[1] ด๊างพื่งวี่ พี่ จ เอ-อ้ะ ซีง-เอ้อ พี่ กแช่ แยว้ อ ท เอิ้งล้าง โอ ดี๊ เฆ้อ บี่ อี้ง นอ เกม๊า ก แม้ เช๊ง แม้ เกล้ง ก ซ้ะ พ้อง ไฆวะ ดี๊ ท อ้า ท ซ๊าง กุ้ อ เม้ง ลู่ง อ แม้ แบ อ้า ก ล้อง ก ย่าง ก เซิง ก ซ้ะ ดี๊ เกม๊า ก ฌี้ ทาง แอว้ ทาง เมาน่าง ลู่ง ก ดู้ง แบ ยาง แบ กแช่ แยว้.
[2] เนโพล ทาง น ซื๊ง ท เอ ท กวี้ง เอะ เฆ้อ ไช้ะ. ก ล แม้ ไพ้ะ แม้ แม แบ โพล้ง น่าง แฌ้ แบ ก ล แม้ เฌ๊ฌ้อง โพล้ง น่าง แฌ้ แบ ก ล อางโล๊ นี่ โพล้ง อ เท่อ น่าง แฌ้ แบ.
[3] จ ไคล้ บี่ อี้ง นอ ล เมะ จ ไคล้ ชางบ้า น ซื๊ง แบ. บี่ ซุ้ จ โล้ เอะ น ซื๊ง เย้า ก เอ น ซื๊ง แอ เต้~ๆ. ทึ เมะ ซี๊ง ฌี้ ม๊า ฌี้ ก ม โอ ซกุ้ โละ ซ้ะ ครึ~ๆ.
[4] จ อางกี ล้าง ซ้ะ ดี๊ น ซื๊ง เต้~ๆ ดี๊ จ เฆว๊ ซ้ะ ดี๊ น ซื๊ง เต้~ๆ. ทึ เมะ จ แบ โท่ง ท น้ะ เม้ง ฌี้ เม้ง ฌี้ นอ จ ซ้ะ ชอง ฌี้ มะ ดี๊ จ ซ้ะอวีง ซ้ะโทะ ครึ~ๆ.
[5] พี่ ก เฌ๊ ท้อง มาเซโดนี อ ค่าง เย้า นอ ก ล นี่ โอ ไปว้ะ โอ แซ แบ. ท แก ท เฌ้ โอ วะ ก ฆ้อง ลู่ง ค๊อง โค๊ โอ ดี๊ ท ติ้ โละ ไอ โละ ลู่ง แย๊ โค๊ โอ ดี๊ ท ซ้ะเม ซ้ะไพล้.
[6] แบ เด้าะ โพล้ง พี่ อ ซ้ะ ล้างท่อง นอ กแช่ แยว้ แม้ ชอง ทาง เอะ-อ้ะ ดี๊ แม้ ชอง ทาง เอะ ก ซ้ะ ปะ พี่ ทีโต เฌ๊ ฌู เฆ้อ.
[7] ล เมะ ที่ ทีโต เฌ๊ ล เม้ง แบ พี่ อ เกม๊า ก ซ้ะ มึ ทาง นอ แบ เด้าะ ลู่ง น ซื๊ง ไคล้ ชอง ทาง อ ซ้ะ ปะ. อ เว๊ โล้ แบ แย้ ไจ้ะ เว๊ น ซื๊ง ย้า แบ แย้ น ซ้ะ เฌ๊ฌ้อง ดี๊ น ซู๊ โอ ซ้ะ ล แพ้ ฆ่าง ดี๊ แย้. ท บี่ นอ ค๊องเนง อี้ง จ เซิง มึ ซ้ะ มึ แอ เด้าะ.
[8] อ ไฌ่ บี่ อี้ง ทึ เมะ จ ไละ ล เบง อู้ นอ เกม๊า น ซื๊ง ซ้ะ เฌ๊ฌ้อง ฌี้~ๆ ยี๊ จ ซ้ะ ล เฌ๊ฌ้อง แบ. ลู่ง อ ซ๊างคู แบ ซีง ลู่ง จ~ซ้ะ ม เฌ๊ฌ้อง ล น้าง พี่ จ แด-อ้ะ ไละ ล เบง นอ เกม๊า น ซื๊ง ซ้ะ เฌ๊ฌ้อง ล ชู่ ล ล่าง.
[9] แบ เด้าะ ค๊องเนง อี้ง จ เซิง มึ ซ้ะ มึ ล เมะ ลู่ง น ซื๊ง ซ้ะ เฌ๊ฌ้อง แบ แบ เด้าะ ซ้ะ เฌ๊ฌ้อง นอ เกม๊า น ซื๊ง เปลง ไท้ ซ้ะ. อ ไฌ่ บี่ อี้ง น ซื๊ง ซ้ะ เฌ๊ฌ้อง นอ กแช่ แยว้ เจ่-อ้ะ เก เท่อ ลู่ง อ ล้างเปิ่ง. ท บี่ นอ จ ไละ ล เบง อู้ นอ ล แม้ เฌ๊ฌ้อง น ซื๊ง ท ชู่ง ท นะ น่าง เม้ง แบ.
[10] ซ้ะ เฌ๊ฌ้อง พี่ อ แบ กแช่ แยว้ อ ซ้ะ นอ เกม๊า ก เปลง ไท้ ซ้ะ อ ซ๊าง ดี๊ ลี้ ฌ้า เฆ้อ ลู่ง ท พ้อง ท พลิ้ อ นอ ก ซ้ะ ล เฌ๊ฌ้อง แบ. แบ เด้าะ ซ้ะ เฌ๊ฌ้อง ลู่ง ฌางคู โคล๊ง คู ล โค๊ นอ ลี้ ฌ้า โพล้ง ลู่ง ท ซี๊ง ล้อ.
[11] ช๊องมอง ดุ้ แฆว่ ท ซ้ะ เฌ๊ฌ้อง พี่ อ แบ กแช่ แยว้ อ ซ้ะ นอ เปลง น ซ้ะ บี่ จะ เล้ เมะ เว๊ เกม๊า น ซื๊ง เฌาโละ เนโพล ทาง น ซ้ะ ลู่ง น ล ไพ้ะ แบ ดี๊ เกม๊า น ซื๊ง ซ้ะทาง ลู่ง ท เก ทาง นอ อ กย้อง ดี๊ เกม๊า น ซื๊ง แบคู่ ท เม้ง เล้ ม กึ ทาง เด้าะ ดี๊ เกม๊า น ซื๊ง ย้า แบ แย้ ดี๊ เกม๊า น ซื๊ง เฌาโละ ไคล้ พ้อง แย้ ดี๊ แม้ เตา แม้ แต๊ โพล้ง พี่ อ แม้ เท่อ ไพ้ะ. ลู่ง ท กุ้ อ เม้ง ล แพ อี้ง นอ น ซื๊ง เนโพล ทาง น ซ้ะ ลู่ง น ล ไพ้ะ แบ.
[12] พี่ จ กวิ้ เอะ น ซื๊ง ไละ ล เบง อู้ ล เมะ จ แด ที่ โพล้ง แม้ ไพ้ะ เท่อ ดี๊ โพล้ง พี่ อ แบ ท แม้ ไพ้ะ-อ้ะ นอ แบ แบ เด้าะ จ กวิ้-อ้ะ บี่ ซุ้ ลู่ง กแช่ แยว้ อ เมะแซ พ้า นอ น ซื๊ง ม ซีงแฌ๊ ล้างที๊ง น ซื๊ง เอ เฆ้อ ดู มะ.
[13] ลู่ง อ กย้อง บี่ นอ ก โอ ดี๊ ท เซิง ชอง ซ้ะ ชอง ล เมะ ที่ ท เซิง ชอง ซ้ะ ชอง ล เม้ง แบ แบ เด้าะ ก ซ้ะอวีง ซ้ะโทะ แอ นี่ อ นอ ได้ะ พี่ ทีโต อ เซิง ฆวี๊ง ซ้ะ โย้ ลู่ง น ซื๊ง กุ้ อ แฌ้ เกม๊า อ เซิง มึ ซ้ะ มึ.
[14] จ อางปฆ้า น ซื๊ง ลู่ง ทีโต อ เมะแซ พ้า ฌ้อง จ ล แบ ฌางแช้ ล้าง จ ซ้ะ แบ. ท กุ้ อ เม้ง พี่ ก โล้ เอะ น ซื๊ง เก ท เมะ ท โต้ บี่ จะ เล้ นอ เท่อ พี่ ก อางปฆ้า น ซื๊ง ลู่ง ทีโต อ เมะแซ พ้า อู้ นอ เนโพล ทาง อ ซ้ะ เก ท ที๊ง ท โต้ บี่ นอ ปะ ล้อ.
[15] ทีโต เอ น ซื๊ง แอ ทาง พี่ อ นาง แบ ไท้ น ซื๊ง ตองช้า ฮะช้า-อ้ะ ดี๊ ทื๊ง แบ นะ แบ-อ้ะ ดี๊ น ซื๊ง กุ้ อ แฌ้ ชู่ง ลู่ง เน้ แท๊-อ้ะ.
[16] จ ซ้ะอวีง ซ้ะโทะ พี่ จ อางกี ล้าง ซ้ะ ดี๊ น ซื๊ง ซี กุ้ อ เม้ง.