[1] En goot-maynich andvat drayt da zann vekk, avvah shaufi vadda shtadda da zann uf.
[2] En zung mitt veisheit macht di lanning leeblich, avvah's maul fumm unksheida shvetzt yusht dumhayda.
[3] Di awwa fumm Hah sinn ivvahrawlich, un sinn am di gooda un di evila leit vatsha.
[4] En zung es hayld, is vi en bohm funn layva, avvah en fafiahrichi zung macht da geisht moot faliahra.
[5] En dummah mann nemd seim faddah sei shtrohf nett oh, avvah veah-evvah es sich lost recht ksetzt sei is shmeaht.
[6] Im gerechta sei haus sinn feel keshtlichi sacha, avvah vass da gottlohs einemd gebt eem yusht druvvel.
[7] Di leftz funn sellah es veisheit hott, shtroiya goodah roht, avvah's hatz funn di unksheida is nett so.
[8] Es opfah funn di gottlohsa is grauslich zumm Hah, avvah di gebaydah funn di ufrichticha sinn eem kfellich.
[9] Da vayk funn di gottlohsa is grauslich zumm Hah, avvah eah leebt selli es gerechtichkeit nohch gayn.
[10] Sellah es da vayk falost, vatt oahrich kshtrohft; sellah es hast recht ksetzt sei, kumd um.
[11] Da doht un's grawb sinn abgedekt fannich em Hah, vi feel may sinn di hatza funn mennah!
[12] Da shpoddah gleicht nett kshtrohft sei; eah gayt nett zu selli es veisheit henn.
[13] En fraylich hatz macht en fraylich ksicht, avvah vann's hatz bedreebt is, dann hott da geisht moot faloahra.
[14] Leit es shmeaht sinn vella noch may lanning, avvah's maul funn di unksheida feedaht sich mitt dumheida.
[15] Awl di dawwa funn di bedreebda sinn hatt, avvah en fraylich hatz is vi en grohs essa alli dawk.
[16] 'Sis bessah fa bissel havva mitt di furcht fumm Hah, es vi feel geld havva un gedruvveld sei.
[17] Bessah en essa funn goahra sach mitt leevi, es vi en feddah ox mitt hass.
[18] Ebbah es kshvind bays vatt shtatt shtreit uf, avvah en geduldichah mann keeld da zann ab.
[19] Da vayk fumm faula mann is ivvah-gvaxa mitt danna, avvah di pawt funn di ufrichticha is en gladdah vayk.
[20] En boo mitt veisheit macht sei daett froh, avvah en dummah mann gebt nix um sei maemm.
[21] Dumheit is en frayt zu di unksheida, avvah en fashtendlichah mann lawft grawt.
[22] Unni roht gayt sell letz vass ma im sinn hott fa du, avvah mitt feel roht shaft alles goot aus.
[23] Es is en frayt zu en mann vann eah en goot andvat gebt, un vi goot is es recht vatt an di recht zeit!
[24] Da vayk funn layva fiaht nuff-zuss fa selli mitt veisheit, so es si nett nunnah in's grawb gayn.
[25] Da Hah reist's haus funn di shtolsa nunnah, avvah eah vatsht ivvah's land funn di vitt-fraw.
[26] Da Hah hast di gedanka funn di gottlohsa, avvah di vadda funn di reina sinn eem kfellich.
[27] Sellah es greedich is macht druvvel fa sei haus-hohld, avvah sellah es uneahlichi kshenkah hast zayld layva.
[28] Di meind funn di gerechta denkt eb si andvat gebt, avvah's maul funn di gottlohsa shpautzt yusht evili sacha.
[29] Da Hah is veit vekk funn di gottlohsa, avvah eah heaht's gebayt funn di gerechta.
[30] Freindlichi awwa macha's hatz froh, un goodi zeiya macha di gnocha ksund.
[31] Veah-evvah es abheicht zu roht es layva gebt, zayld voona unnich selli mitt veisheit.
[32] Veah sich nix sawwa lost dutt sich selvaht vay, avvah veah roht ohnemd grikt lanning.
[33] Di furcht fumm Hah land en mann veisheit havva, un daymoot kumd eb grohsi eah.