก ไคล้ เบิง เต้~ๆ พี่ ก ท มื้งแล่ โอ บี่ อี้ง.
[13] ก ล บี่ ซุ้ โมเซ แบ พี่ อ คลึไบ้ะ อ เมะ ดี๊ ตไก้ยะ ล เกม๊า โพล้ง อี้งซลาเอง แด อ โฌ่ง อ พ้าง ล้างแซย้ ดี๊ ล้างแม่ ไฆวะ นอ แบ.
[14] อ ซื๊ง เว๊ แน ล ซี แบ เฆาะ. ท้อง ค๊องเนง อี้ง พี่ อ ซื๊ง เว๊ พ้ะ แบ ไละ ท เอิ้งล้าง คางไท้ะ ล เบง~ๆ นอ ตไก้ยะ ล เบง ฆ่าง นอ ล อุ้ ทาง อ ซ้ะ ได้ะ แบ. กแช่ เยซู คริ้ ล แฌ้ ล้อ แม้ ไฆวะ-อ้ะ ซี.
[15] ทึ เมะ กุ้ มื่ง นี้ง อี้ง ฌี้~ๆ พี่ ล พ๊า เล้ ลู่ง โพล้ง อี้งซลาเอง พ้ะ โมเซ อ ท อางแม้เลา ตไก้ยะ นอ คลึไบ้ะ อ เซิง อ ซ้ะ ได้ะ.
[16] แบ เด้าะ พ๊า ฌี้ พ๊า ฌี้ พี่ โพล้ง เฌ๊ ฌู กแช่ เยซู คริ้ นอ ตไก้ยะ แบ ท แม้ ไฆวะ-อ้ะ.
[17] อ ไฌ่ บี่ อี้ง กแช่ ดู พี่ โพล้ง เฌ๊ ฌู-อ้ะ ซี ล แฌ้ นอ เก วีง ฌี้ แล้ แอว้. กแช่ เยซู คริ้ อ วีง ฌี้ แล้ แอว้ โอ พี่ จอง เล้ นอ ท พ้อง ท พลิ้ โอ พี่ นอ ล้อ.
[18] แบ เด้าะ ก เว๊ กุ้ อ แฌ้ พี่ อ ตไก้ยะ คลึไบ้ะ เมะ ล โอ ล้า แบ นอ ก แด กแช่ เยซู คริ้ อ โฌ่ง อ พ้าง ดี๊ ก แบ ท เปลง ไฆวะ ท้อง ก ม ล้างโฌ่-อ้ะ. ก นี่ ท ฆี๊ง ท แล้ แอ ทาง แอ ทาง เฌ๊ เว๊ ลู่ง กแช่ เยซู คริ้ พี่ อ เก วีง ฌี้ แล้ แอว้.