[1] ก ล้อง ก ย่าง เก บี่ ซุ้ เด้า พี่ ก โอ-อ้ะ ลู่ง ฌางคู โคล๊ง คู อ แค๊ อี้ง. ก ซีงแฌ๊-อ้ะ พี่ อ แบ ท กูง ไฆวะ นอ กแช่ แยว้ แม้ เว้ เอะ ก เด้า ลู่ง มุ้คู เย้า พี่ อ โอ ล้างชู้ ล้างแกย.
[2] พี่ ก โอ ลู่ง เด้า ฌางคู โคล๊ง คู อี้ง ได้ะ นอ ก แซ วี๊ง แซ ซยู. ก แบ ซ้ะ เกม๊า เด้า พี่ อ เฌ๊ เว๊ ลู่ง มุ้คู คลึไบ้ะ เฆ้อ
[3] บี่ ซุ้ ก เมะ โอ-อ้ะ นอ ก ล โอ โบลงโกง ล้า แบ.
[4] เฆ้อ พี่ ก โอ ลู่ง เด้า ฌางคู โคล๊ง คู อี้ง ได้ะ นอ ก แซ วี๊ง แซ ซยู ลู่ง ท น้ะ ท โน๊ง อ กย้อง. ล เมะ ก แบ ซ้ะ โอ โปล้~ๆ แบ แบ เด้าะ ก แบ ซ้ะ เค่งฌ้าง พี่ อ เฌ๊ เว๊ ลู่ง มุ้คู บี่ ซุ้ ท ม๊า ล้างชู้ ล้างแกย ม เปลง ไฆวะ ก ล้อง ก ย่าง พี่ อ ซี๊ง ซี นอ.
[5] กแช่ แยว้ ล้อ ไต้ เฆ้อ ลู่ง ท เปลง ไฆวะ อี้ง อ ฌ่าง ดี๊ เกล๊าง เอะ เฆ้อ อ วีง ฌี้ แล้ แอว้ เก ท เกล๊าง เว้ ล น้าง พี่ อ อางกี เว้ เอะ เฆ้อ.
[6] ท บี่ นอ ก ซ้ะ ค๊า ครึ~ๆ. ก ซีงแฌ๊-อ้ะ พี่ ก โอ ลู่ง ก ล้อง ก ย่าง อี้ง ก โอ ไย้ ดี๊ กแช่ เยซู คริ้ อ เด้า อ ล่าง.
[7] ทึ เมะ ก ล แด-อ้ะ แบ ฌี้~ๆ ก อางกี ล้าง ซ้ะ ดี๊-อ้ะ ปะ.
[8] ก โอ ดี๊ ก เซิง เฌิ่ง ซ้ะ ค๊า ดี๊ ก แบ ซ้ะ ลี้ โอ ดี๊ กแช่ เยซู คริ้ แอ นี่ โอ ดี๊ ล้องย่าง ได้ะ.
[9] ท บี่ นอ ก เมะ โอ ลู่ง ล้องย่าง ฌี้ ล โอ แบ ฌี้ ก อางกี ล้าง ซ้ะ ม แม้ เท่อ ลู่ง อ แบ กแช่ แยว้ อ ซ้ะ ล้อ.
[10] อ ไฌ่ บี่ อี้ง เฆ้อ กุ้ อ แฌ้ ก แบ ลี้ ลู่ง กแช่ เยซู คริ้ พี่ อ เก โพล้ง ต้ะเซ๊ง เท่อ ล แฌ้ นอ อ เมะแซ พ้า บี่ ซุ้ กุ้ อ แฌ้ ม นี่ แบ เท่อ พี่ อ เกิ้ง ดี๊ อ ท แม้ ลู่ง ฌางคู โคล๊ง คู อี้ง นอ เมะ ฌี้-อ้า ล ฌี้ แบ-อ้า.
[11] ก ซีงแฌ๊ ฌี้ เย้า ท ดู้ง แบ ยาง แบ กแช่ แยว้ นอ แม้ อ ซ้ะ บี่ จะ เล้. ท บี่ นอ ก เฌาโละ อางจ้ะ นี่ โพล้ง กุ้ อ แฌ้. กแช่ แยว้ ซีงแฌ๊ ฌูง เฆ้อ กุ้ อ เม้ง ดี๊ จ มื้งแล่-อ้ะ น ซื๊ง ซีงแฌ๊ แย้ ล้างที๊ง บี่ นอ ปะ.
[12] อ อี้ง ล เมะ ก อางปฆ้า ล้าง ซ้ะ ดี๊ น ซื๊ง ล พ๊า เด้าะ แบ แบ เด้าะ เก อ ซูง อ แซ พี่ น ซื๊ง ม เฆว๊ ซ้ะ ดี๊ เฆ้อ ซี บี่ ซุ้ น ซื๊ง ม ไคล้ ช๊า โพล้ง ล แพ นอ ซี พี่ อ อางปฆ้า เท่อ ลู่ง อ โพล ทาง แบ เด้าะ ล อางปฆ้า เท่อ ลู่ง เซิง พ้า ซ้ะ พ้า แบ.
[13] ก พลื่ง ทาง โบ่ อ นอ เมะ เว๊ ลู่ง กแช่ แยว้ อ ฌ่าง. เต้~ๆ นอ ก โอ ฌี้~ๆ ล้อ อ นอ เมะ ลู่ง น ซื๊ง ฌ่าง.
[14] พี่ ก แม้ ซ้ะ บี่ อี้ง นอ เมะ เว๊ กแช่ เยซู คริ้ อ ท เอ ท กวี้ง ยู่แคว่ เฆ้อ. ก ซีงแฌ๊ เมาน่าง โพล้ง ล แฌ้ ล้อ ซี๊ง ลู่ง โพล้ง กุ้ แฌ้ อ ฌ่าง. อ กย้อง บี่ นอ โพล้ง กุ้ อ แฌ้ บี่ ซุ้ ซี๊ง เว๊ เย้า.
[15] กแช่ เยซู คริ้ ซี๊ง ลู่ง โพล้ง กุ้ แฌ้ อ ฌ่าง บี่ ซุ้ โพล้ง พี่ อ โอ ม๊า ได้ะ นอ ล โอ ม๊า ลู่ง อ กแช่ อ ฌ่าง พ้า ล้า แบ แบ เด้าะ ม โอ ลู่ง กแช่ เยซู คริ้ อ ฌ่าง พี่ อ ซี๊ง ม๊า ทาง ไท้ ลู่ง โพล้ง กุ้ แฌ้ อ ฌ่าง.
[16] ท บี่ นอ ท๊อง อี้ง จู่ง แย๊ ก ล ต้ะเซ๊ง โพล้ง ดี๊ โพล้ง ฌางคู โคล๊ง คู อ ท ช๊องมอง น่าง แฌ้ ล้า แบ. ทึ เมะ ลู่ง อ พ้อง ไฆวะ ก ต้ะเซ๊ง กแช่ เยซู คริ้ ดี๊ ฌางคู โคล๊ง คู อ ท ช๊องมอง ฌี้~ๆ แบ เด้าะ ค๊องเนง อี้ง ก ล แม้ บี่ นอ ล้า แบ.
[17] โพล้ง พี่ ล แฌ้ เล้ ลู่ง อ ชู่ง ไท้ นะ ไท้ กแช่ เยซู คริ้ นอ อ เว๊ เก ทาง ก้ะ โพล้ง อ ซ๊าง. ท ล่างลี้ง ล่างล้อง ล้างแม่ ไฆวะ เย้า ท อ ซ๊าง โอ ทาง ก้ะ ล้อ.
[18] ท กุ้ อ เม้ง อี้ง เฌ๊ เว๊ ลู่ง กแช่ แยว้ อ โอ พี่ อ เกม๊า ก แบ โละ ไท้ ซ้ะ ดี๊-อ้ะ ลู่ง กแช่ เยซู คริ้ อ กย้อง ดี๊ อางกี ล้าง เอะ ก ท แม้ ลู่ง ก ม แม้ช้า โพล้ง อ แฌ้แพ แบ โละ ไท้ ซ้ะ ดี๊-อ้ะ ปะ
[19] เมะ เว๊ กแช่ แยว้ เกม๊า โพล้ง ฌางคู โคล๊ง คู อี้ง แบ โละ ไท้ อ ซ้ะ ดี๊-อ้ะ ลู่ง กแช่ เยซู คริ้ อ กย้อง ล ทื๊ง นี่ โพล้ง ล แพ นอ อ ท ไพ้ะ ท แม แบ ดี๊ อางกี ล้าง เอะ เฆ้อ เกม๊า ก โล้ ล้าง เท่อ แบฆ้ะ ดี๊ โพล้ง ม แบ โละ ไท้ ซ้ะ ดี๊-อ้ะ บี่ จะ เล้.
[20] ท บี่ นอ ก เก โพล้ง ไคล้ คิ้ กแช่ เยซู คริ้. พี่ ก ไคล้ เท่อ นอ เก กแช่ แยว้ ล้อ อวีงซ้ะชู้ น ซื๊ง. ลู่ง กแช่ เยซู คริ้ อ เม้ง นอ ก อวีงซ้ะชู้ น ซื๊ง เกม๊า น แบ โละ ไท้ ซ้ะ ดี๊ กแช่ แยว้.
[21] กแช่ เยซู คริ้ อ ท เด้บ้ะ ล โอ แบ แบ เด้าะ กแช่ แยว้ แม้ เอะ-อ้ะ แบ ด้อง อ เก โพล้ง ท เด้บ้ะ บี่ ซุ้ ก ม เก โพล้ง แบ กแช่ แยว้ อ ซ้ะ ลู่ง กแช่ เยซู คริ้ อ ซุ้.