<Мәсәлә 9

[1] Сәрwахтийе мала хwә ава кьр, һ'әфт стун данә сәкьнандьне,

[2] һ'әйwана хwә сәржекьр, шәрава хwә льһәв дани у сьфьра хwә һазьр кьр,

[3] щарийед хwә шандьн, жь бьльндщийед бажер кӧ бькьн гази:

[4] «К'и беһ'ьш ә, бьра бе вьра! У бежьнә кемаqьла:

[5] ‹Wәрьн бьхwьн нане мьн у һун вәхwьн шәрава мьнә льһәвдайи.

[6] Дәст жь беһ'ьшийе бьк'ьшиньн, кӧ һун бьжин у хwә ль р'ийа билантийе бьгьрьн›».

[7] Әwе кӧ пек'әни ширәт дькә, әw беһӧрмәтийе сәр хwәда тинә у йе нәп'ак һьлте, әw ләк'а wи ль хwә дьхә.

[8] Пек'әни ширәт нәкә, кӧ нәбә нәйаре тә, ле йе сәрwахт ширәт кә, әwе тә һ'ьз бькә.

[9] Йе сәрwахт ширәт кә у әwе һе сәрwахт бә, мәрьве р'аст һин кә, занәбуна wийе һе зедә бә.

[10] Сәре сәрwахтийе хофа Хӧдан ә, Йе Һәри Пироз наскьрьн биланти йә.

[11] Чьмки пе мьн р'ожед тәйе гәләк бьн у салед ә'мьре тәйе зедә бьбьн.

[12] Һәгәр тӧ сәрwахт и, әw к'ара тә йә у һәгәр пек'әни йи, те зийане т'әне бьк'ьшини.

[13] Ахмахти жьнәкә qалмә-qалм ә, беһ'ьш у бефә'м ә.

[14] Әwа йан ль бәр дәре мала хwә р'удьни, йан жи сәр т'әхте бьльндщийед бажер,

[15] гази йед р'еда дькә, к'ижан кӧ р'ийа хwәда р'аст дьчьн:

[16] «К'и беһ'ьш ә, бьра бе вьра!» Әwа дьбежә кемаqьла:

[17] «Ава дьзийе ширьн ә, нане дьзива те хwарьне тә'м ә».

[18] Ле әwе гӧһ дьдә wе ньзанә кӧ ль wьр мьри нә, меванед wе гәлийе дийаре мьрийада нә.