[1] أَࢽْدِمَ بُلُسَّ سِلَسَّ تِمُوتِیَدْ جَمَ اللَّه بَوَدَ کْمَ عِیسَى أَلْمَسِیوُدَیٜ بْرْࢽِ تَسَلُوࢽِکَیٜࢽْ دَسَاࢽَسُودْرُو: سٜرَّ ࢽَࢽْلٜوَا ࢽَیِلَࢽْ دْغَ!
[2] سَوِ یَیٜ ࢽَیِ سَمَّ ࢽَࢽْغَرُو اللَّهَ وُسٜࢽِیٜ، کُورُو ثُرُو مُودُوَࢽْدٜىٰࢽْ کْلَ ࢽَیِیٜࢽْ اللَّهَ کُورِیٜ؞
[3] أَدْغَیْمَ دَدُ بَوُورُو ࢻُوُ اللَّه بَوَࢽْدٜىٰࢽْ کِدَࢽْدُو کَمْبْرْسٜىٰیَ ࢽغْࢽْࢻْتُࢽْدُو کْرَوُویٜیَ کْمَࢽْدٜ عِیسَى أَلْمَسِیوُلَࢽْ تْمَࢽْدُو دَمَ بَوُووَا تَࢽْغِیٜ؞
[4] کْرَمِیَ اللَّه جَوْرُو ࢽجَرَاࢽَسُو، تِمَ ࢽَیِیَ کْرٜࢽْجَرُو ࢽُوࢽِیٜࢽَ،
[5] دَلِلْࢽْجُدْ کَوُرِࢽْدٜ کْجِ مَࢽَ ثِیٜ رُࢽْجُࢽْ غْࢽِ، کْࢽْدُوُووَ رُحُ اللَّهیٜیَ تَرْتِࢻَّࢽْ ࢽَࢽْدُورُو إِسْࢽَ ࢽَࢽْغَرُو، جِرِ کْࢽْدْغَیْ دَوُࢽْدُوࢽْ ࢽَیِ ࢽَࢽْغَرُو دِیٜࢽَدَ ࢽُوࢽُوَّدْ غَیْ؞
[6] ࢽَیِ یٜ حَلْࢽْدٜیَ حَلْ کْمَیٜیَا غَوُرُو وَلْیٜوْ، بُوࢽٜ کَدَ جَوْرُو یَوَّ یَیٜ، کَرْوُکْجِ رُحُ اللَّهیٜࢽْ تُوَࢽْدْࢽَدْࢽْ کَوُرِدَ مُکُّو یِࢽْدِࢽْ کِمُووُوْ؞
[7] أَدْ ࢽَࢽْغَرُو جَمَ عِیسَىٰ غَوُ لَرْدُ مَکِدُوࢽِیَا أَکَیَایٜࢽْ دَسَاࢽَ سَمَّرُو مِسَلُّو وَلْیٜوْ؞
[8] أَدْغَیْمَ مَࢽَ کْمَیٜ ࢽَࢽْدُویٜࢽْ تَتَرْدْࢽَ، لَرْدُ مَکِدُوࢽِیَا أَکَیَایٜ رُࢽْجَرُو غْࢽِ، ࢽدَرَࢽْ یَیٜ اللَّهلَࢽْ کَمْبْرْسٜࢽْدُو ࢽُووَدَرُو وَلْجٜ، حَرْ مْرَدُࢽْدٜ أَوُو لَا وُلْدُیٜ بَوُورُو وَلْیٜࢽُو؞
[9] تَیِ کْلَࢽْجَ لَوَرْ کْلَࢽْدٜࢽْ جِرِ ࢽَࢽْدُوࢽْ سَمُووُوَّدَ وُلْجَیْ، جِرِ ࢽَیِ غُمْکِیَ غَ کُولُّوٜ جَوَلْ اللَّهیٜرُو ࢽغَوُوٜ وُولُودِیَ اللَّه کْࢽْدْغَیْمَا جِرٜمَایٜرُو وَلُّوَّ،
[10] کُورُو تَدَࢽْجُ عِیسَیٜ کْࢽْدٜࢽْجُ سَمٜلَࢽْ غُرٜࢽُوِدَ وُلْجَیْ، تِ دُوُوࢽْ اللَّه تِیَ کَرْمُولَࢽْ ثْسَࢽْغْࢽَ أَࢽْدِیَ أَجَوُ اللَّهیٜ إِسِدْرُو سَمُویِدْ؞