[1] أَدْ ࢽَࢽْغَرُو ࢽِیَدِوِ سَمَّا جِرٜࢽَمْبُ سَمَّا ࢽَࢽْمْࢽَࢻْکَّ ࢽَࢽْدْرِیَ یَرْسْمْ سَمَّا کُولُّواْ،
[2] تِمَلْ تَمْبُو بْرِࢽَّ غَیْ کِیَمْ جِرٜىٰ جَلَّ وُوتّٜ مَࢽَ اللَّهیٜ جَوْرُو رَوُواْ، ࢽغَیْࢽِࢽْ ࢽجْکَّوُوࢽْدُوࢽْ وُرَࢽُوِ،
[3] سٜرْ کْمَیٜدَ ࢽغْلَرُو تَمْبُوَّرُو وَلْیٜࢽُووَ؞
[4] ࢽَ کْمَیٜرُو أَرُواْ، تِ دُوُوࢽْ کَوْ رُووَ أَمْبٜ وَجَࢽَ، أَمَّ ࢽَ اللَّهیٜࢽْ کْرٜیَدَا بْرْسْمْغَدَادْ؞
[5] ࢽَیِ کْلَࢽْدُومَ کَوْوَ رُووَ غَیْ تَیِلَࢽْ ࢻَدُو رُحُیٜ ثَدَࢽْدِ، رِمَࢽَّ تَیِرُّو وَلُّواْ سَدَا رُحُیٜ دُوُوࢽْ اللَّه عِیسَى أَلْمَسِیوُیٜࢽْ أَرْدِجِدَ یِدُّواْرُو؞
[6] أَوُووَ کِتَوُلَࢽْ تَبَّتْکَادَ: «أَکُّو سِیُوࢽِّࢽْ کَوْ مَسَمَّࢽّٜ کْرٜیَدَ بْرْسْمْبَ غْࢽَࢽْکِّ، کَمْ تِیَ مْرْسَجْࢽَمَدْ، ࢽَࢽْغُ تِیَ ثْدَیْوَوُو؞»
[7] ࢽَیِ کَمْبْرْسٜࢽْدُووَدْ، ࢽَࢽْدُوࢽْ کَوْ أَدْ بْرْسْمْبَ، أَمَّ ࢽَ کَمْبْرْسٜࢽَمْبُوُدْیٜࢽْ: «کَوْ دُوُوࢽْ ࢻَدُو تَࢽْدُومَسُو وَجَࢽَمَدْ، تِمَ کَوْ تَࢽْدُویٜ سَمَّرُو ࢻَیْدَارُو وَلْجْࢽَدْ وُو،»
[8] کُورُو: «کَوْ تَلْدُیٜ یٜ، تَکَّلْدُمَ یٜدْ؞» مَࢽَدَ جَاࢽِّ ࢽَࢽْغَرُو تَیِرُو کَدَرْغَادَدْ غَیْ تَلْجَࢽَ؞
[9] أَمَّ ࢽَیِدْ کَبِلَ کْرٜیَدَ، کْوُ رِمَࢽَّ مَیْ کُرَیٜ، جِرِ تَیِرْ، جَمَ اللَّهیٜرُو وَلُّوَّ؞ ࢽغَیْࢽِࢽْ کْࢽْدُو کْࢽْدُوُووَ تِ دُوُوࢽْ ࢽَیِیَ دُوُلَࢽْ لُوُواْ ࢽُرْࢽْجُ أَجَبَّرُو ࢽغَوُواْرُو بُواْࢽْجَࢽَدْیٜدَ وُلُّوِ؞
[10] ثَلَࢽْ ࢽَیِدْ جَمَ تِلُو غْࢽِ، أَمَّ کْرْمَ جَمَ اللَّهیٜ، ثَلَࢽْ ࢽجُࢽُوࢽْجَࢽِّ، أَمَّ کْرْمَ ࢽجُࢽُوࢽْجَࢽَ؞
[11] کْرَوُووُࢽِ، ࢽَیِ کُسُوتُّووَا سِکُدُووَادْ، ࢽَیِیَ لُواْࢽْجَکِّ، مَࢽْغَرْ تِییٜ ࢽَیِرُو کْرِوُ ࢽجَکَّدِدَ وَࢽُواْ!
[12] دَوُ کْرْدِیَیٜࢽْ کْࢽْدْغَیْ ࢽغْلَ دٜوُو، ࢽغَیْࢽِࢽْ ࢽَیِیَ دِوِ دِیُووُ غَیْ أَدْلَمْࢽْجَیْسُوࢽْ، کْࢽْدُوࢽْدُو ࢽغْلَدَ ثَرُࢽٜ یِمْ کْمَ وَلْدٜ إِسِیَ، اللَّهرُو دَرَجَ ثَدِ؞
[13] کْمَ ࢽَࢽْغَرُو کْࢽْدُوُومَ أَدَمْغْࢽَیٜ ࢻِ یَیٜرُو دَوْ کُولْغْࢽُواْ، مَیْ یٜࢽْ کَلْ، تِ ࢻُوُمَدْرُو،
[14] غُومْࢽَوَسُو یٜࢽْ کَلْ، مَیْدْ تَیِیَ دِوِ دِیُووُرُو وُواْمْ غْࢽَدُوُرُو، کُورُو ࢽغْلَ دِیُووُ یٜیَ جَجَکْتُرُو ثُࢽُودْࢽَدْرُو؞
[15] رَوُو اللَّهیٜدْ تِمَ ࢽغْلَ دِیُولَࢽْ حَࢽْغَلْࢽَمْبُوُرُو مَࢽَࢽْجَ ࢽَࢽْجَیِلّٜدَ دَࢻْکْوِ؞
[16] کَمْبٜ غَیْرُو دْغَیْوُو، أَمَّ کَرٜیَوَ اللَّهیٜ غَیْ بَرٜ ࢽَࢽْکَمْ کْلَیٜࢽْدُودْࢽْ ࢻَیْدَدُوٜ ࢽَࢽْکْلَدُو غْرَࢽُوِّ؞
[17] أَمْ سَمَّرُو دَرَجَ یُواْ، جَمَ کْرَمِیَیٜدَ رَوُواْ، اللَّهَ رِࢽُواْ، مَیْرُو دَرَجَ یُواْ!
[18] وُولُودِیَ، اللَّه رِدَ سَمَّࢽْ بَࢽْدُو ࢽغِمْبَرُو دَوْ کُولْغْࢽُواْ، تَیِ ࢽغْلَا رُوکُرَ بَوُووَا رُࢽْجَرُو غْࢽِ، تَیِ دِوِ یٜرُو؞
[19] حَلْ اللَّهیٜ ࢽَࢽْغَرُو، بُوࢽٜ جُسّْࢽِّ یَمٜ ࢽٜتُّدْ ࢽَ اللَّهیٜࢽْ أَرْدِیَدَ؞
[20] بِوُ دِوٜ ࢽَیِیَ بَࢽّجَࢽٜ ࢽٜدُّوِیَ، أَوِ جَجَکْتُیٜ دِوْ؟ أَمَّ ࢽغْلَ دِوٜ بُوࢽٜ یَوٜ ࢽٜدُّوِیَ، أَدْ ࢽَ اللَّهیٜࢽْ أَرْدِیَدَ؞
[21] أَلْمَسِیوُ ࢽَیِ ࢽَࢽْغَرُو بُوࢽٜ ثَࢽَدْرُو، ࢽَیِ یٜیَ أَدْمَرُو بُواْࢽْغٜرَ؞ أَوُووَ ࢽَیِرُو مِسَلْ کُولْࢽْجَاࢽَ، ࢽَیِ یٜ سِࢽْجُوَ غَیْوُورُو،
[22] تِ دُوُوࢽْ بِوُ یٜ ثْدْࢽِّ، جِرٜࢽَمْبُ یٜ ثِࢽْجُࢽْ تُوَࢽْدْࢽِّدْ؞
[23] تِیَ رَرَیٜرَࢽِّیَ، رَدُ کَلَکْثْࢽِّ، بُوࢽٜ کِیَࢽِّیَ، وُسَجْࢽِّ، شَرَ جِرٜ کَمْدُمَدْرُو کْلَࢽْجُ کَیْࢽُو؞
[24] تِ کْلَࢽْجُ بِوُوَࢽْدٜ تِیࢽْجُࢽْ کْلَ کْسْکَدْیٜࢽْ ࢽغُویٜࢽُو، أَࢽْدِ بِوُرُو ࢽُیْیٜࢽَدْ ࢽَࢽْجِرٜرُو دْغَیْیُورُو؞ لُورُࢽْجُمَࢽْ ࢽغَیٜوْ؞
[25] ثَلَࢽْ ࢽَیِدْ دِمِیَ غَیْ ࢻَتّْغْوَّ، أَمَّ کْرْمَ ࢽَ تِ سْࢽِࢽْدُو یٜ، رُوࢽْدُورُو کِسْتُوُمَ یٜدْیٜرُو وَلْدُوَّ؞