[1] کْمَوَ، کَرٜیَوَࢽْدُووَ جَوَلْ کَلْکَلْ جِرٜىٰࢽْ تَیْوُو، ࢽَیِ یٜ کْمَ سَمٜلَࢽْ تَوَّدَ تَࢽْغُواْ؞
[2] مُودُوَلَࢽْ ࢽٜدُّواْ، تِلَࢽْ اللَّهَ وُسٜࢽُوِیَرُو ࢻَادَرُو دْغَیْوُو؞
[3] کُورُو أَࢽْدِ یٜرُو مُودُوَ سَدُّواْ، اللَّه کَوُرِࢽْجُ ࢽَࢽْغَرُو أَࢽْدِرُو ثِࢽَّ کَسَا، أَسْرْ أَلْمَسِیوُیٜ وُلِّیُو، أَسْرْ دُوُوࢽْ تِ ࢽَࢽْغَرُو کُوسُوࢽْ دْغَکّْࢽَدْ،
[4] جِرِ وَجِمْسْغْࢽَدْ غَیْرُو تِیَ إِسَࢽُوغْکُّورُو؞
[5] دَوُ أَمْ عِیسَىٰ غَوُ غْࢽِیٜࢽْ کْࢽْدْغَیْ ࢽَࢽْرَشِدُیٜ دٜوُو، دَمَ ࢻَࢽْدُوَّ ࢻِࢽْ یَیٜ ࢻَیْدَدْࢽُواْ؞
[6] مَࢽَࢽْدُو سَوِ یَیٜ سٜرَّرُو وَلْجُو، أَلَمَ کْمْبُو مَࢽْدَࢽْجُوَ غَیْ، جَاوُ جُسّْࢽَ کَمْ ࢻِ یَیٜرُو ࢽجُورُو ࢽُوࢽُواْرُو؞
[7] تِکِکُسْ، کْرَمِࢽْدٜ جَوْرُو رَیِیٜࢽَ یٜ، کِدَمَ کْمَࢽْدٜىٰ أَمَࢽَّ یٜ، سَوَࢽْدٜ کِدَیٜ یٜدْ لَوَرْ وُوَ وُسْࢽَ سَمَّا ࢽَیِرُو ࢽجَدِ؞
[8] أَدْمَ ࢽَࢽْغَرُو ࢽَیِرُو ࢽَࢻْتُࢽْدٜ وُلْࢽْجَا، کَرْوُࢽْدُورُو دُࢽُو ثُورُو تِیَ جُوَࢽْجَغَکّْࢽَ؞
[9] کُورُو أُوࢽٜسِمْ، کْرَمِࢽْدٜ أَمَࢽَّ یٜ، جَوْرُو رَیِیٜࢽَ یٜ، أَمْࢽْدُویٜ ࢻَلْدْ یٜ تِیَ ثَدُّوِ؞ أَوُو ࢽَ أَدْࢽْ وَکَّجِ سَمَّا وُلْࢽْجَغَیْ؞
[10] أَرِسْتَرْکُسْ سَوَࢽِ کُوسُویٜدْ ࢽَیِیَ لٜوَࢽْجَیْ؞ مَرْکُسْ أَوَࢽْرَوَغْࢽَ بَرْࢽَبَسّٜدْ یٜ لٜوَࢽْجَیْ، کَمْ ثَمَࢽْ کْلَࢽْجُࢽْ ࢽَیِرُو مَࢽَࢽْجَاࢽَدْ، ࢽَࢽْدُورُو إِسِیَ، تِیَ ࢽغْلَرُو کَࢻْکْࢽُواْ؞
[11] إِسَ کَمْ تِرُو جُسْتُسْ ثَࢽِدْ یٜ لٜوَࢽْجَیْ؞ ثُرُو یَوْدِیَ عِیسَىٰ غَوُرُو وَلْجَࢽَیٜࢽْ تَیِ رُࢽْجَمَ سَوَوَࢽِ کِدَ ࢽُودُو بَرْغَا اللَّهیٜ وُو، کُورُو رُوࢽِ إِسَبُوجَاࢽَ؞
[12] أَبَࢻَرَسْ، کَمْࢽْدُو ࢻَلْ، کِدَمَ عِیسَى أَلْمَسِیوُیٜدْ، لٜوَࢽْجَیْ؞ سَوِ یَیٜ مُودُوَࢽْجُࢽْ ࢽَیِ ࢽَࢽْغَرُو مْلْدِ، رَوُو اللَّهیٜ سَمَّࢽْ دُࢽُووَرُو کَلْکَلُّو دَࢽُواْرُو؞
[13] أَوُووَ ࢽَیِیَ أَمْ بْرْࢽِ لَوُدِکِیَیٜیَ حِرَࢻُولِسّٜیَ ࢽَࢽْغَرُو ࢽغْࢽْࢻْتِرُو تِیَ شٜدَࢽْکِّ؞
[14] لُکَ لُواْتُورْ رَیِیٜࢽَدْ لٜوَࢽْجَیْ، دِمَسْ یٜ ࢽغَیْ؞
[15] کْرَمِیَ لَوُدِکِیَلَࢽْ دَسَاࢽَدَ لٜوَࢽُواْ، یَ ࢽِمْࢻَا جَمَ عِیسَىٰ غَوُ ࢻَࢽّجُࢽْ ثَࢻْتَیْدَا لٜوَࢽُواْ؞
[16] وُوتِیَ أَدَ دَوُࢽْدُوࢽْ کْرَجَیْیَ، یَکُّواْ دَوُ جَمَ عِیسَىٰ غَوُ لَوُدِکِیَیٜ یٜࢽْ کْرَجَ، کُورُو ࢽَیِ یٜ وُوتِیَ لَوُدِکِیَیٜدَ دَوُࢽْدُوࢽْ کْرَࢽُواْ؞
[17] أَکِࢻُسْ یٜرُو: «کِدَ کْمَࢽْدٜ ࢽجِࢽَدْرُو حَࢽْغَلْ غْࢽَࢽٜ تُمُوغْࢽٜ!» وُلْغْࢽُواْ؞
[18] وُمَ بُلُسْ لٜوَ أَدَ مُکُّوࢽِلَࢽْ رُوُیٜکُّو؞ وُ کُوسُوࢽْ دْغَکّْࢽَدَ تَࢽْسُواْ؞ سٜرْ اللَّهیٜ ࢽَیِلَࢽْ دْغَ!