[1] Vi shnay im summah, un reyyah in di eahn, so is hohchi eah nett shiklich fa en unksheidah mensh.
[2] Shpatza un shvalma es rumm fleeya unni runnah kumma, sinn vi en unshuldichah fluch; eah kumd nett runnah uf ebbah.
[3] En fitz fa da gaul, en zohm fa da aysel, un en shtekka fa da bukkel funn di unksheida.
[4] Gebb em unksheida kenn ksheit andvat, adda du mechsht vadda vi eah is.
[5] Gebb em unksheida yusht unksheit andvat, adda in sei aykni awwa maynd eah eah veah shmeaht.
[6] Veah en gebott shikt bei di hand funn en unksheidah, is vi ebbah es sei aykni fees abshneit, adda sich shawda dutt.
[7] En shpruch im maul fumm unksheida, is vi en gribbel sei bay es lummahrich henka.
[8] Fa hohchi eah gevva zu en unksheidah mensh, is vi broviahra en shtay shmeisa vann eah in di shling gebunna is.
[9] Vi en dann in di hand funn en ksoffanah, so is en shpruch im maul fumm unksheida.
[10] Vi en bow-hundah es ennich ebbes ohsheest es eah saynd, so is ebbah es en unksheidah dingd fa shaffa, adda yusht ennich ebbah es fabei gayt.
[11] Vi en hund es viddah frest vass eah ruff kshmissa hott, so is da unksheit es sei dumhayda viddah dutt.
[12] Saynsht du en mann es in sei aykni awwa maynd eah veah shmeaht? 'Sis graysahri hofning fa en unksheidah es fa een.
[13] Da faul mann sawkt, “'Sis en layb draus uf em vayk! 'Sis en layb uf di shtrohsa!”
[14] Vi en deah zrikk un faddi drayt uf di hinges, so dutt en faulah mann in seim bett.
[15] En faulah mann dutt sei hand in di shissel, avvah's veaht een aus fa's ess-sach ruff an sei maul bringa.
[16] En faulah mann maynd eah hott may veisheit, es sivva mennah es en ksheit andvat gevva.
[17] Veah fabei gayt un sich ufmixt in anri iahra shtreit, is vi ebbah es en baysah hund graebt bei di oahra.
[18] Vi en vildah mann es feiyahrichi arrows sheest fa doht macha,
[19] so is da mann es sei nochbah fafiaht, un sawkt, “Ich habb's yusht gedu in kshpass!”
[20] Unni hols gayt's feiyah aus, un unni kshvetzah, shtobt da shtreit.
[21] Vi di kohla zu di hays gloot, un vi hols zumm feiyah, so is en druvvel-machah am shtreit ufshtadda.
[22] Di vadda funn kshvetz-drawwah sinn vi sees ess-sach, si vadda glatt eikshlukt nunnah in da bauch.
[23] Gladdi leftz un en evil hatz, sinn vi eahdich ksha es ivvah-gedekt is mitt silvahrichah shaum.
[24] Ebbah es hast, fashteld's mitt sei lefts, avvah im hatz is eah falsh.
[25] Vann eah glatt shvetzt, glawb eem's nett, fa's sinn sivva veeshti gedanka in seim hatz.
[26] Eah hald sei hass zu gedekt fa shawda du, avvah sei ungettlichkeit vatt raus gebrocht fannich di leit.
[27] Vann en mann en loch grawbt, dann fald eah selvaht nei; vann en mann en shtay rold, dann rold eah zrikk uf een.
[28] En falshi zung hast selli leit es see vay dutt, un gladdi leftz bringa yusht fadeahves.