[1] أَࢽْدِمَ بُلُسَّ سِلَسَّ تِمُوتِیَدْ جَمَ اللَّه بَوَࢽْدٜیَ کْمَ عِیسَى أَلْمَسِیوُدَیٜ بْرْࢽِ تَسَلُوࢽِکَیٜࢽْ دَسَاࢽَسُودْرُو:
[2] اللَّه بَوَࢽْدٜیَ کْمَ عِیسَى أَلْمَسِیوُدَ ࢽَیِرُو سٜرَّ ࢽَࢽْلٜوَا ࢽجَدُو!
[3] کْرَمِیَ، سَوِ یَیٜ ࢽَیِ ࢽَࢽْغَرُو اللَّهَ وُسٜدُرُو أَࢽْدِرُو وَجِمْسَاࢽَ، جِرِ جُسّْࢽَدْ غَیْ، دَلِلْࢽْجُدْ کَمْبْرْسٜࢽْدُو ثَیٜمَا کُوجْࢽَرُو ࢻُوُ جُوُیْ، کُورُو کْرَوُو دُوُوࢽْ وُࢽْدُࢽْدُو یَیٜ کَمَࢽْجُرُو ࢻْلٜجِیدْ یٜ تْرْغَیْ ࢽَࢽْغَرُو؞
[4] أَدْمَ ࢽَࢽْغَرُو أَࢽْدِ کْلَࢽْدٜ ࢽَ جَمَ عِیسَىٰ غَوُ غَدٜغَدٜسُویٜࢽْ ࢽَیِ ࢽَࢽْغَرُو کْلَ ࢽٜتُّࢽْدُووَ کَمْبْرْسٜࢽْدُووَ ثُرُو بَسَرِ سُو، بُوࢽٜ سُو یَوِ سَمَّیٜࢽْ أَوُلُو بُیْیٜ؞
[5] أَوُو أَدْ یٜ شَرَ اللَّهیٜیَ جِرٜرُو ࢻْلٜجِ، ࢽغَیْࢽِࢽْ کْلَ أَوُو أَࢽِیٜࢽْ اللَّه ࢽَیِیَ مَرْتَوَارُو ࢽجَدٜ ࢽُودُوࢽْجُ بَرْغَارُو ࢽغَوُوِ؞ جِرٜمَرُو ࢽَیِ یٜ ࢽُودُوࢽْجُ بَرْغَا ࢽَࢽْغَرُو بُوࢽٜ یَوَّ؞
[6] اللَّهدْ جِرٜ: أَمْ دُوُوࢽْ ࢽَیِرُو کُتُّ ࢻْلٜࢽْجَاࢽَدْرُو کُتُّ ࢻْلٜجِیے،
[7] کُورُو ࢽَیِ کُتُّ یَوَّدْرُو تُسْتُ ࢽجَدِ، أَࢽْدِ یٜرُو ࢽغَیْ؞ سَ کْمَ عِیسَى سَمٜلَࢽْ مَلَیْیَوَࢽْجُ کْࢽْدُوُووَا رُوکُّو إِسٜ دُࢽِیَرُو ࢻْلٜدِییَ، أَدْ وَکَّجِ؞
[8] دَوُ کَࢽُّ ثَمْبِیٜࢽْ إِسٜ أَمْ اللَّهَ ࢽُوجَࢽِّیَ أَمْ کَوُرِ کْجِ کْمَࢽْدٜ عِیسَیٜیَ جَاࢽِّیَرُو وُواْمْ غْࢽَجِیے،
[9] وُواْمْ دُوُوࢽْ تْمَّرُو ثٜرِوَوُو، ࢽَ کْمَࢽْدٜىٰیَ دُࢽُوࢽْجُ دَرَجَایٜیَࢽْ کُرُوُࢽْ؞
[10] یِمْ أَدْࢽْ إِسِیَ، مُمِࢽَّࢽْجُ تِرُو دَرَجَ ثَدِ یٜ، دَوُ أَمْ کَسَثَّࢽَمَ سَمَّیٜࢽْ تِرُو أَمْبْثَّغَیْ یٜ، شٜدَ کْلَࢽْجُࢽْ وُلْࢽْجَغَیْیٜࢽَدَ کَسَدُّوَّ ࢽَࢽْغَرُو؞
[11] أَدْمَ ࢽَࢽْغَرُو سَوِ یَیٜ اللَّهࢽْدٜىٰ بُواْدُࢽْجُ مُواْ ࢽَیِیَ مَرْتَوَارُو ࢽجَدُورُو مُودُوَ ࢽجَدِّیٜ، کُورُو کْࢽْدُوُوࢽْجُیٜࢽْ مْرَدُࢽْدُو غَلْجُو ࢽَیِیَ ࢽجَسَکُّو أَوُووَ ࢽغْلَ سُو، کِدَ کَمْبْرْسٜىٰ سُو سَمَّا دٜوُورُو تِیَ کُورِیٜ؞
[12] أَدْغَیْࢽِࢽْ ثُ کْمَࢽْدٜ عِیسَیٜدْ ࢽَیِلَࢽْ دَرَجَ ثُوَࢽْدِ، ࢽَیِ یٜ تِلَࢽْ ࢻَࢽْدُوِ، کْلَ سٜرْ اللَّهࢽْدٜیَ کْمَ عِیسَى أَلْمَسِیوُدَیٜࢽْ؞