Р’омайи 16
[1] Әз т’әмийа хушка Фойбе дьдьмә wә, йа кӧ бәрдәстийа щьвина Кәнхерйайе дькә.
[2] Һун wе бь наве Хӧдан qәбул кьн, чаwа ль щьмә’та Хwәде дьк’әвә у гава дьбә һ’әwще тьштәки, дәсте хwә дьрежи wе кьн, чьмки әwе жи хwәйити гәләка кьрийә у ӧса жи мьн.
[3] Сьлаве бьдьнә Прьскилайе у Акила , һәвал-хәбатед мьнә шьхӧле Мәсиһ Исада.
[4] Wана бона мьн дәст жь ә’мьре хwә к’ьшанд, нә кӧ т’әне әз жь wан р’ази мә, ле т’әмамийа щьвинед жь нәщьһуйа жи.
[5] У ль щьвина мала wанда жи сьлав кьн. Апенәтойе дәлале мьн жи сьлав кьн, кӧ Асйайеда баwәрмәнде Мәсиһи пешьн ә.
[6] Сьлаве бьдьнә Мәрйәме, кӧ бона wә гәләк худан р’етийә.
[7] Сьлаве бьдьнә Әндронико у Йунйасе пьсмам у һәвалед мьнә кәледа. Әw нава шандийада ә’йан ьн у бәри мьн баwәрийа хwә Мәсиһ анинә.
[8] Сьлаве бьдьнә Әмплийато, дәлале мьни жь Хӧдан.
[9] Сьлаве бьдьнә Урбано һәвал-хәбате мәйи шьхӧле Мәсиһда у Стахойе дәлале мьн.
[10] Сьлаве бьдьнә Апелис, кӧ бона Мәсиһ йәки к’әти-р’абуйи йә. Сьлаве бьдьнә мала Аристополо.
[11] Сьлаве бьдьнә Һеродийоне пьсмаме мьн. Сьлаве бьдьнә wан, йед кӧ жь мала Нәркисо нә, нав баwәрийа Хӧданда нә.
[12] Сьлаве бьдьнә Тьрифенайе у Тьрифосайе, к’ижан бона наве Хӧдан дьхәбьтьн. Сьлаве бьдьнә Пәрсисейа дәлал, кӧ гәләки худан р’етийә бона Хӧдан.
[13] Сьлаве бьдьнә Р’уфойе бьжартийе Хӧдан у дийа wи у ӧса жи чаwа дийа мьн.
[14] Сьлаве бьдьнә Асинкрито, Флегон, Һәрмес, Патробас, Һәрмас у хушк-бьрайед майинә т’әви wан.
[15] Сьлаве бьдьнә Филолого у Йулийа, Неройис у хушка wи, ӧса жи Олимпас у т’әмамийа щьмә’та Хwәдейә т’әви wан.
[16] Сьлаве бьдьнә һәв бь р’амусана шире һ’әлал. Һ’әму щьвинед Мәсиһ ль wә сьлав дькьн.
[17] Ньһа әз һиви жь wә дькьм хушк-бьрано, кӧ һун һ’әвза хwә жь wан бькьн, йед кӧ жь wе һинбуне дәр, йа кӧ һун һин бунә, щӧдәбуне пешда тиньн у хәлqе п’ьшк дькьн. Жь wан дур бьн.
[18] Чьмки йед ӧса хӧламтийе ль Хӧдане мә, Мәсиһ накьн, ле зьке хwә дьч’ериньн. Бь заре хwәш у һ’ьләк’арийе, йед сахьке дьле хwә дьхапиньн.
[19] Гӧһдарийа wә нав һ’әмуйада бь нав у дәнг ә у әз бона wә ша мә, ле дьхwазьм кӧ һун сәрwахт бьн һьндава qәнщийеда у дьлсах бьн һьндава хьрабийеда.
[20] У Хwәдейе ә’дьлайийе зутьрәке wе сәре мирещьн бьне ньгед wәда бьп’әлехә. К’әрәма Хӧдане мә Иса Мәсиһ т’әви wә бә.
[21] Тимот’ейойе һәвал-хәбате мьн ль wә сьлав дькә, ӧса жи Лукйо, Йасон у Соспатройе пьсмамед мьн.
[22] Әз Тәртийо жи бь наве Хӧдан ль wә сьлав дькьм, йе кӧ әв нә’мә ньвиси.
[23] Гайос ль wә сьлав дькә, qонахе мьн у йе т’әмамийа щьвине. Ерастойе сәр хьзна бажер ль wә сьлав дькә у ӧса жи бьрайе Кьwарто.
[24] К’әрәма Хӧдане мә Иса Мәсиһ т’әви wә һ’әмуйа бә. Амин .
[25] Ньһа шькьр жь Wир’а, Йе кӧ дькарә wә баwәрийеда бьшьдинә, wәкә wе Мьзгинийа кӧ әз бона Иса Мәсиһ даннасин дькьм, wәкә ашкәрәбуна wе сӧр’а кӧ һе дәwред бәрейә бьһӧрида вәшарти мабу,
[26] ле ньһа бь ньвисаред п’ехәмбәра ә’йан бу у бь ә’мьре Хwәдейе һ’әта-һ’әтайе һатә наскьрьне, wәки һ’әму мьләт баwәр бькьн у гӧһдар бьн.
[27] Шькьр жь Хwәдейе т’әнейи сәрwахтр’а, бь сайа Иса Мәсиһ, һ’әта-һ’әтайе. Амин .