<Р’омайи 9

[1] Әз бь Мәсиһ бе хельф р’аст дьбежьм у исафа мьн жи бь сайа Р’ӧһ’е Пироз мьнр’а шә’дәтийе дьдә,

[2] кӧ әз гәләки бәр хwә дьк’әвьм у кӧла дьле мьн жи к’ур ә.

[3] Чьмки мьн хwәха дьхwәст ньфьр’ ль мьн бьбуйа, т’ела мьн жь Мәсиһ бьqәтийа, бона мьләте мьни жь хун-гоште мьн,

[4] кӧ исраели нә. Ль wан дьк’әвә бьбьнә лаwед Хwәде, Хwәде р’умәта Хwә нишани wан да, пәйман т’әви wан гьредан, qанунед Хwә данә wан у кьрьнә хwәйед һ’әбандьн у созед дайи .

[5] Кал-бав жи жь wан ьн у Мәсиһ жи алийе хун у гоштда жь нав wан һат, кӧ сәр һ’әмуйар’а Хwәдейе һ’әта-һ’әтайейи һежайи шькьрийе йә. Амин.

[6] Ле бәле наqәwьмә кӧ созе Хwәде хельф дәре, чьмки нә кӧ әw һ’әму нә исраели, йед кӧ жь Исраел дьне к’әтьнә

[7] у нә жи һ’әмуйед жь бәдәна Бьраһим бунә зар’ед wийә һәq-һ’әлал ьн, ле һатийә готьне: «Зӧр’әта тәйе Исһаqда бе навкьрьне» .

[8] Аwа готи зар’ед Хwәде нә әw ьн, йед кӧ жь бәдәна т’әбийәти нә, ле зар’ед создайи wе зӧр’әт бенә һ’әсабе.

[9] Чьмки созе готи әв бу: «Саләкә дьн ви чахи әзе ль сәр тәда бем у кӧр’әке Сәрайер’а бьбә» .

[10] Ле нә т’әне әв бу, Р’евека жи бь дӧ кӧр’а жь бавәки һ’әмлә дәрк’әт, аwа готи жь баве мә Исһаq.

[11] Гава кӧр’ьк һе нәбьбун, һе qәнщи-хьраби нәкьрьбун, Р’евекайер’а һатә готьне: «Йе мәзьн wе хӧламтийе ль йе бьч’ук бькә». Әв йәк бу, wәки qьрара Хwәде wәкә бьжартьна Wи дәре, нә кӧ кьрава гьредайи бә, ле ль гора газийа Хwәде бә.

[13] Чаwа ньвисар ә: «Мьн Аqуб һ’ьз кьр, ле жь Әсаw чум» .

[14] Әм иди чь бежьн? Гәло нәһәqийа Хwәде һәйә? На хер!

[15] Чьмки Мусар’а дьбежә: «Әз к’ижани бемә р’ә’ме, Әзе бемә р’ә’ме у дьле Мьн сәр к’е бьшәwьтә, wе бьшәwьтә» .

[16] Әв йәк иди нә жь хwәстьн йан хирәта мерьв ә, ле жь р’ә’ма Хwәде йә.

[17] Чьмки ньвисара пироз Фьрәwьнр’а дьбежә: «Бона wе йәке Мьн тӧ кьри п’адша, wәки qәwата Хwә бь тә бьдьмә к’ьфше у наве Мьн т’әмамийа дьнйайеда бе готьне» .

[18] Аwа Хwәде к’ижана дьхwазә те р’ә’ме у к’ижана дьхwазә wан сәрһ’ьшк дькә.

[19] Кӧ ӧса йә те мьнр’а бежи: «Ле иди чьма Хwәде мә нәһәq дькә? К’и дькарә ль бәр qьрара Wи р’абә?»

[20] Ле тӧ к’и йи, ә’вдо, кӧ ль бәр готьна Хwәде р’адьби? Гәло щер’ дькарә щер’кәрр’а бежә: «Тә чьма әз аһа чекьрьмә?»

[21] Чьма һ’ӧкӧме щер’кәр сәр ахе т’ӧнә кӧ жь wе һ’әр’ийа стьрайи һьн дәрданед бона р’умәте чекә, һьн жи бона бер’умәте?

[22] Ле чь ве йәкер’а һәйә, һәгәр Хwәде хwәст бәри к’ьфшкьрьна һерс у qәwата Хwә, бь думька дьреж гәләки сәбьра Хwә ль wан дәрданед һежайи һерсе бинә, йед кӧ ӧндабунер’а һазьр сәкьни нә?

[23] Wи әв йәк кьр, wәки дәwләмәндтийа р’умәта Хwә wан дәрданар’а бьдә к’ьфше, йед кӧ бунә хwәйе ве р’ә’ме, к’ижан кӧ Wи пешда һазьр кьрьбун, wәки әw т’әви р’умәта Wи бьбуна.

[24] У әw дәрданед газикьри әм ьн, нә кӧ т’әне жь щьһуйа, ле жь нәщьһуйа жи,

[25] чаwа к’ьтеба Һосейада Әw дьбежә: «Щьмә’та кӧ нә щьмә’та Мьн ә, Әзе бежьме: ‹Щьмә’та Мьн› у йа нә дәлал Әзе бежьме: ‹Дәлал›» .

[26] У «wе дәра кӧ wанр’а һатә готьне: ‹Һун нә щьмә’та Мьн ьн›, һәма ль wьр жи әwе лаwед Хwәдейе сах бенә готьне» .

[27] Ишайа жи бона Исраел дькә гази дьбежә: «Һәгәр һ’әсабе зар’ед Исраел wәкә qума бә’ре бә, т’әне һьнәк wе же хьлаз бә.

[28] Чьмки Хӧдан wе кьн у кӧрт зутьре диwана дьне бькә».

[29] У чаwа Ишайа бәри ве йәке гот: «Һәгәр Хӧдане Зор мәр’а зӧр’әт нәһьшта, әме бьк’әтана р’ожа Содоме у бьбуна мина Гоморайе» .

[30] Әм иди чь бежьн? Нәщьһуйед кӧ пәй р’астһ’әсаббуне нәдьчун, гьһиштьнә р’астһ’әсаббуне, wе р’астһ’әсаббуна жь баwәрийе,

[31] ле Исраел кӧ пәй Qануне дьчу кӧ р’аст бе һ’әсабе, нәгьһиштә wе йәке.

[32] Чьма? Чьмки әw нә кӧ бь баwәрийе бу, ле бь кьред хwә. У әw сәр кәвьре льк’ӧмандьнеда к’әт һол бу,

[33] чаwа ньвисар ә: «Ва Әз кәвьрәки льк’ӧмандьне Сийонеда датиньм, зьнарәки же һолбуне ле һәр кәсе кӧ баwәрийа хwә Wи бинә, wе шәрми нәбә» .