Р’омайи 1
[1] Жь Паwлос, хӧламе Мәсиһ Иса, шандитийер’а газикьри, бона бәлакьрьна wе Мьзгинийа Хwәдейә к’ьфшкьри,
[2] йа кӧ Wи һе пешда ньвисаред пирозда бь заре п’ехәмбәред Хwә соз дабу.
[3] Әва Мьзгинийа бона Кӧр’е Wи, Хӧдане мә Иса Мәсиһ ә, кӧ бь бәдәни жь зӧр’әта Даwьд бу у бь Р’ӧһ’е Пирозийе, гава жь мьрьне р’абу, qӧдрәтеда чаwа Кӧр’е Хwәде хӧйа бу.
[5] Бь Wи мә к’әрәма шандитийе станд, wәки бона наве Wи һ’әму мьләта һин кьн, кӧ баwәр бькьн у гӧһдар бьн.
[6] Һун жи нава wанда һатьнә газикьрьне, кӧ бьбьнә п’ара Иса Мәсиһ.
[7] Жь wә һ’әмуйар’а, һ’ьзкьрийед Хwәдейә пирозбунер’а газикьри, кӧ Р’омайеда дьминьн, к’әрәм у ә’дьлайи бә, жь Хwәдейе Баве мә у Хӧдан Иса Мәсиһ.
[8] Бәре пешьн әз бь дәсте Иса Мәсиһ бона wә һ’әмуйа р’азибуне дьдьмә Хwәдейе хwә, чьмки баwәрийа wә т’әмамийа дьнйайеда те готьне.
[9] Хwәде шә’де мьн ә, әw Хwәдейе кӧ әз нава Мьзгинийа Кӧр’е Wида бь дьл у щан хӧламтийе дькьм, әз һәр гав wә бир тиньм
[10] у т’ьме нава дӧайед хwәда һиви дькьм, кӧ бь ә’мьре Хwәде щарәке р’е бьк’әвә мьн, сәр wәда бем.
[11] Чьмки әз гәләки һ’әйра дитьна wәда мә, wәки п’ешк’ешәкә р’ӧһ’ани бьгьһиньмә wә, кӧ һун баwәрийеда бьшьдьн.
[12] Аwа готи әз жи т’әви wә, әм дьл бьдьнә бәр һәв, бь wе баwәрийа мьн у wәйә һәр дӧ алийава.
[13] Әз дьхwазьм кӧ һун заньбьн хушк-бьрано, wәки гәләк щара мьн хwәстийә бемә щәм wә, кӧ к’әда мьн нава wәда жи һәбә, чаwа нава нәщьһуйед майинда, ле һ’әта ньһа р’е нәк’әтийә мьн .
[14] Әз борщдаре һ’әму мьләта мә, һьн йе йунанед пешдачуйи у һьн жи йе мьләтед пашдамайи, дәйндаре сәрwахта у бефә’ма мә.
[15] Аwа әз бь дьл у щан дьхwазьм Мьзгинийе бьдьмә wә жи, йед кӧ Р’омайеда дьминьн.
[16] Бәле әз Мьзгинийе шәрм һ’әсаб накьм, чьмки әw qәwата Хwәде йә, бона хьлазбуна һ’әму баwәрмәнда, пешийе бона щьһуйа, паше нәщьһуйа.
[17] Чьмки Мьзгини дьдә к’ьфше, кӧ Хwәде чаwа мәрьва р’аст һ’әсаб дькә, дькә кьрасе хwә , әв йәк жь сери һ’әта бьни бь баwәрийе йә, чаwа ньвисар ә: «Йе р’аст wе бьжи, чьмки баwәр дькә» .
[18] Хәзәба Хwәде жь ә’змен сәр һ’әму бехwәдети у нәһәqийа wан мәрьва хӧйа дьбә, к’ижан кӧ бь нәһәqийед хwә наһельн кӧ р’асти хӧйа бә.
[19] Чьмки чь кӧ гәрәке бона Хwәде бьзаньбьн wанва ә’йан ә, чьмки Хwәде wанва ә’йан кьрийә.
[20] Р’аст жь ә’фьрандьна дьнйайеда һ’ӧнӧред Wийә нәхӧйа, аwа готи qӧдрәта Wийә һ’әта-һ’әтайе у Хwәдетийа Wи бь ә’фьрина хӧйа дьбьн, зәлал тенә дитьне. Бь ви аwайи кәс нькарә щабе бьдә.
[21] Бәле wан Хwәде нас дькьр, ле пәсьне Wи нәдан чаwа Хwәде, нә жи жь Wи р’ази бун, ле бәле әw нава фькьред хwәда п’уч’ бун у жь дәст бефә’мийе шуна р’әшва чун.
[22] Wана гот: «Әмә сәрwахт ьн», ле бефә’м дәрк’әтьн
[23] у р’умәта Хwәдейе нәмьри шькьле мәрьве п’уч’и-мьри, тәйрәда, чарп’е у шулькийар’а гӧһер’ин .
[24] Ләма жи Хwәде әw бь хwәстьна дьле wан данә дәсте һ’әрамийе, кӧ бәдәна хwә нава һәвда бьһ’әр’ьминьн.
[25] Wана р’астийа һьндава Хwәдеда дәрәwийер’а гӧһер’ин у сәре хwә ль бәр ә’фьрина данин, әw һ’әбандьн, нә кӧ Ә’фьрандаре һ’әта-һ’әтайе кӧ һежайи шькьрийе йә. Амин.
[26] Бона ве йәке Хwәде әw данә бенамусийе, һ’әта жьнед wан жи һ’әwщәтийа хwәйә ә’дәте дьне һ’әwщәтийа әк’сиә’дәтийер’а гӧһер’ин.
[27] Ӧса жи мера һ’әwщәтийа жьнайә ә’дәти һьштьн, пе тәмед хwәйә хьраб бь һәвр’а шәwьтин, мера т’әви мера р’обәти дькьр у һәqе жьр’ек’әтьна хwәйә qазьнщкьри һьлдьданә сәр хwә.
[28] У чаwа wана нәхwәст Хwәде занәбуна хwәда хwәйкьрана, Хwәде жи әw данә фькьред бет’әwшә, кӧ әwана тьштед нәщайиз бькьн.
[29] Әвана һәр нәһәqийе, нәqәнщийе , тьмайийе, хьрабийава т’ьжи нә: Бь һ’әвсудийе, меркӧжийе, бәрзәqийе, мьхәнәтийе, хернәхwазийева дагьрти, гьлигәр’о,
[30] бӧхданбеж, нәхwәдеһ’ьз, бешәрм, позбьльнд, к’ӧбар-бабах, йе хьрабийе чедькә, нә гӧр’а де-бавада,
[31] бефә’м, беамьн, беисаф, бер’ә’м.
[32] Бәле әвана һаш жь qануна Хwәде һәнә, кӧ йед ван тьшта дькьн һежайи мьрьне нә, ле бәле нә кӧ т’әне ван тьшта дькьн, ле һавьжийа хwә жь кьрийа жи тиньн.