Мәсәлә 27
[1] Пе р'ожа сьбе нәфьр'ә, чьмки тӧ ньзани әw р'оже чь бинә.
[2] Бьра хәлq пәсьне тә бьдә, нә кӧ дәве тә, йе хәриб, нә кӧ заре тә.
[3] Кәвьр гьран ә у qум жи бар ә, ле һелане ахмаха жь һәр дӧйа гьрантьр ә.
[4] Хәзәб беисаф ә у һерс лейи йә, ле к'и дькарә ль бәр к'ӧмр'әшийе бьсәкьнә.
[5] Һьлатьна ашкәла, жь һ'ьзкьрьна вәшарти четьр ә.
[6] Бьринед пешәwьтийа амьн ьн, р'амусанед нәйара п'ьр' ьн.
[7] Зьке т'ер п'е ль һьнгьве һелуне дькә, ле бона зьке бьр'чи һәр тьште тә'л ширьн ә.
[8] Мәрьве щи-wаре хwә һьшти, чаwа ч'ьвика һелуна хwә һьшти.
[9] Р'ун у бьхур дьл ша дькьн, ширьнайа һәвалтийе жи жь ширәтед qәнщ.
[10] Дәст жь һәвале хwә у һәвале баве хwә нәк'ьшинә, р'оже хwәйә охьрме гьранда нәчә дәре бьре хwә, щинаре незик жь бьраки дур четьр ә.
[11] Кӧр'е мьн, сәрwахт бә у дьле мьн ша кә, кӧ әз бькарьбьм щаба qардаред хwә бьдьм.
[12] Йе аqьл хьрабийе кӧ дьбинә һ'әвза хwә дькә, ле йе дьлсах пешда дьчьн у зьраре дьбинә.
[13] Йе бу wәк'иле хәрибәки, qап'уте wи һьлдә, йе бу wәк'иле жьнәкә нәнас, к'әфил жь wи һьлдә.
[14] Йәк кӧ һәр сьбәһа зу р'абә у бь дәнг бьльнд дӧа йәки бькә, әв йәке бәр ч'ә'ве wи мәрьви ньфьр' бе һ'әсабе.
[15] Р'ожа ч'ьлкә-ч'ьлка баране у жьна бәдә-шәр'уд мина һәв ьн,
[16] йе кӧ бьхwазә wе бьгьрә, әw чаwа бьхwазә байе бьгьрә, йан жи чаwа к'ӧлма хwәйә р'астеда р'ун хwәй кә.
[17] Чаwа һ'әсьн бь һ'әсьн те тужкьрьне, ӧса жи мәрьв һ'әсьне һәвале хwә йә.
[18] Йе кӧ дара һежире хwәй дькә, бәре wе дьхwә у йе кӧ ахайе хwә хwәй дькә, те qәдьркьрьне.
[19] Чаwа аведа р'у ль бәр р'у йә, ӧса жи дьл мерьв, мерьв дьдә к'ьфше.
[20] Чаwа дийаре мьрийа у гәлийе һәй-wайе т'ер набьн, ӧса жи ч'ә'вед мерьв т'ер набьн.
[21] Чаwа фьр'нә зив дьщер'ьбинә у к'урә жи зер', ӧса жи мәрьв бь пәсьндайине те щер'ьбандьне.
[22] Һәгәр ахмах т'әви дә'н бь мерк'ӧт бьк'ӧтьн, йәк ә диса әw жь ахмахтийа хwә вәнагәр'ә.
[23] Ль сәр һ'але пәзе хwәда р'ьнд бьньһер'ә у дина хwә бьдә кәрийед хwә,
[24] чьмки дәwләт һәр т'ьм наминә у т'ащ qӧр'нә-qӧр'нә наминә.
[25] Шинайи те дьруне, ч'ера ну дәрте, гиһайе сәре ч'ийа лод дькьн,
[26] к'ьнщед тә жь бәрха тен у нери жи бона һәqе ә'рде нә.
[27] Шире бьзьне бәси хwарьна тә, хwарьна мала тә у идара щарийед тә йә.