[1] کْرَمِیَ، کْلَ سَࢽْجُوَ جَمَࢽّجُوَیٜࢽْ مْرَدُࢽْدُو أَوُو لَا ࢽَیِرُو رُوُدُوُیٜ بَوُو،
[2] دَلِلْࢽْجُدْ ࢽَیِ کْلَࢽْدُو یِمْ کْمَیٜدْ أَلَمَ بَرْوُ ثُرُو بُࢽٜىٰࢽْ إِسِ غَیْ وَکَّجِرُو دَمْ ࢽُوࢽُوَّ؞
[3] سَ أَمْسُویٜ: «ࢽَࢽْلٜوَا سْرِوُووَلَࢽْ دْغَیْیٜ!» ثَࢽِ دُوُوࢽْ، دَجِ سَدْمَࢽْ، أَلَمَ بُوࢽٜ کْࢽْجَمْبِیٜ کَمُ ثُرُووَ لٜجِدْ غَیْ، سِدُوُ لَا تَیِیَ ثُوَࢽْدِ، جَوَلْ کْلَࢽْجَ مُواْیٜ بَوُو؞
[4] أَمَّ ࢽَیِدْ، کْرَمِیَ، ࢽَیِ ثُرُو دُوُیٜࢽْ غْࢽِ دُوُوࢽْ یِمْ أَدْ بَرْوُ غَیْ یٜکِّࢽّدُو بَوُولَࢽْ إِسِدْ،
[5] ࢽَیِ سَمَّ تَدَوَ ࢽُرّٜ یٜ، کَوْسُیٜ یٜ؞ أَࢽْدِ بُࢽٜىٰ یٜ غْࢽِ، دُوُیٜ یٜ غْࢽِ؞
[6] أَدْ ࢽَࢽْغَرُو بَرٜ کْࢽْمْ دِیٜࢽْدٜ، أَمْ غَدٜسُو ثَدِدْ غَیْ، أَمَّ ࢻَادَرُو دْغَیْیُو، دَبَّرْغَدَرُو ࢽَمِّیُو!
[7] أَوُووَ أَمْ کْࢽْمْ ثَدِسُودْ بُࢽٜ کْࢽْمْ ثَدِ، کُورُو أَمْ ثَسَࢽٜ سَغَرَࢽْدَیْسُودْ یٜ بُࢽٜ ثَسَࢽٜ سَغَرَࢽْدَیْ؞
[8] أَمَّ أَࢽْدِ کَوْسُیٜدْ، دَبَّرْغَدَرُو ࢽَمِّیُو، کَمْبْرْسٜیَ کْرَوُووَا سُلْوٜ غَیْرُو یَکِّیُو، تْمَ ࢽجْکَّوُویٜیَ جَوَ سُیٜ غَیْرُو یَکِّیُو!
[9] أَوُووَ اللَّه أَࢽْدِیَ أَجَوُرُو کَدَرْسَغَࢽِّ، أَمَّ کْمَࢽْدٜ عِیسَى أَلْمَسِیوُیٜࢽْ ࢽجْکَّوُو ࢻَࢽْدِیُورُو کَدَرْسَاࢽَ؞
[10] تِمَ أَࢽْدِ ࢽَࢽْغَرُو ࢽُو؞ ࢽغَیْمَ وَلْدٜ إِسِیَ، ࢻَادَرُو دْغَیْیٜ یٜࢽْ کَلْ، کْࢽْمْ دِیٜ یٜࢽْ کَلْ، سَوِسُورُو تِیَ رُوکُّو دْغَیْیٜ؞
[11] أَدْمَ ࢽَࢽْغَرُو وُࢽْدُࢽْدُو یَیٜ کَرْوُ کَمَࢽْجُیٜرُو دُࢽُو ثُو تَیِیَ دُࢽُووَرُو ثْدُو، جِرِ دِوِدْ غَیْ؞
[12] کْرَمِیَ، ࢽَیِیَ ࢽجَوُورِیٜ، أَمْ دُوُوࢽْ کِدَ دَوُࢽْدُوࢽْ ثَدِ یٜ، کْلَ کْمَیٜࢽْ ࢽَیِیَ ࢽجَࢽُودِ یٜ، غَلَ ࢽجَدِ یٜدْرُو دَرَجَ یُواْ!
[13] کِدَࢽْجَ ࢽَࢽْغَرُو کْرَوُولَࢽْ تَیِرُو جَوْمَرُو بْرْسْمْ یُواْ؞ ثُرُوࢽْدُوࢽْ ࢽَࢽْلٜوَࢽْ دْغَیْوُو؞
[14] کْرَمِیَ، ࢽَیِیَ لُواْࢽْجَیْیٜ، سْمُو أَمْ لُسُرْ کِدَ وَجَࢽَسُویٜیَ کَسُّواْ، کَرْوُ أَمْ سَکَّدَیٜرُو دُࢽُو یُواْ، أَمْ دُࢽُو غَࢽَارُو بَࢽَغْࢽُواْ، وُࢽْدُ یَیٜرُو کَࢽَدِیَرُو وَلُّواْ؞
[15] حَࢽْغَلْ غْࢽَࢽُواْ بَرٜ وُࢽْدُمَ کُتُّوَ کُتُّࢽْ ثْرْمْبْࢽِّ، أَمَّ سَوِسُو کَمَࢽْدُووَ کَمْ غَدٜیَسُورُو أَوُو ࢽغْلَدْمَا ࢽجْدُّورُو مَࢽُواْ؞
[16] سَوِسُو کَرْوُࢽْدُو کْجِجُو،
[17] دَدُ بَوُورُو مُودُوَ دٜوُو،
[18] أَوِسُو یَیٜࢽْ اللَّهَ وُسٜࢽُواْ، أَدْمَ أَوُو اللَّه ࢽَیِرُو کْلَ عِیسَى أَلْمَسِیوُیٜࢽْ ثْرَاࢽَدْ وُو ࢽَࢽْغَرُو؞
[19] بَرٜ رُحُ اللَّهیٜرُو کِدَ دَࢻْکْوِّ،
[20] بَرٜ مَࢽَ ࢽَوِࢽَوِیٜیَ رُࢽُوِّ،
[21] أَمَّ أَوِ یَیٜیَ رِجَمُّواْ، أَوُو ࢽغْلَدَ مُکُّو یِࢽْدِࢽْ تَیْوُو،
[22] کُورُو أَوُو دِوِ ࢻِ یَیٜیَ وَࢽُواْ؞
[23] اللَّه ࢽَࢽْلٜوَیٜ کْلَࢽْجُ ࢽَیِیَ تَیِرْ سْرَمْبُو ࢽجَدُو، کُورُو حَرْ کْࢽْدٜ کْمَ عِیسَى أَلْمَسِیوُیٜرُو رُحُࢽْدُووَ رُوࢽْدُووَ تِیࢽْدُووَ سَمَّ بِوُ بَوُووَرُو رُوجُو!
[24] تِ ࢽَیِیَ بُواْࢽْجَࢽَدْ أَمَࢽَّ، کُورُو أَدَ ثْدِ؞
[25] کْرَمِیَ، أَࢽْدِ یٜرُو مُودُوَ سَدُّواْ؞
[26] کْرَمِیَ سَمَّا لٜوَ کْرَوُویٜࢽْ لٜوَࢽُواْ؞
[27] ࢻُوُ کْمَࢽْدٜىٰࢽْ ࢽَیِرُو وُلْࢽْجَغَکِّ، وُوتِیَ أَدَ کْرَمِیَ ࢽغَرُو کْرَغْࢽُواْ؞
[28] سٜرْ کْمَࢽْدٜ عِیسَى أَلْمَسِیوُیٜ ࢽَیِلَࢽْ دْغَ!