[1] أَوِ لَوَلَ سُو، کَمْبِوُ سُو کَتّٜࢽْدُورُو ثُوُدِ؟ مْرَدُࢽْدُو دِوِسُو کَرْوُࢽْدُولَࢽْ مْلْدَیْدْمَࢽْ غْࢽَ إِسَیْ؟
[2] أَوُو لَا رَاوَّ دُوُوࢽْ ࢻَࢽْدُوَّوُووَ، کَمْ یٜجُوِ؞ کُورُو أَوُو لَا مَࢽْغَرْࢽُوَّ دُوُوࢽْ رَࢽْغُوٜ ࢻَࢽْدُوَّوُووَ، کَتّٜࢽْدُوࢽْ کَمْبِوُ دِوِ یٜ، مْلْدُوِ یٜ؞ اللَّهَ کُورُوِّ ࢽَࢽْغَرُو ࢻَࢽْدُوَّوُو؞
[3] کُورُوِ دُوُوࢽْ ࢻَࢽْدُوَّوُو، مْرَدُࢽْدُو دِوِسُو غَلْدُرُو ࢽِیَدِوِࢽْ کُورُوِ ࢽَࢽْغَرُو؞
[4] ࢽَیِ کْࢽْجْࢽَمَسُو، ࢽَࢽْسَوَ دُࢽِیَیٜدْ ࢽَࢽْکْلَدُو اللَّهیٜرُو ࢽُوࢽُوِّ وَ؟ أَدْ ࢽَࢽْغَرُو وُࢽْدُ دُوُوࢽْ سَوَ دُࢽِیَیٜرُو وَلْدُ ثْرَاࢽَمَدْ کْلَࢽْجُوَ کْلَدُو اللَّهیٜرُو کَلَکْثِ؞
[5] رَ، دَلِلْ بَوُووَلَࢽْ کِتَوُیٜ: «رُحُࢽْجُ کَرْوُࢽْدٜرُو ثَکّْࢽَدْرُو کٜمِ کَسَثِّوَوُو،» ثْࢽَّ غْࢽَ تْمَࢽُوْ؟
[6] أَمَّ اللَّه ࢽَ کُوجْࢽَرُو سٜرْ ثِ؞ أَدْمَرُو کِتَوُیٜ: «اللَّهدْ رُوکُرَوُوَ وَجْࢽَ، أَمَّ رُوکُرَࢽَمْبُوُرُو سٜرْࢽْجُ ࢻْلٜجِیے،» ثْࢽَّ؞
[7] أَدْ ࢽَࢽْغَرُو اللَّهرُو دَوْ کُولْغْࢽُواْ، إِوُلِیسَّ وَࢽُواْ، ࢽَیِࢽْ کُرُوُࢽُّو ثْغَسٜ لٜجِ؞
[8] اللَّهَ کَرْࢽُّواْ، تِ یٜ ࢽَیِیَ کَرْࢽّجَیْ؞ ࢽَیِ بِوُمَسُو، مُکُّوࢽْدُو کِدَ بِوُیٜࢽْ تُلُّواْ؞ ࢽَیِ ثُرُو یِࢽْدِیَسُو، کَرْوُࢽْدُو تَیِرُّو کَلَࢽْغُواْ؞
[9] کَرْوُکُتَّ دٜوُو، جَجٜࢽُواْ، یِرُواْ؞ کَسُسُࢽْدُووَ سُولَࢽْ ࢻَلُّواْ، کَرْوُکْجِࢽْدُووَ کَرْوُکُتَّرُو کَلَࢽْغُواْ؞
[10] ࢻُوُ کْمَࢽْدٜىٰࢽْ رُوکُرَ بَوُووَرُو وَلُّواْ، تِ یٜ ࢽَیِیَ جَجَࢽّجَیْ؞
[11] کْرَمِیَ، بَرٜ کَتّٜࢽْدُوࢽْ أَدْلَمْدُوِّ! کَمْ دُوُوࢽْ کْرَمِࢽْجُوَ أَدْلَمْجِ بِ شَرَجِدْ وَدَدْمَا أَدْلَمْجٜ شَرَجِ؞ کُورُو وَدَدَ شَرَࢽْمِیَ، ࢽِ وَدَ غَمَ غْࢽِ، شَرَمَࢽْجُرُو وَلّْمِ؞
[12] اللَّه وَدَ ࢽجُومَ یٜ، شَرَمَ یٜدْ تِلُو، تِ دُوُوࢽْ ࢽَࢽْجُࢽْ کْࢽْدُوُو ࢽجْکَّوُویٜیَ سِدُوُیٜیَ مبٜجِ؞ أَمَّ ࢽِدْ، ࢽِ وُࢽْدُ دُوُوࢽْ کَمَࢽْمْبَ شَرَࢽْمِدْ؟
[13] تُو، ࢻَࢽُّواْ ࢽَیِ دُوُوࢽْ: «کُ بِ بَرِ بْرْࢽِ لَارُو لٜࢽِیٜ سَا ࢻَلُّو ࢽَدْࢽْ ࢽَمِّیٜ سَوُرْ دِیٜ رِوَ ࢻَࢽْدِیٜ،» ࢽُوِدْ؞
[14] أَوُو بَرِ وَکَّجِمَ ࢽُوࢽُوِّ؞ رُوࢽْدُودْ أَوِ؟ ࢽَیِدْ بَࢽْدْغْࢽٜ ࢻْلٜدْࢽٜ جْمْ ثْدِیَ، بَوُورُو وَلْجِدْ غَیْ؞
[15] ثُجُدْرُو: «کْمَࢽْدٜ کَسَثِّیَ، دْغَیْیٜ أَدَ تُودَا دِیٜ،» وُلْدُدْ ࢽَیِرُو وَجِمْࢽْجَاࢽَ؞
[16] أَمَّ أَکُّو کْلَ رُوکُرَࢽْدُویٜࢽْ أَوُلُو بُوِ، أَوُلُو بُو جِرِ أَدْغَیْ سَمَّ جَوْرُو دِوِ؞
[17] ࢽُوࢽُواْ، کَمْ ࢽغْلَ دِیُو ࢽُوجْࢽَ دُوُوࢽْ ثْدْࢽِّمَدْ بِوُ ثْدْࢽَ؞