<Мәсәлә 3

[1] Лаwе мьн! Дәрса мьн бир нәкә у дьле тә бьра т'әмийед мьн хwәй кә,

[2] чьмки әwе р'ожед дьреж, ә'мьре дьреж у хер-хwәшийе бьдьнә тә.

[3] Бьра дьлшәwати у р'асти жь тә дур нәк'әвьн, ван стуйе хwәва гьредә, ль сәр т'әхте дьле хwә бьньвисә.

[4] Һьнге те ль Хwәде у мәрьва хwәш бейи у р'успи би.

[5] Бь т'әмамийа дьле хwә хwә бьсперә Хӧдан, гӧмана хwә нәдә ль сәр һ'ьше хwә.

[6] Һ'әму р'ийед хwәда тӧ Хwәде нас кә у Әwе һ'әму шьвәр'ийед тә р'аст-дуз кә.

[7] Тӧ ль бәр ч'ә'ве хwә хwә сәрwахт нәбинә, жь Хӧдан хоф кә у жь хьрабийе дур бә.

[8] Әв йәке дәрмане нәфса тә бә у сьһ'әт-qәwата һәстуйед тә бә.

[9] Һәбука хwәва qәдьре Хӧдан бьгьрә бь һ'әму бәре дәрәмәтед пешьнва,

[10] һьнге ә'мбаред тәйе левар'а т'ьжи бьн у жь һ'әwзед тә жи мәйа ну бьк'ьшә.

[11] Лаwе мьн, ширәта Хӧдан пьшт гӧһе хwәва нәвежә у нә жи гава Әw ль тә һьлте, ль бәр хwә к'әвә,

[12] чьмки Хӧдан һ'ьзкьрийе Хwә ширәт дькә, чаwа бавәк кӧ кӧр'е хwә һ'ьз дькә.

[13] Хwәзи ль wи мәрьви кӧ сәрwахтийе дьбинә у ль wи мәрьви кӧ билантийе дьстинә!

[14] Чьмки к'ара wе жь к'ара зив зедәтьр ә у qазьнща wе жь зер'е хас.

[15] Әw жь кәвьред qимәт гьрантьр ә, һәр тьште кӧ дьле тә дьк'ьшине wәкә wе набьн.

[16] Дәсте wейи р'астеда р'ожед дьреж ьн у дәсте ч'әпеда жи дәwләт у р'умәт.

[17] Р'ийед wе р'ийед хwәшийе нә у һ'әму шьвәр'ийед wе йед ә'дьлайе нә.

[18] Әw бона йед кӧ wе дәст тиньн дара жийине йә, йед кӧ wе qәwин дьгьрьн бәхтәwар дьбьн!

[19] Хӧдан пе сәрwахтийе һ'име дьнйайе дани, пе билантийе ә'зман qәwин-qәдим кьр.

[20] Пе занәбуна Wи бебьни дәрәвәбунә у ә'wр qьр'авийе дьньqьтиньн.

[21] Лаwе мьн! Әвана бьра жь бәр ч'ә'ве тә нәчьн, аqьл у фьрасәте qәwин бьгьрә,

[22] әве бьбьнә ә'мьре нәфса тә у хьшьре стӧкӧра тә.

[23] Һьнге те р'ийа хwәда бехоф һәр'и у ньге тәйе нәльк'ӧмә.

[24] Гава п'алди, те нәтьрси у гава хәwр'а һәр'и, хәwа тәйе ширьн бә.

[25] Те жь хофа ньшкева нәтьрси, нә жи жь фьзьрдумана нәп'ака, гава ль сәр тәда бе.

[26] Чьмки Хӧдане гӧмана тә бә, Әwе ньге тә хwәй кә, кӧ нәк'әвә т'әләке.

[27] Гава жь дәсте тә те, кӧ алик'арийа дәсттәнга бьки, хwә жь ве йәке нәдә паш.

[28] Нәбежә һәвале хwә: «Һәр'ә щарәкә дьн wәрә, әзе сьбе бьдьмә тә», wәки щәм тә һәйә.

[29] Һьндава һәвале хwәда т'ьвдира хьраб нәкә, чьмки әw бь гӧман ль щәм тә дьминә.

[30] Щийе бадиһәwа qьр'ька мерьв нәгьрә, wәки wан хьраби ль тә нәкьрийә.

[31] Һ'әвсудийа мәрьве зордар нәкә, т'ӧ щар хwә ль р'екә wан нәгьрә.

[32] Чьмки мәрьве qәлп, ль бәр ч'ә'ве Хӧдан зьвер ә, ле бәле Әw һәвале сьтqе дьле р'аст ә.

[33] Ньфьр'а Хӧдан ль сәр мала нәп'ака йә, ле Әw дӧа ода р'аста дькә.

[34] Әw пек'әнийа дьк'әнә, ле к'әрәме дьдә шкәстийа.

[35] Сәрwахте р'умәте wар бьн, ле ахмахе бер'умәтийе.