[1] ࢽَیِ غَرِوُسُو، ࢻَࢽُّواْ، بُوࢽٜ ࢽَیِیَ ࢽجَوَࢽْدِ ࢽَࢽْغَرُو یِرُواْ، بُرْوُ یَکُّواْ!
[2] أَرْسِیࢽْدُو یٜ بَࢽَّدْࢽَ، کَجْمُࢽْدُو یٜ کَࢽَمْبٜ جُوُࢽَ،
[3] کَرٜࢽْدُو دِࢽَرّٜیَ رِوُلَّیٜیَ یٜرُو دِوُرَمْ ثِجْغْࢽَ، کُورُو دِوُرَمْࢽْجَ ࢽَࢻْتُ شٜدَیٜ ࢽجَدّٜ کَࢽُّ غَیْ تِیࢽْدُو جُوُیْ؞ جَمَࢽْ دَرْیٜىٰ أَدْمَࢽْ أَرْسِیے ثَمُّوَّ!
[4] أَکُّو ࢽغْࢽْوُرَمْ دُوُوࢽْ کِدَوُ کُلُوࢽْدُو کَلَجَࢽَرُو ࢽجُو وَࢽُوَّدْ کْلَࢽْدُوࢽْ سُو ثْدِ، کُورُو سُو کَلَوُیٜدْ سْمُو کْمَࢽْدٜ مَرْتَوَمَیٜدْرُو ࢽغَاࢽَ؞
[5] دُࢽِیَلَࢽْ ثُرُو لَرَسُوَ کْجِ ࢻَࢽْدَایٜࢽْ دْغَوَّ؞ یِمْ دُوَیٜرُو کَرْوُࢽْدُووَ کَیْسُوَرُو دِوَّ؞
[6] جِرٜمَا شَرَࢽُوٜ یٜجُوَّ؞ کَمْبِوُࢽْجَیْوَوُو؞
[7] أَدْ ࢽَࢽْغَرُو، کْرَمِیَ، حَرْ کْࢽْدٜ کْمَیٜرُو کَࢽَدِ تَیْوُو! أَکُّو بَرٜمَدْ ࢽٜمَ تَمَࢽَّ کَࢽَدِلَࢽْ غُرٜجِ، حَرْ دْلَوُ بُرْوُویٜیَ دَرْیٜىٰیَ ثُوَࢽْدِرُو؞
[8] ࢽَیِ یٜ کَࢽَدِ تَیْوُو، کَرْوُࢽْدُورُو دُࢽُو یَکُّواْ، کْࢽْدٜ کْمَیٜدْ دٜلْ کَرْࢽْجْࢽَ ࢽَࢽْغَرُو؞
[9] کْرَمِیَ، بَرٜ کْلَ کَمَࢽْدُویٜࢽْ سُو دِوِّ؞ أَدْ غْࢽِیَ، اللَّه ࢽَیِیَ شَرَࢽْجَیْ؞ أَکُّو شَرَمَدْ ثِࢽَّلَࢽْ دَادَ!
[10] کْرَمِیَ، ࢽَوِیَ ثُ کْمَࢽْدٜىٰࢽْ مَࢽَجَࢽَدَ مِسَلْ بُوࢽٜ ࢽجَا کَࢽَدِ تَایٜرُو ࢽغُوࢽُواْ؞
[11] أَکُّو أَمْ ثُرُو بُوࢽٜىٰࢽْ ࢽٜثَّࢽَدَ بَرْغَارُو ࢽغُوࢽِیٜ؞ کَࢽَدِ ࢽَوِ أَیُبَیٜدْ یٜیَ ࢻَࢽُّوَّ، کُورُو أَوُو کْمَࢽْدٜ تِرُو دَرْیٜرَمْࢽِࢽْ ثْدّْࢽَدْ یٜیَ رُوَّ؞ أَوُووَ کْمَࢽْدٜدْ ࢽجُࢽُودُمَ یٜ، کَࢽْجِمَرِمَ یٜ؞
[12] أَوِ یَیٜرُو بُرْوُوࢽُّو، کْرَمِیَࢽِ، بَرٜ کَࢽْسِ بُوِّ، ثُ سَمٜىٰࢽْ کَلْ، بِ ثِدِیٜࢽْ کَلْ، بِ أَوُو غَدٜىٰࢽْ کَلْ؞ ࢽغْلَࢽْجُدْ «آه،» بِ «أَعَ،» وُلُّواْ؞ أَدْ غْࢽِیَ، شَرَ ࢽجَدَیْ؞
[13] کَمْࢽْدُو لَا بُوࢽٜ ثَیْ وَ؟ اللَّهَ ثُوُورُو؞ لَا یٜ کْجِ ࢻَࢽْجِ وَ؟ أَیْیَ ࢽجُࢽْغُورُویٜ یٜجُو؞
[14] کَمْࢽْدُو لَا دُوࢽْدِ وَ؟ أَمْوُرَوَ جَمَ اللَّهیٜیَ بُواْجُو إِسَ ثُ کْمَیٜࢽْ کْلَࢽْجُرُو کْࢽْدَوُ جَیْتُࢽّٜ ࢻِجَغَیْیَرُو تِرُو مُودُوَ ثَدُّو؞
[15] مُودُوَ کَمْبْرْسٜىٰدْ کَمْ دُوࢽْدِدَ إِسَࢽْغَجِیٜ کْمَ تِیَ ثْسَࢽْغِ؞ کُورُو بِوُ ثْدْࢽَرُو وَلْیٜࢽُووَ، غَوَرَ ثُوَࢽْدِ؞
[16] أَدْ ࢽَࢽْغَرُو بِوُࢽْدُو أَمَࢽْدُورُو وُلْغْࢽُواْ، مُودُوَ أَمَࢽْدُورُو یِدُّواْ، ࢽغَیْࢽِࢽْ ࢽغَࢽُوِ؞ مُودُوَ کَمْ جِرٜمَیٜدْ جَوْرُو کْࢽْدُوُووَ؞
[17] ࢽَوِ إِلْیَدْ کَمْ أَࢽْدِ غَیْ، کُورُو بَرٜ إِࢽْغِ ثُدُرْࢽِّرُو اللَّهَ تَیْ دَجٜ لُواْیٜࢽِّیَ، ثِدِدْلَࢽْ سَا یَکُّ کْࢽْدَوُ أَرَکُّوَرُو إِࢽْغِ ثُدُرْࢽِّ؞
[18] کُورُو وَلْدٜ اللَّهَ لُواْیٜࢽِّیَ، سَمٜلَࢽْ إِࢽْغِ ثُدُرٜ ثِدِ یٜ ࢽٜمَࢽْجُ کٜکُّو؞
[19] کْرَمِیَࢽِ، کَمْࢽْدُو لَا جَوَلْ جِرٜىٰ کُولْجٜ کَمَࢽْجُ تِیَ جَوَلُّو کَلَکْثٜ ثَکِّیَ،
[20] أَدَ ࢽُوࢽُواْ: کَمْ دُوُوࢽْ بِوُمَا جَوَلُّو کَلَکْثٜ ثَکّْࢽَمَدْ رُوࢽْجُ کَرْمُولَࢽْ ثْکَّاࢽَ، کُورُو بِوُ کَدَ جَکْثْࢽَ؞