[1] En mann es oft gvand voah un is alsnoch dikk-kebbich, zayld bletzlich gebrocha sei unni hilf.
[2] Vann di gerechta ivvah-hand henn, dann doon di leit sich froiya, avvah vann di gottlohsa roola, dann doon di leit yammahra.
[3] Veah veisheit leeb hott macht sei daett froh, avvah veah sich uf hald mitt huahra fablohst sei geld.
[4] En kaynich es recht richt macht's land shtandhaftich, avvah aynah es hinna rumm geld nemd fadaubt's land.
[5] En mann es sei nochbah ohshmaycheld, shpand en net fa sei fees.
[6] En evilah mann is kfanga bei sei aykni sind, avvah en gerechtah mann kann singa un sich froiya.
[7] En gerechtah mann vayst vass di oahma iahra recht is, avvah en gottlohsah mann fashtayt so sach nett.
[8] Di shpoddah bringa en ufruah in en shtatt, avvah selli mitt veisheit drayya da zann vekk.
[9] Vann en mann mitt veisheit viddahbat hott mitt en unksheidah mensh, dann dutt da unksheit laut shvetza un shpodda, un's is kenn fridda.
[10] Bloot-fageesah hassa ebbah unshuldiches, avvah di gerechta gukka aus fa sei layva.
[11] En unksheidah mann lost sei zann raus, avvah en mann mitt veisheit haybt seinah zrikk.
[12] Vann en roolah leeya abheicht, dann zayla awl sei deenah gottlohs sei.
[13] Da oahm mann un da ivvah-dreddah sinn gleicha in aym ding, da Hah gebt's licht zu di awwa funna awl zvay.
[14] Vann en kaynich di oahma richt mitt voahheit, zayld sei kaynich-shtool shtay fa'immah.
[15] Di root funn shtrohf bringd veisheit, avvah en kind es gay glost vatt bringd shohm zu sei maemm.
[16] Vann di gottlohsa ivvah-hand henn, dann hott's feel sinda, avvah di gerechta zayla iahra nunnah-fall sayna.
[17] Shtrohf dei sohn, un eah gebt diah drohsht; eah zayld frayt zu deim hatz gevva.
[18] Vo kenn offenbarung is, vadda di leit vild un veesht, avvah ksaykend sinn selli es es ksetz halda.
[19] Yusht mitt vadda kann en gnecht nett kshtrohft sei; even vann eah fashtayt, dutt eah nett heicha.
[20] Saynsht du en mann es zu kshvind shvetzt? 'S hott may hofning fa en unksheidah mensh es fa een.
[21] Vann en mann seim gnecht alles gebt es eah vill funn glennem uf, dann nemd da gnecht alles ivvah am end.
[22] En baysah mann shtatt shtreit uf, un aynah mitt haysah zann dutt feel sindicha.
[23] En shtolsah mann vatt niddah gebrocht, avvah en daymeedichah mann grikt hohchi eah.
[24] Veah en dayl hott mitt en deeb hast sei layva, eah heaht en fluch, avvah eah feicht sich sawwa vass eah vayst.
[25] Di furcht fumm mensh setzt en fall, avvah veah sich falost uf da Hah, bleibt aus di kfoah.
[26] Feel vella ohksenna sei bei en roolah, avvah en recht gericht kumd fumm Hah.
[27] En gerechtah mensh hast en ungerechtah mann, un en ungerechtah mann hast sellah es ufrichtich lawft.