<Р’омайи 10

[1] Хушк-бьрано! Дӧа у хwәстьна дьле мьн жь Хwәде бона хьлазбуна Исраеле йә.

[2] Әз шә’де wана мә, кӧ әw һьндава Хwәдеда хwәйихирәт ьн, ле әв йәк бе занәбун ә.

[3] Wана фә’м нәкьр, кӧ Хwәде чаwа мерьв р’аст һ’әсаб дькә, хwәстьн бь щур’е хwә һ’име һәqийе дайньн у ль бәр һәqийа Хwәде та нәбун.

[4] Чьмки бь Мәсиһ Qанун сәр һәвда һат, кӧ һәр баwәрмәнд бь wи р’аст бе һ’әсабе.

[5] Бона wе р’астһ’әсаббуна жь Qануне Муса аһа дьньвисә: «Мәрьве кӧ Qануне бьqәдинә, бь wе жи әwе бьжи» .

[6] Ле р’астһ’әсаббуна кӧ жь баwәрийе йә, аһа дьбежә: «Дьле хwәда нәбежә: К’е wе р’абә ә’змен?» (аwа готи Мәсиһ жорда бинә),

[7] йан: «К’е wе һәр’ә дийаре мьрийа?» (аwа готи Мәсиһ жь нава мьрийа дәрхә).

[8] Ле бәле ньвисар чь дьбежә? «Хәбәра Хwәде ль щәм тә йә, ль сәр заре тә йә у дьле тәда йә» , (аwа готи әw хәбәра баwәрийе, йа кӧ әм даннасин дькьн).

[9] Һәгәр тӧ бь дәве хwә иqрар бьки, кӧ Иса Хӧдан ә у дьле хwәда баwәр бьки, кӧ Хwәде Әw жь нава мьрийа р’акьрийә, те хьлаз би.

[10] Чьмки бь дьл йәк баwәр дькә, р’аст те һ’әсабе у бь дәв иqрар дькә, хьлаз дьбә.

[11] Чаwа ньвисар дьбежә: «Һәр кәсе кӧ баwәрийа хwә Wи бинә, wе шәрми нәбә» .

[12] Ль вьр фьрqи т’ӧнә нава щьһу у нәщьһуйада, чьмки Хӧдане һ’әмуйа йәк ә, һьндава wан һ’әмуйада жи мәр’д ә, к’ижанед гази Wи дькьн.

[13] Чьмки ньвисар дьбежә: «К’и гази наве Хӧдан кә, wе хьлаз бә» .

[14] Ле wе чаwа гази Wи кьн, һәгәр баwәрийа хwә Wи нәанинә? Йан wе чаwа баwәрийа хwә Wи биньн, һәгәр бона Wи нәбьһистьнә? Йан wе чаwа бьбьһен, һәгәр хәбәр даннасин нәбә?

[15] Йан wе чаwа хәбәре даннасин кьн, һәгәр нәйенә шандьне? Чаwа ньвисар ә: «Чьqаси һ’әwас ьн гавед йед мьзгинийа хере дьдьн!»

[16] Ле һ’әмуйа гӧр’а Мьзгинийе нәкьр, чьмки Ишайа дьбежә: «Хӧдан, к’е әw готьна кӧ мә гот баwәр кьр?»

[17] Аwа баwәри жь бьһистьне те у бьһистьн жи жь готьнед бона Мәсиһ.

[18] Ле бәле әз дьпьрсьм: Гәло wана нә бьһист? Наqәwьмә. Чьмки ньвисар ә: «Дәнге wан т’әмамийа ә’рде һьлда у хәбәра wан ль qӧлбед дьнйайе бәла бу» .

[19] Әз диса дьпьрсьм: Гәло Исраел пе нәһ’әсийа? Пешийе Муса дьбежә: «Әзе бь мьләте нә мьләт һелана бьдьмә wә у бь мьләтәки бефә’м һерса wә р’акьм» .

[20] У Ишайа мерк’ими дьбежә: «Әз wанва дәрк’әтьм, к’ижан ль Мьн нәдьгәр’ийан у Әз wанва ә’йан бум, к’ижана бона Мьн нәдьпьрсин» .

[21] Ле бәле бона Исраеле дьбежә: «Т’әмамийа р’оже Мьн дәсте Хwә дьрежи мьләтәки сәрһ’ьшк у хwәсәрихwә кьр» .