Р’омайи 15
[1] Әм кӧ баwәрийеда qәwат ьн, гәрәке бьк’әвьнә бьн баре сьста, нә кӧ әм ль хwә хwәш бен.
[2] Бьра жь мә һәр кәс алийе qәнщийеда ль һәвале хwә хwәш бе, кӧ баwәрийеда бьшьдә.
[3] Чьмки Мәсиһ жи нә кӧ ль Хwә хwәш һат, ле чаwа ньвисар ә: «Әw qаред кӧ ль Тә дькьн, ль Мьн дькьн» .
[4] Ле чь кӧ пешда к’ьтебада һатә ньвисаре, бона һинбуна мә һатә ньвисаре, wәки әм бь сәбьре у wан готьнед ньвисарада кӧ бине дьдьнә бәр мә, хwәйигӧман бьн.
[5] Дә бьра Хwәдейе сәбьре у бина ль бәр һәр кәси бьдә wә, кӧ һун һьндава һәвда сәр нетәке бьн, wәкә нәхш-т’әрзе Мәсиһ Иса,
[6] кӧ һун һ’әму бь дьл у зарәки шькьрийе бьдьнә Хwәдейе Баве Хӧдане мә Иса Мәсиһ.
[7] Бона ве йәке бона шькьрийа Хwәде һәвдӧ qәбул кьн, чаwа Мәсиһ әм qәбул кьрьн.
[8] Чьмки әз wәр’а дьбежьм, кӧ Мәсиһ бу хьзмәтк’аре щьһуйа, бона амьнийа Хwәде ә’йан кә, wәки әw созе кал-бавар’а һатийә дайине, мак кә
[9] у нәщьһу бона р’ә’ма Wи шькьрийе бьдьнә Хwәде. Чаwа ньвисар ә: «Бона ве йәке Әзе нав нәщьһуйада пәсьне Тә бьдьм у әшqи наве Тә бьстьрем» .
[10] У диса дьбежә: «Гәли нәщьһуйа, ша бьн т’әви мьләте Wи!»
[11] У диса дьбежә: «Шькьрийе бьдьнә Хӧдан гәли нәщьһуйа у пәсьне Wи бьдьн, һ’әму щьмә’тно» .
[12] Ишайа жи дьбежә: «Тамарәкә Йеша wе дәре, бьбә мире нәщьһуйа у нәщьһу wе гӧмана хwә бьдьнә сәр Wи» .
[13] Бьра Хwәдейе гӧмане дьле wә бь шабуне у ә’дьлайийева бьк’ьмк’ьминә, бона wе баwәрийа wә, wәки гӧмана wә бь qәwата Р’ӧһ’е Пироз зедә бә.
[14] Әз хwәха wәда гӧман ьм хушк-бьрайед мьн, кӧ һун qәнщийада манә у занәбунева жи дагьрти нә, дькарьн һәвдӧ ширәт кьн.
[15] Ле аликива мьн тӧрӧш кьр wәр’а ньвиси, кӧ wан тьшта бькьмә бира wә, бона wе к’әрәма кӧ жь Хwәдеда мьнр’а һатийә дайине,
[16] wәки әз нава нәщьһуйада бьбьмә бәрдәстийе Мәсиһ Иса. Әз нава Мьзгинидайина Хwәдеда мина к’аһинәки хьзмәтк’арийе дькьм, кӧ һ’әдибуна нәщьһуйа qәбул бә, бь Р’ӧһ’е Пироз бӧһӧрти-жьбарә бә.
[17] Аwа әз дькарьм бь сайа Мәсиһ Иса пе хьзмәтк’арийа хwәйә бона Хwәде бьфьр’ьм.
[18] Әз тӧрӧш накьм бона тьштәки ӧса хәбәр дьм, пештьри wан тьштед кӧ Мәсиһ бь дәсте мьн кьрьнә, бона гӧһдарийа нәщьһуйа, һәгәр бь хәбәра бә йан кьра бә,
[19] бь qәwата нишана у к’әрәмәта, бь qәwата Р’ӧһ’е Хwәде. У бь ви аwайи әз жь Оршәлиме гьрти һ’әта Илиркуме гәр’ийам, Мьзгинийа Мәсиһва т’ьжи кьр.
[20] Мьн дьщә’данд кӧ wан дәра Мьзгинийе даннасин кьм, к’идәред бона наве Мәсиһ нәһатьбу бьһистьне, wәки нәбә кӧ әз сәр һ’име һьнәкед дьн чекьм.
[21] Ле бәле чаwа ньвисар ә: «К’ижанар’а бона Wи нәһатийә готьне, wе бьбиньн у к’ижана бона Wи нә бьһистийә, wе бьзаньбьн» .
[22] Ләма гәләк щара р’е нәдьк’әтә мьн сәр wәда бьһатама.
[23] Ле ньһа иди ван алийа щийе ӧса т’ӧнә п’егәһ ле нәк’әтьбә у әв чәнд сал ә әз дькьм бемә щәм wә,
[24] гава һәр’ьмә Спанйайе. Аwа гӧмана мьн һәйә, кӧ әзе сәр р’ийа хwә сәрики ль wә хьм у жь wьр һун мьн вәр’екьн әз һәр’ьмә Спанйайе, гава бина мьн һьнәки пе wә дәре.
[25] Ле ньһа әз дьчьмә Оршәлиме, кӧ бь к’омәкдайине хьзмәтк’арийа щьмә’та Хwәде бькьм.
[26] Чьмки хушк-бьрайед Мәкәдонйайе у Ахайайе бь һәвр’а qайл бун, кӧ алик’арике бьдьнә щьмә’та Хwәдейә бәләнгаз, йед кӧ Оршәлимеда дьминьн.
[27] Әw qайл бун у дәйндаре wан ьн жи. Чьмки нәщьһуйа алийе р’ӧһ’анида к’омәк жь щьһуйа стандьн, гәрәке әw жи алийе һәбука дьнеда к’омәке бьдьнә wан.
[28] Аwа пәй ве кьрьнер’а, гава к’омәка т’опкьри бьгьһиньмә щи, әзе бем щәм wә, жь wьр дәрбази Спанйайе бьм.
[29] Әз заньм гава бемә щәм wә, әзе бь дәwләмәндтийа дӧа-дьрозгед Мәсиһ бем.
[30] Әз һиви жь wә дькьм хушк-бьрано, бь сайа Хӧдане мә Иса Мәсиһ у wе һ’ьзкьрьна жь Р’ӧһ’, wәки һун бь дӧайед хwәйә ль бәр Хwәде т’әви шәр’к’арийа мьн бьн.
[31] Дӧа бькьн, wәки әз жь дәсте wан хьлаз бьм, йед кӧ Щьһустанеда нәбаwәр ьн у wәки хьзмәтк’арийа мьнә бона к’омәкдайине Оршәлимеда ль щьмә’та Хwәде хwәш бе.
[32] У бь ви аwайи әзе бь ә’мьре Хwәде, бь дьләки ша бемә щәм wә у һьнәки т’әви wә һеса бьм.
[33] Дә бьра Хwәдейе ә’дьлайийе т’әви wә һ’әмуйа бә. Амин.