[1] جِرِ أَدْغَیْࢽِࢽْ کَمُوَ، کوَوَࢽْدُورُو دَوْ کُولْغْࢽُواْ، لَاࢽجَ مَࢽَدَ جَغَیْوَوُورُو وَلْیٜࢽُووَ، مَࢽَ بَوُووَلَࢽْ کْࢽْدْغَیْ کَمُوَࢽْجَیٜࢽْ جَوَلُّو ࢽغَسَیِ،
[2] کْࢽْدْغَیْࢽْدُو بْرْسْمْبَا تَیِرَّدَ ثَرُیْ ࢽَࢽْغَرُو؞
[3] بَرٜ کَوَرَࢽْدُو کْلَ جَࢻْتَ سُو، کَرٜ دِࢽَرّٜیَ کَجْمُ شَوَا ࢽجَکُّو سُو دٜیَࢽْ تُرُیْرُو وَلْجْࢽِّ،
[4] أَمَّ حَلْ غْرَادَ کَرْوُیٜ سُو، ࢽَࢽْشَوَ دِࢽْجِوَوُو وُوتّٜ رُحُ رُوکُرَ بَوُووَ یٜ، حَࢽْغَلْ بُووَدَا یٜ سُورُو وَلْجُو، أَدْ ࢽَ اللَّهیٜࢽْ جَوْرُو تَمَࢽَّ؞
[5] ࢽغَیْࢽِࢽْ کُرٜ کَمُوَ تَیِرْ تْمَࢽْجَ اللَّهرُو ثَسَکّْࢽَدْ کَوَرَ ثَدٜ کوَوَࢽْجَرُو دَوْ کُولْیٜىٰرَ،
[6] جِرِ سَارَتُ ࢽَوِ إِبْرَاهِیمْبَ جْغَࢽٜ تِیَ کْمَࢽْجُلَࢽْ بُواْجْࢽَدْ غَیْ؞ أَوُو ࢽغْلَ دِوِیَ، کُورُو رِدُ ࢻِمَ کُولُّوٜ ࢽَیِیَ ࢽجَدَࢽِّیَ، ࢽَیِ یٜ ࢻٜرُووَࢽْجُرُو وَلُّوِ؞
[7] کوَوَ، جِرِ أَدْغَیْࢽِࢽْ ࢽَࢻْتُࢽْدُو ࢽَࢽْرُوکُّویٜدَ ࢽَࢽْرَشِدُࢽْ دٜوُو، کَمُوَࢽْدُویٜ دُࢽُوࢽْجَ کَاࢽدُووَ ࢽَجْغْࢽِّدْرُو، تَیِرُو دَرَجَ یُواْ، کْࢽْجُو سٜرَّ رُو سَوِسُویٜدَ کَلُّو وَرَسَࢽُوِ ࢽَࢽْغَرُو؞ ࢽغَیْࢽِࢽْ مُودُوَ دِیُوࢽْدُو دَࢻْتُوُرُو کَࢽُوِ؞
[8] دَرْیٜرَمْبُو، ࢽَیِ سَمَّ حَࢽْغَلْ تِلُووَا ࢽجُࢽُودُوَا کْرَوُو ࢽَࢽْیَاࢽَیٜیَا کَࢽْجِمَرِیَا رُوکُرَ بَوُووَارُو وَلُّواْ،
[9] بَرٜ دِوِیَ دِوِلَࢽْ بِ رَدُوَ رَدُلَࢽْ رْمْبُوِّ، ثُجُ أَدْیٜرُو بَرْغَ وَرَسَࢽُواْرُو بَرْغَ دْࢻْکْࢽُواْ، أَدَ دِیُورُو ࢽَیِیَ بُواْࢽْجَࢽَدْرُو؞
[10] أَوُووَ: «کَمْ ࢽَࢻْتُ کْجِ مَدَ سُو، کَوُ ࢽغْلَ کُرُو سُو ثْرَاࢽَمَدْ، تْلَمْࢽْجُوَ دِوِرُو کَجُو، ثِࢽْجُ یٜ بَرٜ جِرٜࢽَمْبُ وُلْجْࢽِّرُو رُوجُو،
[11] دِوِلَࢽْ تْمْجُو ࢽغْلَ ثْدُو، ࢽَࢽْلٜوَ مَجُو تِیَ کَدُجُو،
[12] کْمَࢽْدٜىٰ سِمْࢽْجُدْ جِرٜوُوَ ثُرُیْ، سْمُوࢽْجُ یٜ مُودُوَࢽْجَ کْرْࢽْجِ، أَمَّ ࢻْکَّ کْمَࢽْدٜىٰدْ دِوِ دِیُووُوَ وَجْࢽَ؞»
[13] تُو، کَسَدُوَرُو ࢽغْلَ دِیُو رَوُووُرُو وَلُّوِیَ، وُࢽْدُ غْلٜ ࢽَیِیَ بَسَرْࢽْجَیْ؟
[14] أَمَّ کْلَ ࢽَࢽْجِرٜىٰࢽْ بُوࢽٜ یَوِرُو وَلْیٜࢽُووَ، بَرْغَࢽْدُو؞ بَرٜ تَیِیَ رِࢽُوِّ بِ کَرْوُࢽْدُو کُتَّجْࢽِّ،
[15] أَمَّ کَرْوُࢽْدُوࢽْ أَلْمَسِیوُوَ کْمَࢽْدٜرُو بْرْسْمُّواْ؞ دَلِلْ تْمَ ࢽَیِࢽْ دْغَࢽَدْیٜ ࢽجَوُورِیَ، جَاوُ ࢽجُورُو کُلُّمْ دَبَّرْغَدَرُو وَلُّواْ،
[16] أَدْ یَیٜ رُوکُرَࢽَمْبُوَ دَرَجَالَࢽْ دٜوُو، کَرْوُࢽْدُو یٜ ࢽَیِیَ سَرِوُࢽْجَیْوَوُولَࢽْ دْغَ، ࢽغَیْࢽِࢽْ أَمْ کْلَ کْࢽْدْغَیْࢽْدُو ࢽغْلَ أَلْمَسِیوُلَࢽْ دِوِدْیٜࢽْ أَدْلَمْࢽْجَیْیَ، یَرْسْمْࢽْجَدْرُو ࢽَࢽْغُ تَیِیَ ثْدَیْ؞
[17] رَوُو اللَّهیٜرُو وَلْیٜࢽُووَ، دِوِ دِیُولَࢽْ یَیٜرُو ࢽغْلَ دِیُولَࢽْ بُوࢽٜ ࢽجَدْ ࢽغَلْوُو؞
[18] بِوُوَ ࢽَࢽْغَرُو أَلْمَسِیوُ تِ جِرٜمَدْ جِرٜࢽَمْبُوُرُو تِلُو لُوࢽُّو بُوࢽٜ کِیَࢽُو، ࢽَ اللَّهیٜرُو أَࢽْدِیَ سَوُدُورُو؞ کَࢽْجِ تِییٜࢽْ تِیَ رُورُو ثٜىٰسْࢽَ، أَمَّ کَࢽْجِ رُحُیٜࢽْ رُووَرُو ثَسَࢽْغْࢽَ،
[19] رُحُدْلَࢽْ لٜجٜ رُحُوَ جَکَّدَدْرُو کَوُرِ وُلْیٜىٰࢽُو،
[20] تَیِ ثَلَࢽْ غَࢽَمْبُوُدْ؞ سَدْࢽْ، جَمَࢽْ ࢽَوِ نُوحُیٜࢽْ مَارَدَ ثَدَࢽْدِ دُوُوࢽْ، اللَّه کَࢽَدِیَلَࢽْ غُرٜجْࢽَ؞ مَارَدْلَࢽْ أَمْ غَࢽَ، وُوتّٜ أَمْ وُسْکُ إِࢽْغِیٜࢽْ ࢽجْکَّوُو کٜوَࢽْدُو؞
[21] إِࢽْغِ أَدْ أَلَمَ کَسَلَیٜ، وُوتّٜ تِیلَࢽْ کَدَوُ تُلُوُو غْࢽِ، کَرْوُ سَرِوُ بَوُووَلَࢽْ اللَّهرُو جَاوُ ࢽجُو؞ کَسَلَ أَدْ کَرْمُولَࢽْ ثِدُ عِیسَى أَلْمَسِیوُیٜࢽْ کْرْمَ ࢽَیِیَ ࢽجَکَّیِ؞
[22] أَلْمَسِیوُدْ سَمٜرُو لٜجٜ کْمْبُورَمْ اللَّهیٜࢽْ کْرْغَ، کُورُو مَلَیْیَوَ سُو، کْࢽْدُوُووَ سُو، کْرْمَیْ سُو ثِدِیَࢽْجُرُو ثَسَکّْࢽَ؞