[1] وُ أَمْوُرَوَیٜ کَمَࢽْجَ یٜ، بُوࢽٜ ࢽجَ أَلْمَسِیوُیٜ شٜدَمَ یٜ، دَرَجَ ࢻُوُࢽْ ࢻْلٜدِلَࢽْ ࢽُوَࢽِیَ یٜدْ، أَمْوُرَوَ ثُرُوࢽْدُوࢽْ دَسَاࢽَدْرُو دُࢽُو یِکِّ:
[2] بْرِ اللَّهیٜ ࢽَࢽْدُوࢽْ دْغَࢽَدَ ࢽٜوُواْ، أَمَّ دُولٜ غَیْرُو غْࢽِ، رَوُوࢽْدُوࢽْ اللَّه ثْرَاࢽَدْ غَیْرُو تَیِرُو کِسْکْࢽُواْ، کُورُو رِوَ ثُکُّواْࢽَ بُورُو غْࢽِ، کَسَدُوَلَࢽْ؞
[3] بَرٜ تَیِ مُکُّوࢽْدُورُو ثَسَکّْࢽَدَ رَدُّوِّ، أَمَّ بْرِدْرُو مِسَلُّو وَلُّواْ،
[4] دَجِ سْࢽِ کُرَدْ ࢻْلٜدِییَ، أَرِیَوُ دَرَجَیٜ دِࢽْجِوَوُو ࢻَࢽْدُوِ؞
[5] جِرِ أَدْغَیْࢽِࢽْ ࢽَیِ جَیْرُووَدْ أَمْوُرَوَدْرُو دَوْ کُولْغْࢽُواْ؞ ࢽَیِ سَمَّ کَتّٜࢽْدُوࢽْ وُولُودِ غَیْ رُوکُرَࢽَمْبُ لُࢽُواْ، أَوُووَ: «اللَّهدْ رُوکُرَوُوَ وَجْࢽَ، أَمَّ رُوکُرَࢽَمْبُوُرُو سٜرْࢽْجُ ࢻْلٜجِیے؞»
[6] أَدْ ࢽَࢽْغَرُو، سَ جُسّْࢽَࢽْ ࢽَیِیَ ࢽجَسَࢽْغُورُو، ثِدِیَ مُکُّو دُࢽُووَ اللَّهیٜࢽْ رُوکُرَ بَوُووَرُو وَلُّواْ،
[7] سُوُولْࢽْدُو سَمَّا تِرُو یَکُّواْ، ࢽَیِرُو کِسْࢽْجَغَیْ ࢽَࢽْغَرُو؞
[8] کْلَࢽْدُو رِوُواْ، ࢻَادَرُو دْغَیْوُو! إِوُلِیسْ کْلَدُوࢽْدُودْ ࢽغَمْ ࢽُکْثِ غَیْ دَدَجِ، کَمْ ࢽجُࢽْدُویٜ مَجِ؞
[9] کَمْبْرْسٜلَࢽْ دُࢽُووَرُو دَࢽُواْ، بَرٜ تِرُو دَمَ کُولْغْوِّ؞ ࢽُوࢽُواْ، کْرَمِیَࢽْدُو دُࢽِیَلَࢽْ بُوࢽٜ أَࢽِمَا ثَسَیْ؞
[10] اللَّه سٜرْمَ کْلَࢽْجُ، تِ دُوُوࢽْ أَلْمَسِیوُلَࢽْ ࢽَیِیَ دَرَجَࢽْجُ سَوِسُویٜࢽْ دْغَیْوُورُو بُواْࢽْجَࢽَدْ، بُوࢽٜ کَوُ غَࢽَرُو یَوَّیٜ ࢽغَوُوࢽْ، ࢽَیِیَ کَلْکَلُّو ࢽجَدِ یٜ، تَبَّࢽّجَغَیْ یٜ، إِسَدُࢽُووَࢽْجَغَیْ یٜ، کُورُو کُولْࢽْجَࢽٜ یُرُوَّوُو یٜ؞
[11] تِرُو حَرْ أَبَدَرُو کْࢽْدُوُو تِیُو! أَمِࢽْ؞
[12] مُکُّو سِلَسْ کْرَمِ أَمَࢽَّرُو ࢽغُوکّْࢽَدْیٜࢽْ کَلْمَوَ غَࢽَࢽْ رُوُࢽْجَغَکّٜ کُواْرِ ࢽجَدْکّٜ مَࢽَ أَدْ سٜرْ اللَّهیٜ جِرٜىٰرُو تَبَّࢽْجَغَکّْࢽَ؞ سٜرْدْلَࢽْ دُࢽُووَرُو دَࢽُواْ!
[13] جَمَ عِیسَىٰ غَوُ کْرٜیَدَ بْرْࢽِ بَبِلَیٜࢽْ دَسَاࢽَدْ تَدَࢽِ مَرْکُسْࢽِࢽْ کُࢽْدٜࢽُّو لٜوَࢽْجَیْ؞
[14] کَتّٜࢽْدُوࢽْ لٜوَ کْرَوُویٜࢽْ لٜوَدْࢽُواْ؞ ࢽَࢽْلٜوَ ࢽَیِ أَلْمَسِیوُلَࢽْ دْغَوَّ سَمَّلَࢽْ دْغَ؞