[1] کْرَمِیَ، ࢽَیِ کْلَࢽْدُو کْࢽْدٜࢽْدٜ ࢽَࢽْدُورُو بُووُرُو وَلْجْࢽِّرُو ࢽُوࢽُوَّ؞
[2] ثَلَࢽْ بْرْࢽِ ࢻِلِبِیٜࢽْ بُوࢽٜ یَیْیٜ جَوْرُو کُتُّ أَࢽْدِرُو ࢻْلٜسَاࢽَ یَیٜ، ࢽُوࢽُوَّدْ غَیْ، اللَّه بَࢽَسَغَࢽٜ رِدُ بَوُووَرُو تَغَرِرِ ࢽغْوُ سَسَکّْࢽَسُوࢽْ کَوُرِࢽْجُ کْجِ ࢽَیِرُو وُلْࢽْغٜىٰرَیْیٜ؞
[3] أَوُووَ غَلْغَلْدَࢽْدٜدْ أَوُو لَا یٜسْکَدَ، بِ تَیِرْࢽَمْبُ، بِ جَمْبَیٜࢽْ إِسْࢽِّ،
[4] أَمَّ اللَّه مْرْسَسَࢽٜ مُکُّوࢽْدٜرُو کِدَ کَوُرِ کْجِ وُلْدُیٜ ثَکّْࢽَدْ غَیْ، أَرْدِیَ کَمْبٜ غْࢽِ، أَرْدِیَ اللَّهیٜ مَدَرُو وُلِّیٜ، تِ دُوُوࢽْ کَرْوُࢽْدٜ جَرَࢻْثِدْ؞
[5] ࢽُوࢽُوَّدْ غَیْ، ࢽغَلْتٜمَ مَࢽَ جَجَکْتُیٜࢽْ بِ أَوُو مَࢽْغَرْدُیٜࢽْ ࢽَࢽْدُورُو إِسِیٜࢽْدٜ، اللَّهدْ تِمَ شٜدَ وُو؞
[6] دَرَجَ ࢽَ أَمْبٜࢽْ مَࢽِیٜࢽْدٜ، بِ ࢽَࢽْدُوࢽْ، بِ ࢽَ أَمْ غَدٜىٰࢽْ؞
[7] أَࢽْدِ کْࢽْغَیَمْبَ أَلْمَسِیوُیٜدْ، کْࢽْدُوُو أَدْ ࢽَࢽْدٜࢽْ مبٜجِ، أَمَّ ثُجُ أَدْیٜرُو دَوُࢽْدُوࢽْ رُوکُرَ بَوُووَرُو وَلِّیٜࢽَ؞ جِرِ یَ تَدَوَࢽْجُ ثْرِوِدْ غَیْ،
[8] ࢽَیِرُو کِسْࢽْغٜىٰرَیْیٜ؞ آه، ࢽَیِیَ جَوْمَرُو ࢽجَرَیِیٜࢽَ ࢽَࢽْغَرُو، ࢽَیِرُو کَوُرِ کْجِ اللَّهیٜ رُࢽْجُ غْࢽِ، حَرْ رُوࢽْدٜمَ ࢽجَدِیٜیَ، رَیِیٜࢽَ؞
[9] کْرَمِیَ، کِدَࢽْدٜیَ ࢽغْࢽْࢻْتُࢽْدٜیَا لَبُدَّ تَࢽْغُوِ: کَوُرِ کْجِ اللَّهیٜ ࢽَیِرُو وُلْࢽْجَغَیْیٜ دُوُوࢽْ، بُࢽٜیَ کَوْسُوَرُو کِدَ کِدِیٜ بَرٜ وُࢽْدُࢽْدُومَرُو کُرْوُووُ غْࢽَغْیْیٜࢽْدٜرُو؞
[10] ࢽَیِدْ شٜدَوُ، اللَّه یٜ ࢽغَیْ، ࢽَࢽْتَیِرَّ جِرٜیَ تَلْدُ بَوُووَرُو دَوُ ࢽَیِ عِیسَىٰ غَوُیٜࢽْ کْࢽْدْغَیْ دِیٜࢽَ؞
[11] ࢽُوࢽُوَّدْ غَیْ، جِرِ بَوَ تَدَوَࢽْجُرُو کِسِّیدْ غَیْ،
[12] أَࢽْدِ یٜ وُࢽْدُࢽْدُو یَیٜیَ لُواْࢽِیٜ کَرْوُࢽْدُورُو دُࢽُو یِیٜ، کُورُو رِࢽْدَࢽِیٜ کْࢽْدْغَیْ ࢻُوُ اللَّهیٜࢽْ جُسّْࢽَ دٜوُو یٜیْیٜ، تِ دُوُوࢽْ ࢽَیِیَ ࢽُودُوࢽْجُ بَرْغَآ دَرَجَࢽْجُوَرُو ࢽغَوُورُو بُواْࢽْجَࢽَدْ؞
[13] أَدْمَ ࢽَࢽْغَرُو دَدُ بَوُورُو اللَّهَ وُسٜࢽِیٜ، سَ مَࢽَ اللَّهیٜ وُلْࢽْجَغَیْیٜࢽَدَ مُووُوَّدْࢽْ، تِیَ مَࢽَ کَمْبٜ غَیْ غْࢽِ، مَࢽَ اللَّهیٜ غَیْ کِمُووُوْ: تِمَ جِرٜمَرُو مَࢽَ اللَّهیٜدْ وُو، کُورُو ثُرُو کَرْوُ ࢽَیِ عِیسَىٰ غَوُیٜࢽْ کِدَࢽْجُ ثْدِ؞
[14] ࢽَیِدْ، کْرَمِیَ، جَمَ اللَّهیٜ عِیسَى أَلْمَسِیوُوَ غَوُ ثِدِ یَحُدِیَیٜࢽْ دَسَاࢽَدْ غَیْرُو وَلْیٜوْ، دَلِلْࢽْجُدْ کُتُّ دُوُوࢽْ تَیِ ࢽَ یَوْدِیَیٜࢽْ ثَسَࢽَدَ ࢽَیِ یٜ مُکُّو أَمْࢽْدُویٜࢽْ یَوَّ؞
[15] تَیِ یَوْدِیَ کْمَ عِیسَىٰ ࢽَوِیَآ ثٜىٰسْࢽَدْ أَࢽْدِ یٜیَ جَوْرُو بَسَرْسٜرَ؞ أَوُو اللَّه ثْرَاࢽَا ثَدِوَوُو، کْلَدُووَ أَمْ سَمَّیٜ؞
[16] کْرْدِیَرُو ࢽجْکَّوُو ثَوَࢽْدُورُو مَࢽَ یِدِّیٜدَ أَࢽْدِرُو دَمْسَغَیْ؞ أَدْ ࢽَࢽْغَرُو، بِوُوَࢽْجَ دَمَ بَوُورُو ࢽَ کُوجْࢽَرُو ثَدِ دُوُوࢽْ، دَرْیٜرَمْبُو اللَّه تَیِرُو أَجَوُࢽْجُ ࢻْلٜیٜىٰࢽُو؞
[17] أَࢽْدِدْ، کْرَمِیَ، کَوُ غَࢽَرُو کَرْوُلَࢽْ غْࢽِ، تِیلَࢽْ ࢽَیِیَ ࢻَیْدِیٜࢽَ؞ تُرُیْیٜوَوُو یَیٜ، مْرَدُ جَوْمَرُو سَدَࢽٜ سِمْبَ سِمْبَلَࢽْ ࢽَیِیَ کُرُورُو کِرَیِیٜ؞
[18] ࢽَࢽْدُورُو کْࢽْسِیُورُو کِرَیِیٜ، وُ بُلُسْدْ ࢻَلَّ کُوجْࢽَرُو کْࢽْسِیُورُو ثِیٜکُّو، أَمَّ إِوُلِیسْ أَࢽْدِرُو دَمْسٜىٰرَ؞
[19] یِمْ کْمَ عِیسَى وَلْدٜ إِسِیَ، أَوِ غْلٜ ࢻُوُࢽْجُࢽْ تْمَࢽْدٜیَ کَرْوُکْجِࢽْدٜیَ أَوُوࢽْدٜ أَوُلُو بُویٜیَ وُو؟ ࢽَیِمَ، غْࢽَ؟
[20] آه، ࢽَیِمَ دَرَجَࢽْدٜ یٜ، کَرْوُکْجِࢽْدٜ یٜ وُو!