<Р’омайи 6

[1] Ле әм ньһа чь бежьн? Әм нава гӧнада бьминьн, кӧ к’әрәма Хwәде сәр мәда зедә бә?

[2] Т’ӧ щар! Әм кӧ һьндава гӧнада мьрьн, чаwа дькарьн һе нава wанда бьжин?

[3] Һун ньзаньн әм кӧ йәктийа Мәсиһ Исада һатьнә ньхӧмандьне, мьрьна Wида һатьнә ньхӧмандьне?

[4] Бь ньхӧмандьне әм иди т’әви мьрьна Wи бунә у т’әви Wи һатьнә дәфьнкьрьне, wәки чаwа Мәсиһ бь р’умәта Баве жь мьрьне р’абу, ӧса жи әме бькарьбьн жийина нуда бьжин .

[5] Чьмки һәгәр әм мина мьрьна Wи мьрьн т’әви Wи бун, әме ӧса жи мина р’абуна Wи жь мьрьне р’абьн.

[6] Әм ве йәке заньн кӧ бьнйат’а мәйә кәвьн т’әви Wи хач бу, wәки qальбе гӧнәк’ар сәри һьлнәдә, кӧ жь вьр шунда әм нәбьнә хӧламед гӧнә.

[7] Чьмки әwе кӧ мьрийә, әw жь гӧнә азабуйи йә.

[8] Аwа һәгәр әм т’әви Мәсиһ мьрьнә, әм баwәр дькьн, кӧ әме т’әви Wи бьжин жи.

[9] Чьмки әм заньн Мәсиһ кӧ жь мьрьне р’абуйә, иди намьрә, мьрьн сәр Wи иди һ’ӧкӧм накә.

[10] Мьрьна Әw мьр, һьндава гӧнәда щарәке бона һәр т’ьм мьр, ле жийина кӧ ньһа дьжи, һьндава Хwәдеда дьжи.

[11] Ӧса жи һун хwә һьндава гӧнәда мьри һ’әсаб кьн, ле һьндава Хwәдеда сах, бь сайа Мәсиһ Иса.

[12] Аwа бьра иди гӧнә һ’ӧкӧми сәр qальбе wәйи п’уч’и-мьри нәкә, кӧ һун гӧр’а хwәстьнед wи бькьн.

[13] У әндәмед qальбе хwә нәдьнә гӧнә кӧ бьбьнә һащәтед нәһәqийе, ле бәле хwә бьдьнә дәсте Хwәде, чаwа йәки жь мьрьне р’абуйи, бьра әндәмед wә бьбьнә һащәтед һәqийе, бона Хwәде.

[14] У гӧнә wе сәрwертийе ль wә нәкә, чьмки һун нә бьн qанунеда нә, ле бьн к’әрәмеда.

[15] Иди чь? Әм гӧна бькьн, чьмки нә бьн qанунеда нә, ле бьн к’әрәме? Т’ӧ щар!

[16] Һун һаqас тьшт ньзаньн кӧ һун бона хӧламтийе дәсте к’ева дьчьн у гӧр’а к’е дькьн, дьбьнә хӧламед wи? Һәгәр һун хӧламед гӧнә бьн, дьчьнә бәрбь мьрьне, ле һәгәр һун хӧламед Хwәде бьн, гӧр’а Wида бьн, дьчьнә бәрбь р’астһ’әсаббуне.

[17] Ле шькьр жь Хwәде, һун кӧ wәхтәке хӧламед гӧнә бун, ле wә бь дьл у щан гӧра т’әрзе wе һинкьрьне кьр, йа кӧ wә хwә спарте.

[18] Һун жь гӧнә аза бун у бунә хӧламед һәqийе.

[19] (Әз мина ә’дәте мәрьвайе дьбежьм, бона бьнйат’а wәйә мәрьвайийә бет’аqәт.) Wә чаwа wәхтәке әндәмед хwә данә нәһәqийе кӧ бьбьнә хӧламед һ’әрамийе у нәһәqийе, ӧса жи ньһа әндәмед хwә бьдьнә һ’әлалийе кӧ бьбьнә хӧламед һәqийе.

[20] Гава һун хӧламед гӧнә бун, жь һәqийе аза бун.

[21] Һьнге wә жь кьрьнед хwә чь бәр чьнин, бона к’ижана ньһа һун шәрм дькьн? Әw ахьрийе мерьв дьбьнә бәрбь мьрьне.

[22] Ле ньһа һун жь гӧнә кӧ аза бун у бунә хӧламед Хwәде, бәре һ’әлалийе дьчьньн у ахьрийа wан жи жийина һ’әта-һ’әтайе йә.

[23] Чьмки маше гӧнә мьрьн ә, ле п’ешк’еша Хwәде жийина һ’әта-һ’әтайе йә, бь сайа Хӧдане мә Мәсиһ Иса.