[1] Mei kind, meind vass ich diah sawk, un shtoah mei gebodda uf in diah.
[2] Hald mei gebodda un du zaylsht layva, heet vass ich dich lann es vi da abbel funn deim awk.
[3] Bind dee gebodda an dei fingah, un shreib si uf's tablet funn deim hatz.
[4] Sawk zu di veisheit, “Du bisht mei shveshtah,” un hays eisicht dei naykshtah freind;
[5] so es si dich vekk halda funn di aybrechich fraw, sell fremd veibsmensh mitt gladdi vadda.
[6] Am fenshtah funn mei haus, habb ich moll deich di rissa naus gegukt.
[7] Ich habb yungi mennah ksenna es noch nett feel fashtayn, un unnich eena voah aynah unni goodi eisichta.
[8] Eah is di shtrohs nunnah ganga nayksht an's ekk funn iahra haus, un hott da vayk zu iahra haus gnumma,
[9] ohvets am dushbah, vi's am dunkel vadda voah.
[10] No is di fraw raus kumma een ohdreffa; see voah ohgedu vi en huah, un hott shlichtichi gedanka katt.
[11] See voah laut un foah-vitzich; iahra fees voahra nee nett dihaym,
[12] dayl zeit in di shtrohs, dayl zeit shunsht rumm, un am voahra an alli ekk.
[13] See hott hohld gnumma an eem un hott'n gekist, un unni shohm hott si ksawt:
[14] “Ich habb dank-opfahra macha missa, un heit habb ich mei fashprechnis kalda.
[15] So binn ich raus kumma dich ohdreffa; ich habb gegukt fa dich un habb dich kfunna.
[16] Ich habb mei bett ivvah-gezowwa mitt kfeahbdi lein-dichah funn Egypta.
[17] Ich habb mei bett gmacht goot shmakka mitt myrrhe, aloe un cinnamon.
[18] Kumm, vella bei-nannah shlohfa biss meiya-free, vella en goodi zeit havva mitt-nannah.
[19] Mei mann is nett dihaym, eah is veit fatt ganga.
[20] Eah hott en sakk foll geld mitt sich gnumma, un kumd nett haym biss foll moon.”
[21] See hott een fashvetzt mitt iahra shlichtich kshvetz, un hott een nei kshvetzt mitt gladdi vadda.
[22] Endlich is eah iahra nohch ganga, so vi en ox gayt fa kshlachta sei; so vi en hash es kfanga is inna fall,
[23] biss en arrow deich sei levvah gayt; so vi en fokkel in en net fleekt, un vayst nett es es sei layva nemma zayld.
[24] Nau dann, mei kinnah, heichet mich ab, nemmet acht funn vass ich sawk.
[25] Loss dei hatz nett vekk gedrayt sei zu iahra vayya, un lawf nett in iahra pawda.
[26] See hott feel fashvetzt biss si kfalla sinn, un see is di shuld fa da doht funn en grohsi drubb.
[27] Iahra haus is da vayk zumm grawb, un's fiaht nunnah zumm doht.