[1] وُمَ سِمَࢽْ بِتُرُسْ وُولُودِیَ کْࢽْغَیَمْبَ عِیسَى أَلْمَسِیوُیٜدْ أَمْ دُوُوࢽْ ࢽَࢽْجِرٜ عِیسَى أَلْمَسِیوُ اللَّهࢽْدٜیَ ࢽجْکَّیِمَࢽْدٜیَیٜࢽْ کَمْبْرْسٜ کَاࢽدٜ غَیْ بْرْسْمْبَ ثَوَࢽْدْࢽَدْرُو:
[2] ࢽُودُ اللَّهیٜیَ عِیسَى کْمَࢽْدٜىٰیَیٜࢽْ سٜرَّ ࢽَࢽْلٜوَا ࢽَیِࢽْ ࢽغْوُجَ!
[3] بَرْغَ ࢽُودُ تِ دُوُوࢽْ أَࢽْدِیَ دَرَجَࢽْجُوَ ࢽَࢽّغْلَࢽْجُوَیٜࢽْ بُواْسَࢽَدْیٜࢽْ، اللَّه کْࢽْدُوُوࢽْجُࢽْ أَوُو دُوُوࢽْ رُووَ ࢽَࢽْمُمِࢽَّرُو وَجِࢻْثْغْࢽَ سَمَّا سَدْࢽَ؞
[4] کُورُو دَرَجَࢽْجُوَ ࢽَࢽّغْلَࢽْجُوَدْࢽْ أَࢽْدِرُو وَدُوَ بْرْسْمْبَا جَوْرُو کُرَا ࢽغُوسَاࢽَ؞ وَدُوَدْ ࢽَیِیَ ࢽجَسَکّٜ ࢽجْࢻْتُ دُوُوࢽْ مَࢽْغَرْ دِوِ دُࢽِیَرُو ثُوُدْࢽَدْرُو کَࢽُوٜ حَلْ اللَّهیٜࢽْ ࢽُوَࢽْدُو ࢻَࢽْدُوِ؞
[5] أَدْمَ ࢽَࢽْغَرُو کُواْرِ ࢽغْلَرُو دٜوُو کَمْبْرْسٜࢽْدُورُو ࢽَࢽّغْلَ یِرْغَیْوُو، ࢽَࢽّغْلَدْرُو إِلْمُ،
[6] إِلْمُدْرُو کْلَرِوُو، کْلَرِوُودْرُو ࢽٜتُّ، ࢽٜتُّدْرُو ࢽَࢽْمُمِࢽْ،
[7] ࢽَࢽْمُمِࢽْدْرُو ࢽَࢻْتُ ࢽَࢽْیَاࢽَیٜ، ࢽَࢻْتُ ࢽَࢽْیَاࢽَیٜدْرُو کْرَوُو یِرْغَیْوُو؞
[8] أَوُووَ أَوُو أَࢽِ ࢽَࢽْدُوࢽْ مبٜجِ تَسَرْغَیْیَ، ࢽَیِیَ ࢽجَسَکّٜ ࢽُودُ کْمَࢽْدٜ عِیسَى أَلْمَسِیوُیٜࢽْ ࢽَࢻْتُ بُووُیٜ دِیُووَ ࢻَیْدَ بَوُووَرُو وَلْدُوَرُو کَࢽُوِ؞
[9] أَمَّ کَمْ دُوُوࢽْ أَوُو أَࢽِ تِیَ مَوْجَࢽَدْ کَمْبُ، کُرُوُ ثُرُیْوَوُو، بِوُوَࢽْجُ ثَیٜلَࢽْ تَیِرُّو وَلْجْࢽَدَ ࢽغٜسّْࢽَ؞
[10] أَدْ ࢽَࢽْغَرُو، کْرَمِیَ، کُواْرِࢽُواْ بُواْدُࢽْدُووَ کْرٜدُࢽْدُووَا تَبَّتْکْࢽُواْ، أَوُو أَࢽِیَ دِوِیَ، تْمَّرُو تَلُّوَّوُو؞
[11] ࢽغَیْࢽِࢽْ عِیسَى أَلْمَسِیوُ کْمَࢽْدٜ یٜ، ࢽجْکَّیِمَࢽْدٜ یٜدْیٜ ࢽُودُوࢽْجُ بَرْغَا سَوِسُویٜدْرُو أَمَرِ ࢻَرَکُّو ࢽغَوُویٜ ࢻَࢽْدُوِ؞
[12] أَدْ ࢽَࢽْغَرُو، أَوُو أَࢽِیَ ࢽُوࢽُوَّ یٜ، جِرٜ مُووُوَّدْࢽْ تَبَّتْکْوَّ یَیٜ، کُلُّمْ ࢽَیِرُو إِسَتَکْتُوُرُو ࢽِیَ ࢽغُوکّْࢽَ؞
[13] ࢽَࢻْتُࢽِ سَمَّ کْࢽْدْغَیْرَمْ أَدْࢽْ ࢽَیِیَ إِسَتَࢽّجَغَکِّیَ، کُرُوࢽِࢽْ جُسّْࢽَ؞
[14] أَیْ، کْمَࢽْدٜ عِیسَى أَلْمَسِیوُ إِسَࢽُوسْغْࢽَدْ غَیْ، کْࢽْدْغَیْرَمِّ أَدَ تُسِّوَوُو کُولّْکِّ؞
[15] کُورُو کُواْرِ دِکّٜ رَࢽْغُوٜ ࢽغَوُو دُࢽِیَ أَدَ کُولّْکّْࢽَیٜࢽْ سَوِ یَیٜ أَوُو أَࢽِیَ تَࢽْغُوِ؞
[16] سَ کْࢽْدُوُووَ کْࢽْدٜیَ کْمَࢽْدٜ عِیسَى أَلْمَسِیوُیٜ إِسَࢽُوࢽْجَغَیْیٜࢽَدْࢽْ، ࢽیَرِ ࢽَࢽْغَࢽْ تْدْࢽَسُو غْࢽِ غِیَیْیٜ، أَمَّ سِمْࢽْدٜمَࢽْ مَرْتَوَࢽْجُدَ کِرُیْیٜ؞
[17] سَ عِیسَى بْرْسْمْبَ دَرَجَآ اللَّه بَوَدْیٜࢽْ ثُوَࢽْدْࢽَدْࢽْ، کُواْ لَا دَرَجَ مَرْتَوَادْیٜࢽْ إِسٜ: «أَدْمَ تَدَࢽِ وُو، تِیَ جَوْرُو رَاکّْࢽَ؞ تِمَ کَرْوُࢽِ جَوْرُو کْجِجُوُو،» یٜࢽُو؞
[18] کُواْ سَمٜࢽْ إِسْࢽَدَ أَࢽْدِ کْلَࢽْدٜ عِیسَىٰ رُوکُّو کْلَ کَوْ کُرُوُ تَیِرْدْیٜࢽْ ࢻَࢽِّیٜࢽَ؞
[19] أَدَ کُوجْࢽَرُو مَࢽَ ࢽَوِࢽَوِدَ تَبَّتُّو تَیْیٜࢽَ؞ حَرْ کَوُ دُࢽِیَ وَجٜ سِلُّووُ ࢻَجَرّٜ کَرْوُࢽْدُولَࢽْ ثُلُوِرُو، مَࢽَدَ ࢻَتْلَ ࢽَ دُوُوَ وَسِّ غَیْ حَࢽْغَلَّیٜࢽْ غَوِیَ، جَوْرُو ࢽغْلَ؞
[20] بُرْوُو سَلَّمِّࢽْ أَدَ ࢽُوࢽُواْ، مَࢽَ ࢽَوِࢽَوِ کِتَوُلَࢽْ رُوُوَدَ ࢻِمَ ࢻِسَرْدُ رَایِ کَمْبٜرُو وَلْجِوَوُو،
[21] مَࢽَ ࢽَوِࢽَوِ ࢻِمَ ࢽغَلْتٜ رَوُو کَمْبٜࢽْ إِسْࢽِّ ࢽَࢽْغَرُو، أَمَّ رُحُ اللَّهیٜ أَمْبَ سِمُوجِیٜ ثُ اللَّهیٜࢽْ مَࢽَ کٜدُو؞