[1] دَرْیٜرَمْبُو، کْرَمِیَ، ࢽَیِرُو جِرِ أَرْدِیَ اللَّهیٜ مَدَرُو کْࢽْدْغَیْ دِوِدَ أَلَمْࢽْغٜىٰرَیْیٜ، کُورُو ࢽغَیْ دِوِ؞ کْرْمَ ࢽَیِیَ ࢽجَوُورِیٜ، کْمَ عِیسَى ࢽَࢽْغَرُو لُواْࢽْجَیْیٜ، ثَیٜمَا کُوجْࢽَرُو دٜوُو!
[2] أَوُووَ وَدَ ࢽَیِرُو کْمَ عِیسَیٜࢽْ ࢽجَدِیٜࢽَدَ ࢽُوࢽُوَّ؞
[3] أَوُو اللَّه ثْرَاࢽَدْ، تِمَ تَیِرُّو وَلْدُࢽْدُو وُو؞ أَدْ ࢽَࢽْغَرُو کْࢽْجْࢽَ دِیُو کُولُّواْ؞
[4] وُࢽْدُࢽْدُو یَیٜ ࢽَࢽْتَیِرَّ دَرَجَالَࢽْ تِیࢽْجُ رِوُو ࢽُوجُو،
[5] مَࢽْغَرْ دِوِلَࢽْ غْࢽِ، کْرْدِیَ دُوُوࢽْ اللَّهَ ࢽُوجَࢽِّدْ غَیْ؞
[6] بَرٜ وُࢽْدُمَ کْرَمِࢽْجُوَ کْلَ أَوُو أَدْیٜࢽْ جَمْبَجْࢽِّ بِ أَمَࢽّجُ جُوُࢽِّ، دَلِلْࢽْجُدْ کْمَدْ أَمْ جِرِ أَࢽِیَ ثَدِمَرُو أَجَوُ غْࢽَجِیے ࢽَࢽْغَرُو، ࢽَیِرُو بُرْوُومَࢽْ وُلْࢽْجَغَیْیٜ سْمُوࢽْدُو کَسِّیٜࢽَدْ غَیْ؞
[7] أَوُووَ اللَّه تَیِرْࢽَمْبُࢽْ غْࢽِ، ࢽَࢽْتَیِرْࢽِࢽْ دْغَرُو أَࢽْدِیَ بُواْسٜرَ؞
[8] أَدْمَ ࢽَࢽْغَرُو وُࢽْدُ دُوُوࢽْ أَلَمْدُ أَدَ وَجِمَدْ کَمْبَ غْࢽِ، اللَّهَ وَجِ، تِ دُوُوࢽْ رُحُࢽْجُ ࢽَیِرُو ࢽجَدْࢽَدْ؞
[9] کْلَ کْرَمِیَا رَوُویٜࢽْ مْرَدُࢽْدُو أَوُو لَا ࢽَیِرُو رُوُدُوُیٜ بَوُو، دَلِلْࢽْجُدْ اللَّه کْلَࢽْجُ ࢽَیِیَ کَمَࢽْدُووَ رَوُورُو أَلَمْࢽْجَࢽَ ࢽَࢽْغَرُو؞
[10] کْرَمِیَ سَمَّ لَرْدُ مَکِدُوࢽِیَ ࢽغَیٜیَ رَاوَّ، دِیٜ! أَمَّ کْرَمِیَ، ࢽَیِیَ لُواْࢽْجَیْیٜ، ثَیٜمَا کُوجْࢽَرُو دٜوُو!
[11] ࢽِیَ ࢽغُوࢽُواْ ࢽَࢻْتُ ࢽَࢽْلٜوَیٜ مَࢽُواْ، أَوُووَ کَاࢽدُورُو کِسْکْࢽُواْ، مُکُّوࢽْدُوࢽْ کِدَ دٜوُو، ࢽَیِرُو وَدَ ࢽجَدِیٜࢽَدْ غَیْ؞
[12] ࢽغَیْࢽِࢽْ ࢻُوُ أَمْ عِیسَىٰ غَوُ غْࢽِیٜࢽْ کْࢽْدْغَیْ دَرَجَا دِوِ، کُورُو وُࢽْدُمَرُو ࢽجُتّْغْوَّوُو؞
[13] کْرَمِیَ، کْلَ أَمْ رُو ثَرْمْبْࢽَیٜࢽْ ࢽُوࢽُوِیَ، رَیِیٜ، بَرٜ أَمْ غَدٜ تْمَࢽْجَ بَوُودْ غَیْ کَرْوُࢽْدُو کُتَّجْࢽِّرُو؞
[14] عِیسَى ࢽُࢽٜ کَرْمُولَࢽْ ثِجْࢽَرُو کَسَتْکٜیْیٜیَ، ࢽغَیْࢽِࢽْ وَلْدٜ إِسِیَ، اللَّه تَیِ عِیسَىٰ غَوُ رُو ثَرْمْبْࢽَدَ تِیَ رُوکُّو ثُوُدِدْ یٜیَ کَسَدِّیٜࢽَ؞
[15] مَࢽَ کْمَیٜࢽْ أَدَ وُلْࢽْجَغَیْیٜ، أَࢽْدِ دُوُوࢽْ رُووَ حَرْ کْࢽْدٜ کْمَیٜرُو دْغَیْیٜدْ تَیِ رُو ثَرْمْبْࢽَدَ بُرْوُوࢽِیٜوَوُو؞
[16] أَوُووَ کْمَ کْلَࢽْجُ بُواْدُ کْࢽْدُوُویٜیَ کُواْ مَلَیْیَ کُرَیٜیَ ࢽُکْتُ کَࢽْغَدِ اللَّهیٜیَلَࢽْ سَمٜلَࢽْ جْࢻْثٜ تَیِ أَلْمَسِیوُوَ غَوُ سَࢽُࢽَدْ بُرْوُوࢽْ ثِجَیْ،
[17] دَجِ أَࢽْدِ رُووَ دْغَیْیٜدَ تَیِیَ رُوکُّو ثُرُو ࢻُوࢻُووْیٜࢽْ سَدَࢽٜ کْمَدَ سَمٜلَࢽْ کَࢻْکْیْیٜ؞ أَدْغَیْمَ سَوِسُورُو کْمَا رُوکُّو دْغَیْیٜ؞
[18] أَدْ ࢽَࢽْغَرُو مَࢽَ أَࢽِࢽْ کَرْوُ کَمَࢽْدُویٜرُو دُࢽُو یُواْ!