[1] وُمَ بِتُرُسْ کْࢽْغَیَمْ عِیسَى أَلْمَسِیوُیٜدْ سِکُدُووَ کْرٜیَدَ لَرْدُ ࢻَࢽْتُسّٜیَ غَلَتِیَیٜیَ کَࢻَدُوکِیَیٜیَ أَسِیَیٜیَ بِتِࢽِیَیٜیَرُو تَتَرْغَادَرُو،
[2] وُوتّٜ ࢽَیِ دُوُوࢽْ اللَّه بَوَدْ ثَمَࢽْ ࢽَیِیَ ࢽُوࢽْجَࢽَ یٜ، رُحُࢽْجُیٜࢽْ ࢽَیِیَ جِرٜوُرُو ࢽجَدْࢽَ یٜ، عِیسَى أَلْمَسِیوُوَ غَیْوُو جْجْرْدُوُ بُࢽْجُیٜلَࢽْ تَیِرُّو وَلُّواْرُو کْرٜࢽْجَࢽَ یٜدْرُو: سٜرَّ ࢽَࢽْلٜوَا ࢽَیِࢽْ ࢽغْوُجَ!
[3] بَرْغَا اللَّه بَوَ کْمَࢽْدٜ عِیسَى أَلْمَسِیوُیٜ! کَࢽْجِمَرِࢽْجُ کُرَدْرُو کَرْمُولَࢽْ ثِدُ عِیسَى أَلْمَسِیوُیٜࢽْ أَࢽْدِیَ سَسَکّٜ بْرِࢽُّو تْمَ رُووَ لَارُو تَمْبِیٜࢽَ؞
[4] تْمَ رُووَدْ تِمَ وَرَسَ ࢽجْࢻْثِوَوُو یٜ، تَیِرْ غْࢽِرُو وَلْجِوَوُو یٜ، کُورُو رِمْجِوَوُو یٜ، ࢽَیِ ࢽَࢽْغَرُو سَمٜلَࢽْ غْࢽَادَ وُو،
[5] ࢽَیِ دُوُوࢽْ کْࢽْدُوُو اللَّهیٜ کَمْبْرْسٜىٰࢽْ ࢽَیِیَ ࢽجَرِوٜ ࢽَیِرُو ࢽجْکَّوُو جَمَࢽْ دَرْیٜىٰࢽْ ࢻْلٜدِیرُو دَبَّرْغَادَا ࢽجَدِّدْ؞
[6] کْلَ أَوُو أَࢽِیٜࢽْ، کْرْمَ کَوُ غَࢽَرُو جَرَࢻْتَ جِرِ جِرِرُو کَرْوُکُتَّ ࢻَࢽُّوِ یَیٜ، کَرْوُࢽْدُو تَیْ دَجٜ کْجِجْࢽَ؞
[7] دَلِلْ جَرَࢻْتَ أَࢽِیٜدْ، تِمَ کَمْبْرْسٜࢽْدُو تَبَّتُّو ثُلُوُورُو؞ دِࢽَرْدْ أَوُو سِدِیے یَیٜ، تِیَ کَࢽُّࢽْ جَرَࢻْثَیْ، أَمَّ کَمْبْرْسٜࢽْدُودْ دِࢽَرَّ تَمَࢽْلَࢽْ کُوجْࢽَ، کُورُو یِمْ ࢻْلٜدُوُ عِیسَى أَلْمَسِیوُیٜࢽْ ࢽجُࢽْغُورُووَ دَرَجَا بْرْسْمْبَ ثُوُدِ؞
[8] تِیَ رُوِّ یَیٜ، رَاوَّ، کْرْمَ تِیَ رُوَّوُو یَیٜ، مْرْسَࢽُوَّ، کُورُو کَرْوُکْجِ دَمَ بَوُو وُلْدُمَرُو یُوجِوَوُو یٜ ࢻَࢽُّوِ،
[9] أَوُووَ لٜدُوُرَمْ کَمْبْرْسٜࢽْدُویٜ، وُوتّٜ ࢽجْکَّوُو رُوࢽْدُویٜدَ ࢻَࢽْدُوِ؞
[10] ࢽجْکَّوُو أَدْ، ࢽَوِیَ دُوُوࢽْ کْلَ سٜرْ کَاࢽدُورُو وَلْجِدْیٜࢽْ مَࢽَجَࢽَدْ کْلَ تِیٜࢽْ مَجَࢽٜ حَࢽْغَلَّیٜࢽْ کٜکٜوُورُو؞
[11] رُحُ أَلْمَسِیوُیٜ تَیِلَࢽْ دْغَࢽَدْ کُرٜࢽْ کْلَ بُوࢽٜ أَلْمَسِیوُیٜیَ دَرَجَ ࢽغَوُوࢽْجُࢽْ جْغَیْدَیٜࢽْ مَࢽَجْࢽَ، دَجِ ࢽَوِیَدْ کْلَ وُࢽْدُوَ جَمَࢽْ جِرِ ࢻِیَیٜࢽْ مَࢽَجْࢽَدَ ثَثَوُورْࢽَ؞
[12] أَسٜ، تَیِ کْلَࢽْجَرُو غْࢽِ، ࢽَیِرُو کِدَ ࢽجَدّْࢽَرُو أَسُیٜرَ؞ کْرْمَ رُحُ اللَّهیٜ سَمٜࢽْ جُوَجَࢽَدْیٜࢽْ کَوُرِ کْجِ أَدَ ࢽَیِ یٜرُو وُلْࢽْجَاࢽَ، کَوُرِ دُوُوࢽْ مَلَیْیَوَ تِیَ ࢽُودُرُو مَجَیْدْ؞
[13] أَدْ ࢽَࢽْغَرُو حَࢽْغَلْدْࢽُواْ، کْلَࢽْدُو رِوُواْ سٜرْ دُوُوࢽْ یِمْ عِیسَى أَلْمَسِیوُ ࢻْلٜدِییَ ࢽجَدِدْرُو تْمَࢽْدُو تْغْمْبُو یَکُّواْ؞
[14] تَدَوَ کْࢽْغَیْمَسُو غَیْ، مَࢽْغَرْ دِوِ ثَیٜ سَ ࢽُودُࢽَمْبُیٜࢽْ دْغَوَّدَ وَࢽُواْ،
[15] أَمَّ تِ ࢽَیِیَ بُواْࢽْجَࢽَدْ تَیِرْدْ غَیْ، ࢽَیِ یٜ کْࢽْدْغَیْࢽْدُو سَمَّࢽْ تَیِرُّو وَلُّواْ،
[16] دَلِلْࢽْجُدْ کِتَوُلَࢽْ رُوُوَدَ: «وُ تَیِرْ ࢽَࢽْغَرُو، تَیِرُّو وَلُّواْ!»
[17] تِ دُوُوࢽْ غَیِرْجِوَوُولَࢽْ کِدَ وُࢽْدُیٜ یَیٜیَ شَرَجِدَ بَوَلَࢽْ بُواْࢽُوِیَ، اللَّه رِدَلَࢽْ کْࢽْدْغَیْࢽْدُو ࢽَࢽْسِکُدُویٜدَ دٜوُو؞
[18] ࢽُوࢽُوَّ، ࢽَࢻْتُࢽْدُو بُووُ کَارِیَࢽْدُوࢽْ وَرَسَࢽُوَّدْلَࢽْ مٜرُࢽْغٜرَ، أَمَّ رِوُلَّ سُو، دِࢽَرْ سُو ࢽجْࢻْثَیْیٜࢽْ غْࢽِ،
[19] بُ أَلْمَسِیوُیٜࢽْ، وُوتّٜ بُ دَرَجَا تَمَ بَلُو سُو، أَوُو وَادَ سُو بَوُووَیٜ غَیْیٜࢽْ؞
[20] کَوُ دُࢽِیَ أَلَکْتِرُو اللَّه تِیَ کَدَرْجْࢽَ، أَمَّ جَمَࢽْ دَرْیٜىٰ أَدْࢽْ ࢽَیِ ࢽَࢽْغَرُو ࢻْلٜدْغْࢽَ؞
[21] تِیٜࢽْ ࢽَیِدْ اللَّه دُوُوࢽْ تِیَ کَرْمُولَࢽْ ثْسَࢽْغٜ تِرُو دَرَجَ ثِࢽَدَ کَسَدُّوَّ؞ ࢽغَیْࢽِࢽْ کَمْبْرْسٜࢽْدُووَ تْمَࢽْدُووَ اللَّهلَࢽْ کْرْغَ؞
[22] جِرٜدَ غَوٜ أَمَࢽْدُووَ ࢽَࢽْمْࢽَࢻْکْ بَوُووَلَࢽْ رَوُورُو کْلَࢽْدُو تَیِرْࢽُوَّدْ، کَتّٜࢽْدُوࢽْ کَرْوُ تِلُووَࢽْ جَوْرُو تْرَوُواْ،
[23] بْرِࢽُّو تَمْبُوَّ ࢽَࢽْغَرُو؞ تَمْبُوࢽْدُودْ، کَسُࢽِ ࢽجْࢻْثِمَلَࢽْ غْࢽِ، ࢽجْࢻْثِوَوُولَࢽْ، وُوتّٜ مَࢽَ اللَّهیٜ رُووَ سَوِسُورُو دْغَیْدْیٜلَࢽْ؞
[24] أَوُووَ: «آدَمْغْࢽَ سَمَّ کَجِمْ غَیْ، دَرَجَࢽْجُ سَمَّ یٜ ࢻْرٜ کَجِمْبٜیَ ثَمُࢽْ؞ کَجِمْدْ ࢽغَمْجِ، ࢻْرٜدْ یٜ ثُرِ،
[25] أَمَّ مَࢽَ اللَّهیٜ سَوِسُورُو دْغَیْ؞» مَࢽَ أَدْ تِمَ کَوُرِ کْجِ ࢽَیِرُو وُلْࢽْجَاࢽَدْ وُو؞