<Мәсәлә 24

[1] Һ'әвсудийе ль мәрьвед хьраб нәкә у дьле тә бьра т'әви wан нибә,

[2] чьмки дьле wан ль сәр зордарийе дьфькьрә у дәве wан ль сәр хьрабийе хәбәр дьдә.

[3] Бь сәрwахтийе мал те чекьрьне у билантийе те qәдимкьрьне,

[4] пе заньстийе һьндӧр' бь һәр тьштед бьһа у хьшьред һ'әwаск'арва те т'ьжикьрьне.

[5] Мәрьве аqьл зор дьбә у мәрьве занә зәхьм дьбә,

[6] чьмки шәр'е хwә кӧ дьки, дьди бәр һ'әсаба у сәрк'әтьн бь гәләк ширәтк'ара те.

[7] Сәрwахти бона ахмах гәләки бьльнд ә, дәргәһ-диwанеда әw нькарә дәве хwә вәкә.

[8] Әwе дьфькьрә хьрабийе бькә, wир'а дьбежьн: «Йе мьхәнәт».

[9] Фькьра ахмахтийе гӧнә йә у пек'әни ль бәр ч'ә'ве мәрьв зьвер ә.

[10] Һәгәр тӧ тәнгасийеда дьлсьст би, кӧ ӧса йә тӧ нә хӧрт и.

[11] Йед мьрьнер'а тенә бьрьне хьлаз кә у хwә жь йед кӧштьнер'а дайи нәдә паш.

[12] Һәгәр бежи: «Бәле мә әв йәк ньзаньбу», аwа йе дьла занә, әw һаш пе һәйә, йе кӧ сәр тәда дьньһер'ә wе йәке занә у wе һәр кәси wәкә ә'мәлед wан бьдә.

[13] Лаwе мьн, һьнгьв бьхwә чьмки хwәш ә у һьнгьве һелуне кӧ ширьнә бона дәмахе тә,

[14] ӧса жи сәрwахти наскьрьне ль нәфса тә ширьн бә, һәгәр тӧ wе бьбини ахьрийа тәйе хер бә, бе гӧман наби.

[15] Һәй нәп'ако! Хwә ль мала р'астада нәтәлинә у һеwаргәһа wи wеран нәкә,

[16] чьмки, һәгәр йе р'аст һ'әфт щара бьк'әвә, wе диса р'абә, ле нәп'аке хьрабийеда сәрсери бен.

[17] Гава дьжмьне тә бьк'әвә ша нәбә у гава ньге wи бьльк'ӧмә, дьле хwә wи ша нәкә,

[18] нәбә кӧ Хӧдан ве йәке бьбинә Wи хwәш нәйе у Әw һерса Хwә ль нәйар дайнә.

[19] Дьле хwә һьндава хьрабада т'ьжи нәкә у һ'әвсудийе нәп'ака нәкә,

[20] чьмки хера ахьрийа йе хьраб т'ӧнә, ч'ьра йе нәп'ак wе весә.

[21] Лаwе мьн! Жь Хӧдан у п'адше бьтьрсә у т'әви йед сәрһьлдайи мьqабьли wан нәбә,

[22] чьмки бәлайе ньшкева бе сәре wан у к'и занә жь Хӧдан у п'адше wе чь бьбә ль wан.

[23] Әв жи готьнед сәрwахта нә: Диwанеда фьрqикьрьн нә баш ә.

[24] Әwе кӧ йе нәп'акр'а бежә: «Тӧ р'аст и», ел-ә'шире ньфьр'а wи бькьн у мьләте әwи беһӧрмәт кьн,

[25] ле йед кьре wан бьдә р'уйе wан, wе бәхтәwар бьн у хер у хwәшийе ль сәр wанда бьбарә.

[26] Щаба р'аст, чаwа лев р'амусан.

[27] Т'ьвдарәке шьхӧле дәр бькә у ә'рде хwә ль сәр һәвда бинә, паше мала хwә че кә.

[28] Бе сәбәб нәбә шә'де һьмбәри һәвале хwә у бь дәве хwә нәхапинә,

[29] нәбежә: «Әви чь сәре мьн кьр, әзе жи ӧса сәре wи бькьм, wәкә кьред wи әзе ле вәгәр'иньм».

[30] Әз ль бәр ә'рде хwәр'анәдити у р'әзе тьрийе кемаqьлр'а дәрбаз бум,

[31] ва йә һ'әму стьри дәрк'әтьбун у р'уйе wан гәз-гәзәкева гьрти бун, суред кәвьри жи һьлшийайи бун.

[32] Гава әз ч'ә'в пек'әтьм, мьн да һ'ьше хwә у мьн дина хwә дайе, хwәр'а кьрә дәрса хwә:

[33] Һ'әта һьнәки р'азейи, һьнәки бьп'оньжи, һьнәки дәстед хwә бьди ль сәр һәв п'алди,

[34] һьнге к'әсибийа тәйе мина р'еwики дьз ль сәр тәда бьгьрә, дәсттәнгийа тәйе жи мина qачахәки.