[1] کْرَمِیَࢽِ، کْمَࢽْدٜ عِیسَى أَلْمَسِیوُ دَرَجَمَا مْرْسَࢽُوَّدْ، بَرٜ أَمْبَ غَیِرْࢽُوِّ!
[2] مِسَلُّو کَمْ لَا کُلُمْ دِࢽَرّٜیَ کَجْمُ شَوَآ ثَمُّوࢽْدُورُو ࢽغَیِ، کُورُو کَمْ لَا تَلَا یٜ کَجْمُ دِࢽَ کَدَوُوَ ࢽغَیِرُو وَلْیٜࢽُووَ،
[3] کَمْ کَجْمُ جَوْرُو شَوَادَ رُوٜ تِرُو: «أَرٜ ࢽَ أَدْࢽْ ࢽغْلَرُو ࢽَمّٜ!» ࢽُوِ، أَمَّ تِ تَلَادْرُو: «ࢽَ تُودْࢽْ دَࢽٜ!» بِ «ثِدِࢽْ ࢽَمّٜ!» ࢽُوِیَ،
[4] کَتّٜࢽْدُوࢽْ غَیِرْࢽُوٜ شَرَوُ ࢽِیَدِوِیَرُو وَلُّوَّ، غْࢽَ؟
[5] کْرَمِیَࢽِ ࢽجَرَاکّْࢽَسُو، ࢻَࢽُّواْ، اللَّه أَمْ دُࢽِیَلَࢽْ تَلَاوَدَ کَمْبْرْسٜلَࢽْ غَرِوُرُو وَلْجَرُو، کُورُو ࢽُودُوࢽْجُ بَرْغَا أَمْ تِیَ ثَرَاࢽَرُو ثِ ثْࢽَّدَ وَرَسَجَرُو کْرٜجْࢽَ، غْࢽَ؟
[6] أَمَّ ࢽَیِدْ تَلَادَ رُࢽُوَّ؞ غَرِوُوَمَ غْࢽَ بَسَرْࢽْجَࢽٜ شَرَرَمْبُو ࢽجَسَدِدْ وُو؟
[7] کُورُو تَیِمَ ثُ دَرَجَا تِلَࢽْ بُواْࢽْجَیْدَ بَسَّیْدْ وُو، مَرٜ؟
[8] وَدَ ࢽُودُو بَرْغَا اللَّهیٜ کِتَوُلَࢽْ رُوُوَدَ: «کْمَسْکِࢽْمْبَ کْلَࢽْمْ غَیْرُو رَیٜ،» ثْࢽَّدَ غَوِیَ، جَوْرُو ࢽغْلَ!
[9] أَمَّ أَمْبَ غَیِرْࢽُوِیَ، بِوُ دِوِ، کُورُو وَدَدْ ࢽَیِیَ غَࢽَمْبُوُرُو وُواْمْࢽْجَیْ؞
[10] وُࢽْدُ دُوُوࢽْ وَدَ اللَّهیٜ سَمَّا جْغَࢽٜ ࢻَلْࢽِࢽْ تَلْجْࢽَدْ سَمَّا جْغَࢽِّیَ کَلْ وُو؞
[11] أَوُووَ تِ دُوُوࢽْ «بَرٜ کْࢽْجْࢽَ دِمِّ،» ثْࢽَّدْ کُورُو وَلْدٜ: «بَرٜ وُࢽْدُمَا یٜجْمِّ،» یٜࢽُو؞ تُو، کْࢽْجْࢽَ دِمْبَوُو یَیٜ، أَمَّ کَمْ یٜجْمَّا، وَدَ غَࢽَمْبُمَرُو وَلّْمَّ؞
[12] أَدْ ࢽَࢽْغَرُو مَࢽَࢽْدُووَ کِدَࢽْدُووَا أَمْ دُوُوࢽْ تَیِیَ وَدَ ࢽَࢽْکَمْ کْلَیٜ ࢻَࢽْدُویٜلَࢽْ شَرَجَیْدْ غَیْرُو دٜوُو!
[13] أَوُووَ کَࢽْجِمَرِ بَوُووَلَࢽْ کَمْ ࢽجُࢽُوجِوَوُومَدَ شَرَجَیْ، أَمَّ کَࢽْجِمَرِدْمَ وُواْمْبُو کُرَ وُو؞
[14] کْرَمِیَࢽِ، کَمْ لَا کَمْبْرْسٜࢽْجُوَ ثْࢽِ دُوُوࢽْ کْࢽْدُوࢽْجُࢽْ ࢻْلٜجِوَوُووَ، أَوِ ࢻَیْدَࢽْجُ وُو؟ کَمْبْرْسٜࢽْجُ تِیَ ثْکَّیِ وَ؟
[15] مِسَلُّو کْرَمِ لَا کُوࢽغوَ بِ کَمُ جَکْتُرَمْ یٜ بَوُووَ، کْمْبُو کُࢽْ بَرِࢽّٜ یٜ بَوُووَرُو وَلْیٜࢽُووَ،
[16] کُورُو کَمْࢽْدُو لَایٜ تِرُو: «کْلٜوَࢽْ لٜࢽٜ! اللَّه جَکْتُرَمْبَ کْمْبُووَ ࢽجُو!» ثْࢽِ دُوُوࢽْ مْرَدُ تِیࢽْجُیٜ غَلْجِوَوُووَ، أَوِ ࢻَیْدَࢽْجُ وُو؟
[17] جِرِ أَدْغَیْࢽِࢽْ کَمْبْرْسٜ کْࢽْدُوࢽْجُ بَوُووَدْ ࢽُࢽَ؞
[18] وَࢽٜىٰ کَمْ لَایٜ: «ࢽِ کَمْبْرْسٜࢽْمْبَ، وُ یٜ کْࢽْدُوࢽِیَ،» ثْࢽِ؞ کَمْبْرْسٜࢽْمْ کْࢽْدُو بَوُووَ وُرُو ࢻْلٜسْغْࢽٜ، وُ یٜ کَمْبْرْسٜࢽِ کْࢽْدُوࢽِࢽْ ࢻْلٜࢽْجْغْکِّ؞
[19] اللَّه تِلُورُو کَسَدّْمَّدْ، ࢽغْلَ دِمَّ؞ سٜدَࢽَّمَ کَسَثَّࢽٜ رِدُرُو لُولُوجَیْ؞
[20] ࢽِ حَࢽْغَلْ بَوُووَ، کَمْبْرْسٜ کْࢽْدُوࢽْجُ بَوُووَدْ ࢻَیْدَ بَوُورُو إِسَࢽُوࢽْجَغَیْیَ، رَامْ؟
[21] ࢽَوِ إِبْرَاهِیمْ کَارِࢽْدٜدْ، سَ تَدَࢽْجُ إِسْحَٰࢼُوَ کْلَ لَیَ دُوَدُرَمْبٜࢽْ سَدَارُو ثِࢽَدْࢽْ، کْࢽْدُوࢽْجُࢽْ غْࢽَ اللَّه تِیَ جِرٜمَرُو ࢽغُویٜࢽُو؟
[22] رُیْ، کَمْبْرْسٜ کْࢽْدُوࢽْجُوَ رُوکُّو کِدَجَࢽَ، کُورُو کْࢽْدُولَࢽْ کَمْبْرْسٜدْ کَلْکَلُّو وَلْجْࢽَ؞
[23] ࢽغَیْمَ أَوُو کِتَوُلَࢽْ رُوُوَدَدْ وَکَّجْࢽَ: «ࢽَوِ إِبْرَاهِیمْ اللَّهَ مْرْسَجْࢽَ ࢽَࢽْغَرُو، اللَّه تِیَ جِرٜمَرُو ࢽغُویٜࢽُو،» کُورُو تِیَ أَمَࢽْمَ اللَّهیٜلَࢽْ بُواْیٜرَ؞
[24] ࢽُوࢽُواْ، کَمْبْرْسٜ رُࢽْجُࢽْ غْࢽِ، کْࢽْدُولَࢽْ اللَّه کَمْبَ جِرٜمَرُو ࢽغُوجِ؞
[25] جِرِ أَدْغَیْࢽِࢽْ رَحَبْ جَوَرْدْ یٜ، سَ کَدُࢽُووُدَ ثْسَیٜ جَوَلْ غَدٜىٰࢽْ سَلَمْجٜ لٜجَࢽَدْࢽْ، کْࢽْدُوࢽْجُࢽْ غْࢽَ اللَّه تِیَ جِرٜمَرُو ࢽغُویٜࢽُو؟
[26] أَوُووَ تِیے سِࢽْدُ بَوُووَ ࢽُࢽَدْ غَیْ، کَمْبْرْسٜ کْࢽْدُو بَوُووَدْ یٜ ࢽُࢽَ؞