[1] Heichet mei kinnah, zu di lanning es en faddah gebt, gevvet acht, so es diah lanning un eisicht greeyet.
[2] Ich gebb eich goodi lanning, falosset nett sell es ich eich lann.
[3] Vo ich en boo voah in meim daett sei haus, un voah noch vayyich un's aynsisht kind funn mei maemm,
[4] hott mei daett mich gland un hott ksawt, “Nemm hohld funn mei vadda mitt deim gans hatz; hald mei gebodda un du zaylsht layva.
[5] Grikk veisheit, grikk fashtand, fagess di vadda funn mei maul nett, un dray nett vekk funna.
[6] Faloss di veisheit nett, un see gebt acht uf dich; hald see leeblich, un see vatsht ivvah dich.
[7] Da ohfang funn di veisheit is dess: Grikk veisheit, es macht nix aus vass es dich kosht, grikk eisicht.
[8] Acht di veisheit hohch, un see haybt dich hohch uf, nemm see oh, un see gebt diah grohsi eah.
[9] See dutt gnaydichi blumma uf dei kobb, un gebt diah en glitzahrichah krohn.”
[10] So heich mich ab, mei kind, un nemm oh vass ich sawk, no zaylsht du en lang layva havva.
[11] Ich habb dich gland im vayk funn di veisheit, un habb dich in grawdi pawda kfiaht.
[12] Vann du lawfsht, dann shtayt nix in deim vayk, un vann du shpringsht, zaylsht nett shtolbahra.
[13] Hayb oh zu vass du gland hosht, loss nett gay difunn, du's oahrich heeda, fa's is dei layva.
[14] Gay nett uf di pawt funn di gottlohsa, un lawf nett uf em vayk funn evili mensha.
[15] Hald dich vekk difunn, un du nett lawfa druff, dray vekk difunn, un gay uf dei vayk.
[16] Fa si kenna nett shlohfa biss si evil gedu henn; si sinn fumm shlohf kalda biss si ebbah gmacht henn shtolbahra.
[17] Si essa's broht funn ungerechtichkeit, un drinka da vei funn gvald.
[18] Da vayk funn di gerechta is vi's licht free meiyets, es sheind hellah un hellah biss es gans dawk is.
[19] Avvah da vayk funn di gottlohsa is vi's dunkla, si kenna nett sayna vass si drivvah shtolbahra.
[20] Mei kind, gebb acht zu vass es ich sawk, heich goot ab zu mei vadda.
[21] Loss si nett vekk kumma funn diah, hald si deef in deim hatz;
[22] fa si sinn layva zu selli es si finna, un ksundheit zu iahra gans leib.
[23] Ovvich alles shunsht, heet dei hatz, fa dei layves-lawf kumd funn vass im hatz is.
[24] Loss dei maul nett leeya sawwa, un hald letzi kshvetzah veit vekk funn dei leftz.
[25] Loss dei awwa grawt fanna naus gukka, hald oh grawt fannich dich vatsha.
[26] Hald di pawt grawt vo dei fees lawfa, un alles es du dusht drayt recht aus.
[27] Dray nett rechts adda lings, hald dei foos funn evil nohch gay.