[1] کْرَمِیَࢽِ، بَرٜ ࢽغْوُࢽْدُو مَلْمْبَرُو وَلْجَࢽِّ، أَࢽْدِ مَلْمْبَدَ ࢽَࢽْجَوْ کُوجْࢽَلَࢽْ شَرَسَیْرُو ࢽُوࢽُوَّ؞
[2] أَوُووَ أَࢽْدِ سَمَّ ࢻُدُ کَدَࢽْ تَلِّیٜ؞ کَمْ لَا مَࢽَࢽْجُࢽْ تْمَّرُو تَلْجِوَوُووَ، تِ کَلْکَلُّو وَلْجْࢽَ، کُورُو رَکْثٜ تِیࢽْجُ سَمَّ یٜیَ رُوجِ؞
[3] ࢻْرَّ أَوُو رَیِیٜࢽَ ثَدُورُو ثِࢽْجَرُو رِجَمْ یَکِّیٜیَ، تِیࢽْجَ سَمَّ یٜیَ یَکِّیٜ کَࢽْجِ رَیِیٜࢽَدْرُو لٜجَیْ؞
[4] کُورُو مَارَوَ إِࢽْغِیٜ یٜ رُیْوُو؞ تَیِدْ جَوْرُو کُرَ دُوُوࢽْ، کَرُوَ دُࢽُووَ تَیِیَ تْمْبَلْجِ یَیٜ، مَارَمَدْ کْرِدُرَمْ تْࢽْغْرِمَࢽْ ࢽَ ثْرَاࢽَرُو کْرِجِ؞
[5] جِرِ أَدْغَیْࢽِࢽْ تْلَمْدْ یٜ أَوُو جَوْرُو تْࢽْغْرِ، أَمَّ أَوُلُوࢽْجُ جَوْرُو کُرَ! کُورُو جِرِ کَࢽُّ تْࢽْغْرِ دْرْ کُرَرُو کَࢽُّ ثْتَّیْدَ رُیْوُو؞
[6] تْلَمْدْ کَࢽُّ! دَوُ ࢽَشَوَ تِیࢽْدٜىٰࢽْ تِمَ ࢻْرْدُ جِرٜࢽَمْبُ جِرِ ࢻِیٜ یَیٜ وُو؞ تِیے سَمَّا بَࢽَّجِ، رُو سَمَّرُو کَࢽُّ ثْتَّیْ، کُورُو ࢻْرْدُࢽْجُلَࢽْ کَࢽُّ جَاࢽَمَیٜ کْرْغَ؞
[7] أَوُووَ أَدَمْغْࢽَ بُࢽْدِ سُو، ࢽغُدُو سُو، لْمَࢽْ ࢽغَࢽْجِࢽْ غْرْدَمَ سُو، أَلَوْ إِࢽْغِیٜ سُو جِرِ ࢻِ یَیٜیَ رَکْثٜ رُوجِ، حَرْ تَیِیَ رُوجْࢽَ،
[8] أَمَّ وُࢽْدُمَ رَکْثٜ تْلَمْبَ رُوجِوَوُو! تِدْ أَوُو دِوِ تْمَّرُو غْمْ ࢽَࢻْثِوَوُو، سُمْ کَرْمُویٜࢽْ ثَࢻْ ثْمْبْرْࢽَ؞
[9] تِلَࢽْ کْمَࢽْدٜ بَوَدَ یُࢽْغُورِیٜ، کُورُو تِلَࢽْ أَمْ ثَمُࢽُو اللَّهیٜࢽْ أَلَکَّدَا بَسْکُࢽِیٜ؞
[10] ثِ تِلُودْمَࢽْ ࢽجُࢽْغُورُووَ بَسْکُدُوَدْ ثَلُوِ؞ کْرَمِیَࢽِ، أَدْ وَجِࢻْثْࢽِّ؞
[11] سِمْ إِࢽْغِیٜ بْلَا ࢻَلْࢽِࢽْ إِࢽْغِ کْجِیَ ثْمْبَ ࢻِجِ وَ؟
[12] کْرَمِیَࢽِ، یَ تَرْمُیٜ رَکْثٜ جَیْتُࢽْ ثَکِّ وَ؟ رَ، یَ إِࢽَبّٜ تَرْمُ ثَکِّ وَ؟ سِمْ إِࢽْغِ مَࢽْدَمَࢽْدَ یٜ رَکْثٜ إِࢽْغِ کْجِ ࢻِجِوَوُو؞
[13] وُࢽْدُࢽْدُو ࢽَࢽْرَشِدُوَ حَࢽْغَلَّا وُو؟ کْࢽْدْغَیْ ࢽغْلَلَࢽْ کْࢽْدُوࢽْجُ رُوکُرَ بَوُو ࢽَࢽْرَشِدُلَࢽْ إِسِدَ ࢻْلٜجُو!
[14] أَمَّ کَرْوُࢽْدُوࢽْ ࢽَࢽْدْرِ جَوْوَ کْلَ رَوُووَ مٜࢽَّا، بَرٜ أَوُلُو بُوِࢽْ جِرٜدَ وَࢽُوٜ کَتُّوُ کَمُّوِّ؞
[15] أَدْ ࢽَࢽْرَشِدُ سَمٜلَࢽْ جْࢻْثْࢽَ غْࢽِ، تِدْ دُࢽِیَیٜ، حَلْ أَدَمْغْࢽَیٜ، کْلَدُودْیٜ؞
[16] ࢽَ دُوُوࢽْ ࢽَࢽْدْرِیَ کْلَ رَوُووَ دَسَاࢽَدْ، حَࢽْغَلْسَࢽْغُووَ کْࢽْدُو دِوِ جِرِ جِرِیَ یٜ مبٜجِ؞
[17] أَمَّ ࢽَࢽْرَشِدُ سَمٜىٰدْ بُرْوُوࢽْ تَیِرْ، دَجِ ࢽَࢽْلٜوَ کُدُومَ، رُوکُرَ بَوُووَ، سُولُو رَوُومَ، جَوْرُو کَࢽْجِمَرِمَ یٜ، سٜرْمَ یٜ، غَیِرْدُ بَوُووَ، ࢽَࢽْمْࢽَࢻْکْ بَوُووَ؞
[18] ࢽُوࢽُواْ، أَمْ ࢽَࢽْلٜوَ ثَوُدٜ ࢽَࢽْلٜوَࢽْ ثَࢽَدِمَدْ ࢽٜمَ ࢽَࢽْجِرٜىٰ کَلَجَیْ؞