[1] Mei kind, fagess nett vass ich dich gland habb, un hald mei gebodda in deim hatz.
[2] Fa si zayla diah en lang layva, langi yoahra, un fridda bringa.
[3] Loss leevi un shtandhaftichkeit dich nett falossa, binn si um dei hals rumm, un shreib si uf's babiah funn deim hatz.
[4] No zaylsht du ohksenna sei un en goodah nohma havva, in di awwa funn Gott un mensha.
[5] Faloss dich uf da Hah mitt deim gans hatz, un faloss dich nett uf dei ayknah fashtand;
[6] denk an een in awl dei vayya, no zayld eah dich recht fiahra.
[7] Dink dich nett oh fa selvaht veisheit havva, feich dich fumm Hah, un dray vekk funn evil.
[8] Dess macht dei leib ksund, un macht dei gnocha shteik.
[9] Gebb em Hah eah bei eem gevva funn vass du hosht, un gebb eem's eahsht-frucht funn deim land.
[10] No vadda dei sheiyahra kfild mitt blendi, un dei fessah lawfa ivvah mitt neiyah vei.
[11] Mei kind, dray's nett nunnah vann da Hah dich recht setzt, un sei nett zannich vann eah dich shtrohft fa letz du.
[12] Fa veah da Hah leeb hott, sellah dutt eah shtrohfa, grawt vi en faddah sei boo dutt vo eah frayt hott mitt.
[13] Ksaykend is da mann es veisheit find, un aw da mann es eisicht grikt.
[14] Veisheit is may veaht zu diah es silvah, un du griksht may raus difunn es funn gold.
[15] Veisheit is may veaht es deiyahri pearls, un nix es du havva vitt is so keshtlich.
[16] Lang layva is in di veisheit iahra rechtsi hand, un in iahra lingsi hand is reichheit un eah.
[17] Iahra vayya sinn leeblich, un in awl iahra pawda is fridda.
[18] Di veisheit is en layves-bohm zu selli es see ohnemma, un ksaykend sinn selli es zu iahra henka.
[19] Bei veisheit hott da Hah di eaht kshaffa, un bei sei eisicht hott eah di himla in iahra blatz gedu.
[20] Bei sei eisicht hott eah di deefa vassahra fadayld, un hott di volka gmacht iahra dau falla lossa.
[21] Mei kind, hald veisheit un goodah fashtand, loss si nee nett vekk funn dei awwa kumma.
[22] Si zayla layva sei fa dei sayl, un vi ebbes shaynes um dei hals rumm.
[23] No zaylsht du dei vayk lawfa unni kfoah, un dei foos zayld nett shtolbahra.
[24] Vann du dich anna layksht, brauchsht du dich nett feicha, yau, vann du dich anna layksht, zayld dei shlohf sees sei.
[25] Feich dich nett veyyich unfahoft druvvel, adda veyyich's fadauves es uf di gottlohsa kumd,
[26] fa da Hah is dei drohsht, un eah hald dei foos funn kfanga vadda.
[27] Hald dich nett funn goot du zu selli es es veaht sinn, vann's in dei macht is fa's du.
[28] Sawk nett zu deim nochbah, “Gay haym un kumm viddah zrikk meiya,” vann du's nau hosht fa gevva.
[29] Mach nett aus fa letz du zu deim nochbah, deah es nayksht bei diah voond un dich draut.
[30] Shvetz nett bays zu ennich ebbah unni uahsach, vann eah nix gedu hott zu diah.
[31] Sei nett jealous funn ennich ebbah es gvald yoost, un du nett vi eah dutt.
[32] Da Hah hast ebbah es evil dutt, avvah eah is en freind zumm ufrichticha.
[33] Em Hah sei fluch is uf di gottlohsa iahra haus, avvah sei sayya is uf di haymet funn di gerechta.
[34] Eah fashpott selli es shpott macha, avvah eah gebt gnawt zu di daymeedicha.
[35] Leit mitt veisheit eahva hohchi eah, avvah di unksheida vadda fashohmd.