[1] أَدْ ࢽَࢽْغَرُو، أَلْمَسِیوُ تِیلَࢽْ بُوࢽٜ ثَࢽَدْ، ࢽَیِ یٜ حَلْࢽْجُدَ ࢽغُوࢽُواْ، دَلِلْࢽْجُدْ کَمْ تِیلَࢽْ بُوࢽٜ ثَࢽَدْ بِوُوَ ࢻَیْدَࢽَ،
[2] ࢽغَیْࢽِࢽْ کْࢽْدْغَیْࢽْجُ دُࢽِیَلَࢽْ غَࢻْثْࢽَدْ مَࢽْغَرْ تِییٜرُو غْࢽِ، رَوُو اللَّهیٜرُو دْغَیْ؞
[3] رَوُو کْرْدِیَیٜ ثَلَࢽْ دِوٜ ࢽَࢽْجَࢽٜ سُو، مَࢽْغَرْ سُو، سَغَرَࢽْدُ سُو، کْلَرِوُوࢽَمْبُ سُو، ࢽَࢽْثُرُوثُرُومَ سُو، سْࢽْمْ غَ وَادَ سُولَࢽْ دْغَوَّدْ ثْدْࢽَ؞
[4] کُورُو ࢽَیِدْ غَࢽُّوٜ حَلْکُتَّ ثِ بَوُو أَدْلَࢽْ تَیِرُو کْلْدْغْوِّدَ أَجَࢻْثَࢽٜ ࢽَیِیَ رَرَࢽْجَیْ،
[5] أَمَّ تِ دُوُوࢽْ أَمْ رُووَا سَࢽُࢽَآ شَرَدُرُو دَبَّرْدْࢽَدْ کْلَ أَدْیٜࢽْ تَیِیَ ثُوُورِ؞
[6] دَلِلْ أَدْیٜمَࢽْ کَوُرِ کْجِدْ أَمْ سَࢽُࢽَ یٜرُو وُلْدْغْࢽَ، کْلَ أَدَمْغْࢽَیٜࢽْ تَیِیَ تِیلَࢽْ شَرَجَیْ یَیٜ، کْلَ اللَّهیٜࢽْ رُحُلَࢽْ رُووَ دَسَیِ؞
[7] ࢽجٜرُورَمْ أَوُو سَمَّیٜ کَرْࢽْجْࢽَ، أَدْ ࢽَࢽْغَرُو مُودُوَ دِیُورُو أَمْ حَࢽْغَلْ کْجِیَا کْلَ رِوُووُوَرُو وَلُّواْ؞
[8] أَوِ یَیٜرُو بُرْوُوࢽُّو کَتّٜࢽْدُوࢽْ کَسَدُوَرُو کْرَوُو ࢻْلٜدْࢽُواْ، أَوُووَ کْرَوُودْ بِوُ کَدَ جَکْثِ؞
[9] مَࢽَ کُتُّ دِوِّࢽْ أَمَࢽْدُووَ سُوسَࢽُواْ،
[10] وُࢽْدُࢽْدُو یَیٜ کْࢽْجُو لَا ثُوَࢽْدْࢽَدْ، کِسْتُوُوُ ࢽغْلَ کْࢽْجُو جِرِ جِرِ سٜرْ اللَّهیٜ غَیْ تِلَࢽْ ࢻَیْدَدُوِیَلَࢽْ أَمَࢽْدُورُو ࢽَࢽْوُولُودِ یِدُّواْ؞
[11] کَمْ لَا مَࢽَ ثْدِیَ، کَوُرِ اللَّهیٜ وُلْدُمَ غَیْرُو ثْدُو، کَمْ لَا ࢽَࢽْوُولُودِ ثْدِیَ، دُࢽُو اللَّه ثِلَࢽْ ثْدُو؞ ࢽغَیْࢽِࢽْ أَوُو سَمَّࢽْ عِیسَى أَلْمَسِیوُیٜࢽْ اللَّهَ ثُوࢽْغُورِ؞ تِرُو دَرَجَا کْࢽْدُوُووَ حَرْ أَبَدَ أَبَدِࢽُّو تِیُو! أَمِࢽْ؞
[12] کْرَوُووُࢽِ، بَرٜ بُوࢽٜ جَوْ ࢽَیِیَ رِجَࢻْتُرُو ࢽجَوَࢽْدْࢽَدَ أَجَمُّوِّ، أَوُو أَجَبَّ لَا وَکَّࢽْجَاࢽَدْ غَیْ،
[13] أَمَّ أَلْمَسِیوُرُو کْلْدْغْوٜ بُوࢽٜࢽْجُ یَوِدْرُو کْجِ ࢻَࢽُّواْ، سَ دَرَجَࢽْجُ ࢻْلٜدِییَ، کْجِ دَمَ بَوُو ࢻَࢽُّواْرُو؞
[14] ثُ أَلْمَسِیوُیٜ ࢽَࢽْغَرُو ࢽَیِیَ رَرَࢽْجَیْیَ، بَرْغَࢽْدُو، رُحُ اللَّهیٜ دَرَجَادْ ࢽَیِࢽْ ࢽَࢻْثِدْرُو؞
[15] بَرٜ وُࢽْدُࢽْدُومَ کَمْثٜجِ، بِ بَرْوُ، بِ دِوِ دِیُومَ، بِ أَوُو تِیَ ثَسَکّْࢽِّرُو ࢽغَوُومَ غَیْرُو بُوࢽٜ ثَࢽِّ؞
[16] أَمَّ کَمْ لَا تِ کْرِسْتَ ࢽَࢽْغَرُو بُوࢽٜ ثَیْیَ، بَرٜ ࢽَࢽْغُ ࢻَࢽْجْࢽِّ، أَمَّ ثُ أَدْ ࢽَࢽْغَرُو اللَّهرُو دَرَجَ ثُو؞
[17] سَ جَمَ اللَّهیٜرُو بُرْوُوࢽْ شَرَ ࢽجْدُّویٜدْ ثْدْࢽَ، کُورُو ࢽَࢽْدٜࢽْ بَدِجِیَ، أَوِ غْلٜ ࢽجٜرُورَمْ أَمْ کَوُرِ کْجِ اللَّهیٜ جَاࢽِّدْیٜ وُو؟
[18] کُورُو: «جِرٜمَدْ کِیَدِّࢽْ ࢽجْکَّوُو ثُوَࢽْدِیَ، أَوِ غْلٜ غَࢽَمْبُمَا بِوُمَآ ثُوَࢽْدِ؟»
[19] أَدْ ࢽَࢽْغَرُو أَمْ رَوُو اللَّهیٜ کْلَࢽْ بُوࢽٜ ثَسَیْدْ ࢽغْلَ ثَدُو رُوࢽْجَا مُکُّو أَلَکْتُمَ أَمَࢽَّیٜرُو ثَسَکُّو؞